ފިޓްނަސްގެ މައްސަލައެއް ނެތް، އުނދަގޫތަކެއް ހުރީ ޓީމު އެކުލެވުމުގައި: ނިސްތާރު

ކުލަބު ގްރީން ސްޓްރީޓްސްގައި ފިޓްނަސްގެ މައްސަލަ އެއް ނެތްކަމަށާއި، އުނދަގޫތަކެއް ދިމާވަނީ ޓީކު އެކުލަވާލުމުގައި ކަމަށް އެ ޓީމުގެ ކޯޗު އަލީ ނިސްތާރު މުހައްމަދު ބުނެފިއެވެ.

ލީގުގައި ގްރީން ކުޅުނު ފުރަތަމަ މެޗުގައި ސުޕަ ޔުނައިޓެޑު ސްޕޯޓްސް (ސަސް)އަތުން ވަނީ ބަލިވެފައެވެ. ގްރީންގެ ދެވަނަ މެޗުގައި ނިކުންނާނީ ލީގު ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށެވެ. އެ މެޗުގެ ކުރިން އޮތް ޕްރެސް ކޮންފަރެންސްގައި ވާހަކަދައްކަމުން ނިސްތާރު ބުނީ، ގްރީންގައި ފިޓްނަސްގެ މައްސަލައެއް ނެތްކަމަށެވެ. އެހެންނަމަވެސް ޓީމުގައި ގިނައިން ތިބީ އައު ކުޅުންތެރިންނަށް ވުމާއެކު، ޓީމު އެކުލަވާލު ގެމުގައި ދަތިތަކެއް ހުރިކަމަށް އޭނާ ވަނީ ބުނެފައެވެ. އޭނާ ބުނީ މެޗަކަށްފަހު މެޗެއް ކުޅެމުންދާވަރަކަށް ޓީމު އެކުލެވެމުންދާނެ ކަމަށް އުންމީދުކުރާކަމަށެވެ.

ލީގަށް ގްރީންއިން ތައްޔާރުވީ ކިހާ މުއްދަތެއްގައިތޯ ސުވާލު ކުރުމުން ނިސްތާރު ބުނީ އެހާ ގިނަ ދުވަހެއް ނުލިބޭކަމަށެވެ. އޭނާ ބުނީ ގްރީންއިން ފަރިތަކުރުންތައް ފެށީ ރަމަޟާން މަހުގެ ފަހު ދެ ދުވަހުގެ ތެރޭގައި ކަމަށެވެ. ނަމަވެސް އީދާ ދިމާކޮށް ކުޑަ ބްރޭކެއް ނެގުމަށްފަހު އަލުން ފެށީކަމަށެވެ. މިވަގުތު ޓީމު އެކުލެވުމުގައި އުނދަގޫތަކެއް ކުރިމަތިވިނަމަވެސް ގްރީންގެ ކުޅުންތެރިންނާމެދު އިތުބާރު އޮތްކަމަށް އޭނާ ވަނީ ބުނެފައެވެ. ލީގާ ގުޅޭގޮތުން ވާހަކަދައްކަމުން ނިސްތާރު ބުނީ، އޭނާ ދެކޭގޮތުގައި ޕްރިމިއާ ލީގުގައި އެއްވެސް މެޗެއް ފަސޭހައެއް ނުވާނެއެވެ. އެހެންނަމަވެސް މާޒިޔާއަކީ މިއަދު ދިވެހި ފުޓުބޯޅާގައި އޮތް އެންމެ ވަރުގަދަ އެއް ބާރު ކަމަށާއި، އެ މެޗަށް އެންމެ ފުރިހަމައަށް ތައްޔާރުވާނެ ކަމަށެވެ.

ގްރީންގެ ޓާގެޓާ ގުޅޭގޮތުން އޭނާ ބުނީ، އެ ޓީމުން ޓާގެޓުކުރަނީ އެންމެ ދަށްވެގެން ގަދަ ހަތަރަކަށް ވަނުމަށް ކަމަށެވެ. އެެހެންކަމުން އެކަން ހާސިލްކުރާނެކަމުގެ ޔަގީންކަންވެސް ނިސްތާރު ވަނީ ދީފައެވެ. ތައްޔާރުވުމާ ގުޅޭ ގޮތުން އިތުރަށް އޭނާ ބުނީ، ޕްރީ ސީޒަނެއްގެ މުއްދަތަކީ ހަ ހަފުތާ ކަމަށެވެ. އެހެންކަމުން އެ މުއްދަތު ލިބިއްޖެނަމަ، ޓީމެއް ތައްޔާރުކުރުމަކީ އެއްވެސް މައްސަލައެއް ނޫން ކަމަށެވެ. ނަމަވެސް އޭނާ ބުނީ ފުޓުބޯޅަ ކޯޗުންނަށް އެންމެ ބޭނުންވާ ގޮތަކަށް ކަންކަން ނުކުރެވޭނެ ކަމަށާއި، ކޯޗުން ޖެހޭނީ އޭރަކު އޮންނަ ހާލަތަށް ތައްޔާރުވެގެން އެންމެ ބެސްޓު ނެރެން ކަމަށެވެ.

މީގެ އިތުރުން ނިސްތާރު ބުނީ، ކޯޗެއްގެ އެންމެ މުހިންމު އެއް ކަަމަކީ ލިބިފައިވާ ރިސޯސް ބޭނުން ކޮށްގެން ކުރިއަށްދިޔުން ކަމަށެވެ. އެހެންކަމުން ގްރީންގައި ބިދޭސީ ކުޅުންތެރިން ނެތުމަކީ ބަހަނާއެއްގެ ގޮތުގައި ދައްކަން ބޭނުންނުވާކަމަށާއި، މޮޅު ކުޅުމެއް ދެއްކޭނެ ފެންވަރުގެ ދިވެހި ކުޅުންތެރިން އޭނާގެ ޓީމުގައި ތިބިކަންވެސް ނިސްތާރު ފާހަގަކުރިއެވެ. ނަމަވެސް އެ ކުޅުންތެރިން ހޭނުމަށް ވަގުތު ނަގާނެކަމަށާއި، ސީޒަން ނިމޭއިރު ގްރީންގެ ޓާގެޓު ހާސިލްވާނެކަމުގެ އިތުބާރު އޮތް ކަމަށްވެސް ބުންޏެވެ. ގްރީންއިން ބިދޭސީ ކުޅުންތެރިން ހޯދުމަށް މަސައްކަތް ކުރާނެތޯ ސުވާލު ކުރުމުން ނިސްތާރު ބުނީ, އެކަމަކީ ޓީމުގެ މެނޭޖުމަންޓުގެ އަތް މަތީގައި އޮތް ކަމެއް ކަމަށެވެ. އެހެންނަމަވެސް އޭނާ އުންމީދުކުރަނީ ޓްރާންސްފަރ މާކެޓުގައި ޓީމުން ބިދޭސީ ކުޅުންތެރިން ހޯދުންކަމަށް ނިސްތާރު ބުޏްނެވެ.

ގްރީންއިން މާޒިޔާއާ ދެކޮޅަށް ނިކުންނާނީ ހޮނިހިރު ދުވަހުގެ ރޭ 21:00ގައެވެ.