ޔޫވީގެ ކޯޗަކަށް ޝާކިއްޓޭ، ގޮންޖެހުންތާއެކު ވެސް ކުރިއަށް ދިޔުމުގެ އަޒުމުގައި

ގޮންޖެހުންތަކާ އެކު ވެސް ޔުނައިޓެޑު ވިކްޓްރީ (ޔޫވީ)އާއެކު ކުރިއަށް ދިޔުމުގެ އަޒުމުގައި ހުރި ކަމަށް ޒުވާން ކޯޗު އަޙުމަދު ޝާކިރު (ޝާކިއްޓޭ) ބުނެފި އެވެ.

ޝާކިއްޓޭގެ އިރުޝާދުގެ ދަށުން ޔޫވީ ނުކުންނަ ފުރަތަމަ މެޗަކީ މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށް ދިވެހި ޕްރިމިއާ ލީގުގައި ނުކުންނަ މެޗެވެ. އެ މެޗުގެ ކުރިން އޮތް ޕްރެސް ކޮންފަރެންސްގައި ވާހަކަ ދައްކަމުން ޝާކިއްޓޭ ބުނީ، ސީޒަންގައި ކުރިއަށް ގެންދުވީ 15 ވަރަކަށް ފަރިތަކުރުން ކަމަށާއި، ފުރަތަމަ މެޗަށް ނުކުންނަން ޖެހޭނީ މާ ގިނަ ފަރިތަކުރުންތަކެއް ނެތި ކަމަށެވެ. އެއާއެކު ކުރިމަތިލާން ޖެހެނީ ލީގުގައި ވެސް އޮތް އެންމެ ވަރުގަދަ އެއް ޓީމާކަން ފާހަގަކޮށް ޝާކިއްޓޭ ބުނީ، ލިބުނު މުއްދަތާ އަޅާބަލާއިރު ހިތްހަމަޖެހޭ ވަރަށް ތައްޔާރުވެވުން ކަމަށެވެ.

ޔޫވީގައި ތިބި ކުޅުންތެރިންނާ ގުޅޭ ގޮތުން ވާހަކަދައްކަމުން ޝާކިއްޓޭ ބުނީ، މިދިޔަ އަހަރު ތިބި ކުޅުންތެރިންގެ ތެރެއިން މިހާރު ޓީމުގައި ތިބީ ފަސް ވަރަކަށް ކުޅުންތެރިން ކަމަށެވެ. ޓީމުގައި ބާކީ ދެން ތިބޭނީ މުޅިން އައު ކުޅުންތެރިން ކަމަށާއި، އޭގެ ތެރޭގައި ވެސް ގިނައީ ޒުވާން ކުޅުންތެރިން ކަމަށެވެ. އޭގެ ތެރޭގައި 19 އަހަރުން ދަށުގެ ޤައުމީ ޓީމުގެ ކުޅުންތެރިންނާއި، ބައެއް ރަށްރަށުން ގެނައި ކުޅުންތެރިން ހިމެނޭނެ ކަމަށް އޭނާ ބުންޏެވެ. އެހެންކަމުން ޔޫވީ އަށް އެންމެ ބޮޑަށް ދިމާވާނެ މައްސަލަ އަކީ ތަޖުރިބާގެ މައްސަލަކަން ފާހަގަ ކުރަމުން ޝާކިއްޓޭ ބުނީ، ސަބަބަކީ ޒުވާން ކުޅުންތެރިން ޕްރިމިއާ ލީގަށް އަލަށް ނުކުތުން ކަމަށެވެ. ޚާއްސަކޮށް ޓީމުގެ ފުރަތަމަ 11 ހަމަވަނީ ވެސް ޒުވާން ކުޅުންތެރިން ހިމަނައިގެން ކަމަށް އޭނާ ވަނީ ބުނެފަ އެވެ.

