ފުޓްބޯޅަ މަޝްވަރާއަށް ދާން ބަނގްލަދޭޝްއިން ޕާކިސްތާނަށް ވިސާ ނުދިނީތަ؟
8 މެއި 2023 | ހޯމަ 06:29ޕާކިސްތާން މީޓިންގައި ބައިވެރިވީ އޮންލައިންކޮށް
6 މެއި 2023ގައި ބޭއްވި ސާފްގެ އެކްސްކޯ މީޓިން
ހޮނިހިރު ދުވަހު ބަނގްލަދޭޝްގައި ނިމުނު ދެކުނު އޭޝިޔާގެ ފުޓްބޯޅަ ޖަމިއްޔާ (ސާފް)ގެ އެގްޒެކްޓިވް ކޮމިޓީގެ ބައްދަލުވުމަށް ބަންގްލަދޭޝް އަށް ދިއުމަށް ޕާކިސްތާނުގެ އޮފިޝަލުންނަށް ވިސާނުދީ ހިފަހައްޓައިފި އެވެ.
ސާކުގެ ހަތް ގައުމުގެ ތެރެއިން މި ކޮންގްރެންސް އަށް ބަނގްލަދޭޝް އަށް ދިޔައީ ބަނގްލަދޭޝްއާއެކު ހަތަރު ގައުމަކުންނެވެ. އަނެއް ތިން ގައުމަކީ އިންޑިޔާ އާއި ނޭޕާލް އަދި ބޫޓާން އެވެ. ޕާކިސްތާނުން ބައިވެރިވީ އޮންލައިންކޮށެވެ. އެއީ ޕާކިސްތާނުގެ ފުޓްބޯޅަ ފެޑަރޭޝަނުގެ އޮފިޝަލުންނަށް ވިސާގެ ކަންކަން ބަނގްލަދޭޝްއިން ހަމަޖައްސައިނުދިނުމުންނެވެ. ސްރީލަންކާއިން ނުދިޔައީ ފީފާއިން އެގައުމު ސަސްޕެންޑްކޮށްފައި އޮތުމުންނެވެ.
މިކަމާ ބެހޭ ގޮތުން ޕާކިސްތާނުން ވަނީ ކަންބޮޑުވުން ފާޅުކޮށްފަ އެވެ. އެ ގައުމުގެ ފުޓްބޯޅަ ފެޑަރޭޝަނުގެ މެމްބަރު ޝާހިރު ކޮކާރު ބުނީ "ފުޓްބޯޅަ އަކީ އެއްބައިވަންތަ ކުޅިވަރެއް،" ކަމަށާއި "ފުޓްބޯޅައިގެ ކަމެއްގައި "މިކަހަލަ އުނދަގޫތައް ކުރިމަތިވުމުން ވަރަށް ބޮޑަށް ހިތާމަކުރަން،" ކަމަށެވެ
އޭނާ ބުނީ މިފަދަ ކަންކަން ތަކުރާރުވާނަމަ ސަރަހައްދީ ފުޓްބޯޅައިގެ ބައްދަލުވުންތައް ބާއްވަންވާނީ ނިއުޓްރަލް ތަނެއްގައި ކަމަށެވެ. ވިސާގެ މައްސަލަ މިގޮތަށް ނިމުނުއިރު އަންނަ މަހު އިންޑިޔާގައި ބާއްވާ ސާފް ޗެމްޕިއަންޝިޕް ފުޓްބޯޅަ މުބާރާތަށް އިންޑިޔާ އަށްދާން ޕާކިސްތާނުގެ ފުޓްބޯޅަ ޓީމަށް ހުއްދަ ލިބޭނެ ކަމާމެދު ވެސް ވަނީ ޝައްކު އުފެދިފަ އެވެ.
