ސަންޑަލޭންޑްގެ ކޯޗު އަންހެން ރިޕޯޓަރަކަށް އިންޒާރުދިން މައްސަލަ ބަލަނީ!

އިނގިރޭސި ކުލަބު، ސަންޑަލޭންޑް ކޯޗު ޑޭވިޑް މޮއިސް އަންހެން ރިޕޯޓަރަކަށް އިންޒާރުދިން މައްސަލަ ބެލުމަށްޓަކައި އެކަން ހިނގާދިޔަ ގޮތް ސާފުކުރުމަށް އޭނާއާ ސުވާލުކުރުމަށް އިނގިރޭސި އެފްއޭ ނިންމައިފިއެވެ.

އިނގިރޭސި އެފްއޭ އިން މޮއިސްއާ ދެކޮޅަށް ބަލަމުން އަންނަ މައްސަލަ ފެންމަތިވެފައި ވަނީ މިދިޔަ މާޗް މަހުގެ 18 ވަނަ ދުވަހު ސަންޑަލޭންޑާއި ބާންލީ ބައްދަލުކުރި މެޗަށް ފަހުގައެވެ.

މޮއިސްގެ މި އަމަލަކީ އެމެޗަށް ފަހު ބީބީސީ ރޭޑީއޯގެ އަންހެން ރިޕޯޓަރަކު ކުރި ސުވާލުތަކަކާ މެދު ހިތްހަމަ ނުޖެހިގެން ކުރިކަމެވެ.

ބީބީސީ ރޭޑިއޯގެ އަންހެން ރިޕޯޓަރެއް ކަމަށްވާ ވިކީ ސްޕާކްސްގެ ސުވާލުތަކާ މެދު ހިތްހަމަ ނުޖެހިގެން "އަންހެނެއް ކަމަކު ފަހަރެއްގައި ކަންފަތްމަތީގައި ޖަހަންޖެހިދާނެ" ކަމަށް މޮއިސް ވަނީ ބުނެފައެވެ.

އަންހެން ރިޕޯޓަރުގެ ކަންފަތްމަތީގައި ޖަހަންޖެހިދާނެ ކަމަށް ބުނުމުގެ އިތުރުން މޮއިސް ވަނީ ދެން އޭނާއާ ސުވާލުކުރަން އަންނައިރު ވަރަށް ސަމާލުވެ ހުރެގެން އައުމަށް އިންޒާރުދީފައެވެ.

މޮއިސްގެ މި އަމަލާ ގުޅިގެން އެތައް ބަޔެއްގެ ފާޑުކިޔުން ވަނީ އޭނާއަށް އަމާޒްވެފައެވެ. އަދި ކުރީގެ ބައެއް ކުޅުންތެރިން ވެސް ވަނީ މޮއިސްގެ މި އަމަލު ކުށްވެރިކޮށް ވާހަކަ ދައްކާފައެވެ.

އެގޮތުން ޝެޑޯ ސްޕޯޓްސް މިނިސްޓަރ ޑރ. ރޮސޭނާ އެލިންޚާން ވަނީ އެމައްސަލަ ބެލުމަށް އިނގިރޭސި އެފްއޭއަށް ގޮވަލައްވާފައެވެ. އަދި އިނގިރޭސި ގައުމީޓީމުގެ ކުރީގެ ފޯވަޑް ގެރީ ވެސް ވަނީ އެކަން ކުށްވެރިކޮށް ވާހަކަ ދައްކާފައެވެ.

ވިމެން އިން ފުޓްބޯލް އިން ނެރުނު ބަޔާނެއްގައި ބުނެފައި ވަނީ މޮއިސްގެ އެ އަމަލާ މެދު ކަންބޮޑުވާ ކަމަށާއި ނަމަވެސް މާފަށް އެދިފައިވުމަކީ ހިތްހަމަ ޖެހޭ ކަމަށެވެ.

މޮއިސް ވަނީ ފަހުން ބޭއްވި ނޫސްވެރިންގެ ބައްދަލުވުމެއްގައި އެ ރިޕޯޓަރުގެ ފަރާތުން މާފަށް އެދިފައެވެ. އެގޮތަށް އަހަންނަށް ވާހަކަދެއްކުނީ އެ ހާލަތުގެ ގޮތުން ކަމަށާއި އެއީ އޭނާއަށް ހެނދުނު ވަރަށް ބޮޑު ގޯހެއް ކަމަށް މޮއިސް ވަނީ ބުނެފައެވެ.

ބީބީސީން ވެސް ކަށަވަރުކޮށްދޭ ގޮތުގައި މޮއިސް ވަނީ، ސްޕާކްސްއާ ވާހަކަ ދައްކާ މާފަށް އެދި އެދެމީހުންގެ މެދުގައި ޖެހުނު މައްސަލަ ހައްލުކޮށްފައެވެ.

މޯއިސްގެ އަމަލު އިނގިރޭސި އެފްއޭއިން ތަހުގީގު ކުރަން ފަށާފައިވާއިރު، އޭނާއާ މެދު އަޅާނެ ފިޔަވަޅެއް އެގެންޖެހޭ ކަމަށް ބައެއް ފަރާތްތަކުން އަންނަނީ ބުނަމުންނެވެ.