ދިރާގު ދިވެހި ޕްރިމިއާ ލީގުގައި ޓީސީ ސްޕޯޓްސް ކުލަބާ ދެކޮޅަށް ކުޅުނު މެޗުން، ޔުނައިޓެޑު ވިކްޓްރީ (ޔޫވީ) މޮޅުވެއްޖެ އެވެ.

އަންގާރަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު ޔޫވީ އިން ކާމިޔާބު ކުރީ 4-1 އިންނެވެ. މެޗުގައި ޓީސީ އިން ލަނޑު ޖަހައި ކުރި ހޯދާފައި ވަނިކޮށް، ޔޫވީ އިން ވަނީ ފަހަތުން އަރައި ހަތަރު ލަނޑު ޖަހައިގެން މޮޅުވެފަ އެވެ.

މެޗުގެ ފުރަތަމަ ހާފުގެ ފަހު ވަގުތުގައި ޓީސީ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ އަލީ ރިޟްވާން އެވެ. ނަމަވެސް ދެ ވަނަ ހާފު ފަށައިގެން ތިން ވަނަ މިނެޓުގައި ޙުސެއިން ސުހާދު ސުހާން ޖެހި ލަނޑުން ޔޫވީ ވަނީ ނަތީޖާ ހަމަހަމަ ކޮށްފަ އެވެ.

އޭގެ ތިން މިނެޓު ފަހުން ސުހާދު ވަނީ ޔޫވީގެ ދެ ވަނަ ލަނޑު ޖަހައި މެޗުގައި އެ ޓީމަށް ލީޑު ނަގައިދީފަ އެވެ. ދެ ވަނަ ލަނޑު ޖެހިތާ ހަ މިނެޓު ފަހުން ސުހާދު ވަނީ ތިން ވަނަ ލަނޑެއް ޖަހަައި ހެޓްރިކް ހަމަކޮށްފަ އެވެ. އަަދި މެޗުގައި ޔޫވީ އިން އެ ޓީމުގެ ފަހު ލަނޑު ޖެހީ މެޗުގެ 84 ވަނަ މިނެޓުގަ އެވެ. އެ ލަނޑު އެ ޓީމަށް ޖަހައިދިނީ އިޝްފާއު މުޙައްމަދު ފިރާޤު އެވެ.

ލީގުގައި ޓީސީ އިން ކުޅުނު ފުރަތަމަ މެޗުގައި ވަނީ ނިއު ރޭޑިއަންޓް ސްޕޯޓްސް ކުލަބު އަތުން ބަލިވެފަ އެވެ. އަދި ޔޫވީގެ ފުރަތަމަ މެޗުގައި ވަނީ އޮޑި ސްޕޯޓްސް ކުލަބު އަތުން ބަލިވެފަ އެވެ. އެހެންވެ ދެ ވަނަ މެޗުގައި ޓީސީ ބަލިކޮށް، ޔޫވީ އިން މި ވަނީ އުންމީދެއް ހޯދައިފަ އެވެ.

ލީގުގައި ޔޫވީގެ ތިން ވަނަ މެޗުގައި އެ ޓީމު ނިކުންނާނީ މާޒިޔާ ސްޕޯޓްސް އެންޑް ރެކްރިއޭޝަންއާ ދެކޮޅަށެވެ. އަދި ޓީސީގެ ތިން ވަނަ މެޗުގައި ނިކުންނާނީ ކުލަބު ވެލެންސިއާއާ ދެކޮޅަށެވެ.