ޓީމުގައި ތިބި ކުޅުންތެރިންނާއެކު ފަށާއިރު ރަނފަޅު ފަރިތަކުރުންތަކެއް ނުލިބުމުން އެކަމުގެ ގެއްލުން ދައްކާނެ ކަމަށް ޝާކިއްޓޭ ބުންޏެވެ. އެހެން ނަމަވެސް ސީޒަން ދިގު ލަައިގެންދާ ވަރަކަށް އެބައި ރަނގަޅުވާނެ ކަމަށެވެ. އެއީ ކުޅުންތެރިންނަކީ ޒުވާން ކުޅުންތެރިންނަށް ވުމުން، އެ ކުޅުންތެރިންނަށް ބޭނުންވަނީ ތަޖުރިބާ ކަމަށާއި، އެ ތަޖުރިބާ ލިބެމުންދާ ވަރަކަށް އެ ކުޅުންތެރިންގެ ހުނަރު ފެންނާނެ ކަމަށް، ޒުވާން ޤައުމީ ޓީމުގެ ވެސް ކޯޗުކަން ކުރަމުން އަންނަ ޝާކިއްޓޭ ބުންޏެވެ. އެހެންކަމުން އެ ކުޅުންތެރިންގެ ފަރާތުން އެހެން ޓީމުތަކަށް ވެސް ނުރައްކާ ކުރާނެ ކަމަށް ޤަބޫލު ކުރާ ކަމަށް ވެސް އޭނާ ވަނީ ބުނެފަ އެވެ.

ޓީމު ތައްޔާރުވެވުނު ގޮތާ ބަލާފައި، ޔޫވީގެ މެނޭޖުމަންޓުގެ އުންމީދުތައް ވެސް މަތި ނޫން ކަމަށް ޝާކިއްޓޭ ބުންޏެވެ. އެހެންކަމުން ކޯޗެއްގެ ހައިސިއްޔަތުން މާބޮޑު ޕްރެޝަރެއް އޮތެކޭ ނުބުނެވޭނެ ކަމަަށާއި، ނަމަވެސް ކޯޗުގެ ހައިސިއްޔަތުން މުބާރާތުގައި ރަނގަޅު ކާމިޔާބެއް ހޯދަން ބޭނުންވާ ކަމަށް ވެސް އޭނާ ފާހަގަކުރިއެވެ. އެގޮތުން ޒުވާން ޓީމެއް ގޮވައިގެން ނުކުންނައިރު، އެ ޓީމުން ކޮންމެވެސް ވަރެއްގެ ތަފާތެއް ދެއްކުމަކީ ވެސް ބޭނުންވާ ކަމެއް ކަމަށާއި ޔޫވީގެ ޒުވާން ކުޅުންތެރިންގެ ފަރާތުން ތަފާތެއް ފެނުނުކަން، ނުވަތަ އެ ކުޅުންތެރިންނަކީ މުސްތަޤުބަލުގައި މޮޅު ކުޅުންތެރިންނަށް ވާނެކަން ސަޕޯޓަރުންނާއި ބެލުންތެރިން ޤަބޫލު ކުރުމަކީ ވެސް ލިބޭނެ ހިތްހަމަ ޖެހުމެއް ކަމަށް ޝާކިއްޓޭ ވަނީ ބުނެފަ އެވެ.

މީގެ އިތުރުން ޝާކިއްޓޭ ބުނީ މެޗުގައި މާޒިޔާ އަށް އެތައް ފައިދާއެއް އޮންނާނެ ކަމަށެވެ. އެއީ މާޒިޔާ އިން މެޗުތަކެއް ކުޅެ، މުބާރާތެއް ކާމިޔާބުކޮށްފައި އޮތުމުން ކަމަށެވެ. ނަމަވެސް މެޗުތަކެއް ނުކުޅެ، މާޒިޔާ ކަހަލަ ޓީމަކާ ދެކޮޅަށް ނުކުންނައިރު ޔޫވީ އަށް އެތައް ގެއްލުންތަކެއް ހުންނާނެ ކަމަށް ވެސް އޭނާ ބުންޏެވެ.