އީގަލްސްގައި އަދިވެސް އަނިޔާގެ މައްސަލަ އުޅޭ: މުއާވިޔަތު

ކުލަބު އީގަލްސްގައި އަދިވެސް އަނިޔާގެ މައްސަލަ އުޅޭ ކަމަށާއި، މިހާރު ވެސް އެކަމަށް މަސައްކަތް ކުރަމުން އަންނަ ކަމަށް އެ ޓީމުގެ އެސިސްޓެންޓް ކޯޗު މުއާވިޔަތު އިލްހާމް ބުނެފި އެވެ.

އީގަލްސްގެ ކޯޗު އިޙުސާން ޢަބްދުލް ޣަނީ (ސާންތީ) ބަލިވެ އުޅުމުގެ ސަބަބުން ޕްރެސް ކޮންފަރެންސްގައި ބައިވެރިވަމުން އަންނަނީ މުއާވިޔަތު އެވެ. ލީގުގައި އީގަލްސް ކުޅުނު ފުރަތަމަ މެޗުގައި ވަނީ ބުރު ސްޕޯޓްސް ކުލަބު އަތުން މޮޅުވެފަ އެވެ. ދެ ވަނަ މެޗުގައި އެ ޓީމު ނުކުންނާނީ ކުލަބު ވެލެންސިއާއާ ދެކޮޅަށެވެ. އެ މެޗުގެ ކުރިން މުއާވިޔަތު ބުނީ އީގަލްސް ޓީމުގައި އަދިވެސް އަނިޔާގެ މައްސަލަތަކެއް އުޅޭ ކަމަށާއި، މިހާރު ވެސް ޓީމުން އަންނަނީ އެކަމަށް މަސައްކަތް ކުރަމުން ކަމަށެވެ.

އޭނާ ބުނީ އަބަދު ވެސް އީގަލްސް ޓީމުގެ ހިތްވަރަކީ ކުޅުންތެރިންގެ ހިތްވަރު ކަމަށެވެ. އަދި ޓީމުގެ ހުރިހާ ކަމެއް ކުރިއަށް ގެންދަނީ ހެޑު ކޯޗު ސާންތީގެ ބެލުމުގެ ދަށުން ކަމަށެވެ. އެހެންކަމުން އީގަލްސްގެ ކުޅުންތެރިންގެ ފަރާތުން ލިބޭ އެއްބާރުލުމާއި، ކުޅުންތެރިން ދައްކަމުން އަންނަ ހިތްވަރު މުއާވިޔަތު ވަނީ ފާހަގަކޮށްފަ އެވެ. އޭނާ ބުނީ އަބަދުވެސް އީގަލްސްގެ ޓާގެޓަކީ ކޮންމެ މެޗަކުން މޮޅުވުން ކަމަށެވެ. ސަބަބަކީ އީގަލްސް ނުކުމެ އޮތީ ލީގަށް ވާދަކުރަން ކަމުގައިވާތީ، އެކަން ހާސިލްކުރުމަށްޓަކައި އީގަލްސް އިން ނުކުންނާނީ އެ ޓީމު ކުޅޭ ކޮންމެ މެޗަކުން ވެސް ތިން ޕޮއިންޓު ހޯދުމަށް ކަމަށް އޭނާ ބުންޏެވެ.

މުއާވިޔަތު ވަނީ ތަކުރާރުކޮށް އީގަލްސްގެ ކުޅުންތެރިން ކުރަމުން އަންނަ މަސައްކަތް ފާހަގަކޮށްފަ އެވެ. އޭނާ ބުނީ ދަނޑުމަތީގައި އީގަލްސްގެ ކުޅުންތެރިން ދައްކާ ކުޅުމުން، ޚާއްސަކޮށް ފަހު ހާފުގައި ދައްކާ ކުޅުމުން، ހިތްގައިމު ފުޓުބޯޅައެއް ފެންނަ ކަމަށެވެ. އެހެން ނަމަވެސް ކޮންމެ މެޗެއްގައި ވެސް އީގަލްސް ކޮޅަށް ވަރަށް އަވަހަށް ލަނޑެއް ވަންނަ ކަމަށާއި، ކުރިއަށް އޮތް ތަނުގައި އެކަން ބަދަލު ކުރަން ޖެހޭ ކަމަށް އޭނާ ބުންޏެވެ. ޚާއްސަކޮށް ކުރިއަށް އޮތް ވެލެންސިއާ މެޗުގައި އެކަން ބަދަލު ކުރުމަށް ވަރަށް ބޮޑަށް މަސައްކަތް ކުރާނެ ކަމަށް ވެސް މުއާވިޔަތު ބުންޏެވެ.

އީގަލްސް އަށް ކުޅެމުން އަންނަ ބިދޭސީ ކުޅުންތެރިންނާ ގުޅޭ ގޮތުން ސުވާލު ކުރުމުން އޭނާ ބުނީ، ރަމަޟާން މަހަށް ފަހު މިހާރު ލިބުނު ވަގުތުގައި ކުޅުންތެރިން ގޭމުގެ ތެރެއަށް އަންނަ ކަމަށެވެ. އެހެންކަމުން ކުރިއަށް އޮތް ތަނުގައި އެ ކުޅުންތެރިން އިތުރަށް ރަނގަޅުވެ، އީގަލްސް އިން ހިތްހަމަޖެހޭ ވަރަކަށް ކުޅޭނެ ކަމަށް އުންމީދު ކުރާ ކަމަށް ވެސް އޭނާ ބުންޏެވެ.

އީގަލްސް އިން ވެލެންސިިއާއާ ދެކޮޅަށް ނުކުންނައިރު، ލީގުގައި ވެލެންސިއާ ކުޅުނު ފުރަތަމަ މެޗުން ވަނީ ބަލިވެފަ އެވެ. އީގަލްސް އާއި ވެލެންސިއާ ބައްދަލު ކުރާ މެޗު ފަށާނީ އާދިއްތަ ދުވަހުގެ ރޭ 21:00 ގައެވެ.