ޤަރުނަކަށްވުރެ ގިނަ ދުވަސްވީ ފާޚާނާއެއްގަ ފެންވާރާލުން: ތަޖުރިބާ ކޮށްލަން ކެރޭނެތަ؟

އިހުގެ އާދަކާދައާއި ދިރިއުޅުމަށް ލޯބި ކުރާ މީހުންގެ މެދުގައި މިހާރު އެންމެ މަޤުބޫލު ވަމުން އަންނަ އެއް މަންޒިލަކީ ހިބްރޫންގެ އަލް ނަޢީމް ހައްމާމްއެވެ. މި ތަނަކީ ތުރުކީ ޘަޤާފަތާ ގުޅިފައިވާ، އިހުގެ ހަނދާންތައް އާ ކޮށްދޭ ގޮތަށް މަރާމާތު ކޮށްގެން ދާދި ފަހުން ޚިދުމަތް ދޭން ފެށި، ފެންވަރާ ތަނެކެވެ. މިކަހަލަ ތަންތަނަށް ޢަރަބީން ކިޔާ އުޅެނީ ހައްމާމްއެވެ. މެދުއިރުމަތީގައި އެންމެ އިހުގައި ފެންވަރާ އުޅުނު ގޮތް ތަޖުރިބާކޮށްލަން ބޭނުންވާ ފަރާތްތަކަށް ހާއްސަކޮށްގެން މަރާމާތު ކުރި އަލް ނަޢީމު ހައްމާމް ހުޅުވީ 2022 ވަނަ އަހަރުއެވެ. މި ތަނަކީ 143 އަހަރުވެފައިވާ ހައްމާމެކެވެ.

8 ކޮޓަރީގެ މައްޗަށް އެކުލެވޭ އަލް ނަޢީމް ހައްމާމްގައި ސޯނާއެއްގެ އިތުރުން، އާވި ތެރަޕީ ދޭ ސްޓީމް ރޫމްއަކާއި، އަރާމު ކޮށްލާނެ ސަރަޙައްދެއްގެ އިތުރުން ކޮފީޝޮޕެއްވެސް ހުރެއެވެ. ތަފާތު އެކި ކަހަލަ މަސާޖުތަކުގެ އަރާމު ލިބިގަތުމުގެ ފުރުޞަތު، މެހެމާނުންނަށް އޮވެއެވެ. ބޭކިންގް ސޮޑާއާއި ލުނބޯހުތުގެ ސްކްރަބްތައް ތަޖުރިބާކޮށްލަންވެސް ލިބެއެވެ.

ހައްމާމްގެ ތަޖުރިބާ އަކީ ކޮންމެ މީހަކުވެސް އަޖުމަ ބަލާލުން ރަނގަޅު ކަމެއް ކަމަށް، ޚިދުމަތް ހޯދި މީހަކު ވަނީ ފާހަގަ ކޮށްފައެވެ.

އިބްރާހިމީ މިސްކިތާއި ދާދި ކައިރީގައި ހުންނަ އަލް ނަޢީމް ހައްމާމްގެ ތާރީޚަށް ބަލާއިރު، އެކި ފަހަރު މަތިން އެތަނުގެ ޚިދުމަތްތައް މެދުކަނޑާލިއެވެ. އެގޮތުން 2000 ވަނަ އަހަރު އިންތިފާޟާގެ ދުވަސްވަރު، ހައްމާމްއާ ގުޅިފައި އޮތް އަލް ޝުހާދާ މަގު ބަންދު ކުރުމުން އަލް ނަޢީމު ހައްމާމް ބަންދު ކުރިއެވެ. ހަމަ އެ ދުވަސްވަރު، އިޒްރޭލުގެ ވަޒަންވެރިން ވަނީ ހައްމާމްއަށް ބޮޑެތި ގެއްލުންތަކެއް ދީފައެވެ.

އަލް ނަޢީމު ހައްމާމްގެ ވެރިޔާގެ މަޤާމުގައި މި ވަޤުތު ހުރީ ސަމީރު ޤަސްރަވީއެވެ. ސަމީރު ފާހަގަ ކުރި ގޮތުގައި، މިފަދަ ގޮތަކަށް ހައްމާމް މަރާމާތުކޮށްގެން ހުޅުވުމުގެ އެންމެ ބޮޑު ބޭނުމަކީ، ހިބްރޫންގައި އޮތް ފަލަސްޠީނުގެ ރޫޙު ދިރުވާ އާލާ ކުރުމެވެ.

ހިބްރޫންގެ މައި ސިޓީއަކީ ބައި ކުރެވިފައި އޮތް ސިޓީއެކެވެ. 800 އެއްހާ ޔަހޫދީ ވަޒަންވެރިން ވެރިވެގަނެގެން އުޅޭ ހިބްރޫންގައި ދިރިއުޅޭ ފަލަސްޠީނު ރައްޔިތުންގެ ހަރަކާތްތަކަށް ފާރަލުމަށް، އިޒްރޭލުން ވަނީ އެ ސަރަޙައްދުގައި ޗެކްޕޮއިންޓްތައް ވަރުގަދަކޮށްފައެވެ. ކެމެރާތަކުގެ ޢަދަދު އިންތިހާއެވެ.  

2 ލައްކައެއްހާ މީހުންގެ އާބާދީއެއް އޮތް ހިބްރޫންއަކީ، ހުޅަނގު އައްސޭރީގެ އެންމެ ހައްސާސް ސިޓީތަކުގައި ގުނާލެވޭ ސިޓީއެކެވެ. ހިބްރޫންގައި ޔަހޫދީން ދިރިއުޅެމުންދަނީ ސަލާމަތީ ފިޔަވަޅުތައް އިންތިހާއަށް ވަރުގަދަކޮށްފައިވާ ސަރަޙައްދެއްގައެވެ.