ގޯހެއް ނެތް: ބަދިގެއަށް ބާވިއަސް، ތެލިތަށީގައިވެސް ގަސް ހައްދަންވީ!

ގަސް އިންދައި ހެއްދުމުގެ މަސައްކަތުގައި ވަގުތު ހޭދަކުރުމަކީ ދިރިއުޅުމުގެ ހާސްކަމުގެ ކަސްތޮޅުތަކުން މިންޖުކޮށްދޭ ކަމެކޭ ބުނެއުޅެއެވެ. ކިތަންމެ ދަތި ހާލެއްގައި އުޅެން ޖެހުނު ކަމުގައި ވީނަމަވެސް، ގަސްތަކުގެ ތެރޭގައި ވަގުތުކޮޅެއް ހޭދަކޮށްލުމަކީވެސް ހިތަށް އުފާވެރިކަން ގެނެސްދޭ ކަމެކެވެ. ގަސް އިންދައި ހެއްދުމުގެ މަސައްކަތަށް ގިނަ ބައެއްގެ ހިތްޖެހޭ އެންމެ ބޮޑު އެއް ސަބަބަކީވެސް މިއީ ކަމުގައި ވެދާނެއެވެ. އަނެއް ބަޔަކު، މި ކަން ކުރަނީ، ވެއްޓަށް ޖެހިފައި އޮންނަ ލޯތްބެއްގެ ސަބަބުންނެވެ.

ހުރިހާ ކޮޅަކުން ފިއްތައިލެވި، އަމިއްލަ ވަޒަނުގައި ދާޚިލީ ހަނގުރާމައެއް ކުރަމުންދާ، ދުނިޔޭގެ އެންމެ ބޮޑު އަނގަމަތި ހާ ޖަލުގެ ގޮތުގައި ސިފަކުރާ ޣައްޒާގެ ރަށްވެހިންގެ މެދުގައިވެސް މިކަން އޮތީ މި ގޮތަށެވެ. ސަލަމާއާއި އަލާ ބިދްވާންއަކީ އެފަދަ ދެމަފިރިންނެވެ. ތޮއްޖެހިފައިވާ ޣައްޒާގައި އެ ދެމަފިރިން ދިރިއުޅެމުންދާ ގޭގެ ފުރާޅު މައްޗަކީ ހިތްގައިމު ބަގީޗާއެކެވެ. ވެއްޓާ ރައްޓެހި، ފެހި މަންޒިލެކެވެ.

އެކި ޒާތްޒާތުގެ މަށި މުށިތަކާއި، ދަޅުބުރިތަކާއި ޓަޔަރުތަކުގައި ގަސް އިންދައިގެން ފެހިކުރަމުންދާ މި ބަގީޗާ ހެއްދުމުގެ އަމާޒަކީ، ތިމާވެށި ހިމާޔަތްކުރުމެވެ. ތަފާތު އެކި ކަހަލަ ގަސްގަހާގެހީގެ ބާވަތްތައް، ބިދްވާންގެ ދެމަފިރިންގެ ބަގީޗާގައި އެބަހުއްޓެވެ. އޭގެތެރޭގައި، އެކި ކަހަލަ ކެކްޓަސްތައް ވެސް ހިމެނެއެވެ.

އުމުރުން 37 އަހަރުގެ އަލާ ފާހަގަކުރިގޮތުގައި ފުރާޅުމަތީގައި މި ގޮތަށް ބަގީޗާ ހެއްދުމަކީ ސާފު ވައި ލިބިދޭ ކަމެކެވެ. އަދި ޣައްޒާގެ ނުތަނަވަސް ފަޒާ، އުޖާލާ ކޮށްދޭ ކަމެކެވެ.

ބިދްވާންގެ ދެމަފިރިންގެ ފުރާޅު ބަގީޗާ ތަރައްގީކުރަމުންދަނީ ގޭތެރެއިން ލިބެން ހުރި އެއްޗެއް ބޭނުންކޮށްގެންނެވެ. ޚަރަދުގެގޮތުން ބަލާއިރުވެސް، މިއީ ބިނާ ކުރަނިވި ޚިޔާލެކެވެ.

ފަލަސްތީނުގެ އިމާރާތްތަކުގެ ފުރާޅުތައް އާންމުގޮތެއްގައި ބޭނުންކޮށް އުޅެނީ އާމްދަނީ ހޯދުމަށް ކޮންމެވެސް ބާވަތެއް އިންދައި ހެއްދުމަށް ކަމަށް ވީނަމަވެސް، 5 ދަރިން ތިބި ބިދްވާންގެ ދެމަފިރިންގެ މި މަސައްކަތުގެ ހުރިހާވެސް ކަމެއް ގުޅެނީ ތިމާވެއްޓާއެވެ. އުމުރުން 40 އަހަރުގެ ސަލަމާ ބުނާގޮތުން، ޕްލާސްޓިކުގެ ތަޣައްޔަރުކަމުން ވެށި ސަލާމަތްކުރުމާއެވެ.

ޣައްޒާއާ ގުޅިގެން މުޅިންހެންވެސް އަޑު އިވެމުން ދަނީ ކޮންމެވެސް ހަމަނުޖެހުންތަކަކާއި ހަނގުރާމަތަކެއްގެ ވާހަކަ ކަމުގައި ވީނަމަވެސް، ޣައްޒާއަށް ކުރިމަތިލާން ޖެހިފައިވާ ތިމާވެށީގެ މައްސަލަތަކަކީވެސް ކުޑަ ކަމެއް ނޫނެވެ. ވައިގެ ތަޣައްޔަރުކަމާއި، ބިމުގެ ފެންފަށަލަ ތަޣައްޔަރުވުމާއި، ވެލިގަނޑު ލޮނުވުމާއި، ފުރާނައަށް ގެއްލުން ދެނިވި ރޭޑިއޯ އެކްޓިވް މާއްދާތައް ހުރުމާއި، މީދަލުގެ އުނދަގޫ ބޮޑުވުމަކީ، ޣައްޒާއަށް ކުރިމަތިލާން ޖެހިފައިވާ ވެށީގެ މައްސަލަތަކުގެ ލިސްޓުން ކުޑަ މިންވަރެކެވެ. ކިތަންމެ ދިގުކޮށްވެސް މި ލިސްޓު ލިޔެވިދާނެއެވެ.