ސާފް ކުލަބު ޗެމްޕިއަންޝިޕް: ކުޅޭނީ ހޯމް އެންޑް އަވޭ އުސޫލުން
8 މެއި 2023 | ހޯމަ 06:30ރާއްޖެ އަށް ދެ ޓީމު ބައިވެރިކުރަން ފުރުސަތު ލިބޭނެ
2018 ވަނަ އަހަރުގެ ސާފް ޗެމްޕިއަންޝިޕުގައި ރާއްޖޭން ކުޅުނު މެޗެއްގެ ތެރެއިން
ކުލަނުޖެހުނު ސާފް ކުލަބް ޗެމްޕިއަންޝިޕް ފަށަން އަންނަ އަހަރަށް އަނެއްކާ ވެސް އަމާޒު ޖަހައިފި އެވެ.
ހޮނިހިރު ދުވަހު ބޭއްވި ސާފްގެ އެގެޒެކްޓިވް ކޮމިޓީ ބައްދަލުވުމުގައި ނިންމާފައިބަނީ އަންނަ އަހަރުގެ މެދުތެރޭގައި މުބާރާތް ހޯމް އެންޑް އަވޭ އުސޫލުން ކުޅުމަށެވެ.
މި މުބާރާތުގައި އިންޑިޔާ އާއި ބަނގްލަދޭޝް އަދި ދިވެހިރާއްޖެ ކުރެ ކޮންމެ ގައުމަކަށް ދެ ކުލަބު ބައިވެރިކުރަން ފުރުސަތުދޭނެ އެވެ. ސާކް އެހެން ގައުމުތަކުންކުރެ ކޮންމެ ގައުމަކަށް ލިބޭނީ އެއް ޓީމުގެ ފުރުސަތެކެވެ.
ސާފްގެ ރައީސް އަދި ބަނގްލަދޭޝް ފުޓްބޯޅަ ފެޑަރޭޝަނުގެ ވެސް ރައީސް ޢާޒި ސަލާހުއްދީން ވިދާޅުވީ މީގެ 10 އަހަރު ކުރިން ބާއްވަން މަސައްކަތް ފެށި މުބާރާތް މިހާތަނަށް ވެސް ނުފެށިފައިވަނީ ސްޕޮންސަޝިޕް ނުލިބިގެން ކަމަށެވެ.
ސްޕޮންސަރުންގެ މައްސަލާގައި ސާފް ޗެމްޕިއަންޝިޕް ފުޓްބޯޅަ މުބާރާތް ވެސް ގަވާއިދުން ނުބޭއްވެ އެވެ. މި އަހަރު އިންޑިޔާގައި ބާއްވާ މުބާރާތުގައި ވެސް އަށް ގައުމު ހަމަނުވެ އެވެ. މިހެންވެ މުބާރާތުގައި ބައިވެރިވާނެ ސަރަހައްދުން ބޭރުގެ ދެ ވަނަ ގައުމެއް ހޯދުމަށް މިމަހުގެ 15 ވަނަ ދުވަހަށް އިންތިޒާރުކުރަން ވަނީ ނިންމައިފަ އެވެ. މިހާތަނަށް ދައުވަތު ދީފައިވަނީ ފިލިޕީންސާއި ސީރިއާ އާއި އިންޑޮނީޝިޔާ އާއި ސައޫދީއަރަބިއާ އާއި ޖޯޑަން އަދި މެލޭޝިޔާ އަށެވެ. ކުވޭތުން ވަނީ މި އަހަރުގެ މުބާރާތުގައި ބައިވެރިވާން ކަމުގެ ޔަގީންކަން ދީފަ އެވެ.
