އިސްރާއީލާ އެކު ހަތިޔާރުގެ ވިޔަފާރި ކުރުން ހުއްޓާލި ފުރަތަމަ ވިލާތުގެ ގައުމަކަށް ސްލޮވީނިއާ
ސްލޮވީނިއާއިން އިސްރާއީލާއެކު ހަތިޔާރުގެ ވިޔަފާރީގެ މުއާމަލާތްތައް އެއްކޮށް މަނާކޮށް، ޔޫރަޕިއަން ޔޫނިއަން އިން އެފަދަ ފިޔަވަޅެއް އެޅި ފުރަތަމަ ޤައުމުގެ ގޮތުގައި ވެއްޖެއެވެ. ޣައްޒާގައި ހިނގަމުންދާ އިންސާނިއްޔަތާ ޚިލާފު ޢަމަލުތަކާ ގުޅިގެން، ޒިންމާދާރު ދައުލަތެއްގެ ހައިސިއްޔަތުން އެހެން ޤައުމުތަކަށްވުރެ ކުރިއަށް މިފިޔަވަޅު އަޅަން ޖެހުނީ ކަމަށް ވެސް އެ ގައުމުން ބުނެއެވެ.
ސްލޮވޭނިއާގެ ލިއުބްލިޖާނާގައި ހުންނަ ސަރުކާރުގެ އިމާރާތުގައި ސްލޮވޭނިއާގެ ދިދަ އާއި ޔޫރަޕިއަން ޔޫނިއަންގެ ދިދަ އަކާ ޖެހިގެން ފަލަސްތީނުގެ ދިދައެއް ނަގާފައި - މެއި 30، 2024 ގައެވެ.
ޣައްޒާގައި ހިނގަމުންދާ ހަނގުރާމައާ ގުޅިގެން އިސްރާއީލާއެކު ހަތިޔާރުގެ މުއާމަލާތްތައް ކުރުން އެއްކޮށް މަނާކުރަން ނިންމައިފި ކަމަށް ސްލޮވީނިއާ އިން ބުރާސްފަތި ދުވަހު ބުނެފިއެވެ.
އަދި މިއީ ޔޫރަޕިއަން ޔޫނިއަންގެ ޤައުމަކުން މިފަދަ ފިޔަވަޅެއް އަޅާ ފުރަތަމަ ފަހަރު ކަމަށް އެ ޤައުމުން ބުނެފައިވެއެވެ.
ސްލޮވީނިއާގެ ސަރުކާރުން މި ހަނގުރާމައާ ގުޅިގެން އިސްރާއީލަށް ފާޑުކިޔަމުން އައިސްފައިވެއެވެ. އަދި ވީހާވެސް އަވަހަކަށް ޣައްޒާ ގައި ހިނގަމުންދާ ހަނގުރާމަ ނިންމުމަށް ކުރެވޭ މަސައްކަތުގެ ތެރެއިން، ފާއިތުވި އަހަރު ފަލަސްތީނު ދައުލަތެއް ގަބޫލު ކުރުމަށް މަސައްކަތް ކޮށްފައިވެއެވެ.
"ސްލޮވީނިއާ އަކީ އިސްރާއީލަށް އަދި އިސްރާއީލުން ހަތިޔާރު އެތެރެކުރުމާއި، ބޭރުކުރުމާއި، ޓްރާންސިޓް ކުރުން މަނާކުރި ފުރަތަމަ ޔޫރަޕިއަން ޤައުމެވެ،" ސަރުކާރުން ބުރާސްފަތި ދުވަހުގެ ރޭ ނެރުނު ބަޔާނެއްގައި ބުނެފައިވެއެވެ.
އެ ބަޔާނުގައި ބުނެފައި ވަނީ، ޔޫރަޕިއަން ޔޫނިއަން ގެ "އެތެރޭގެ ޚިޔާލު ތަފާތުވުންތައް ހުރުމާއި އެއްބައިވަންތަކަން ނެތުމުގެ ސަބަބުން" ޔޫރަޕިއަން ޔޫނިއަނަށް "ވަކި ފިޔަވަޅުތަކެއް އެޅުމަށް ނުކުޅެދުމުގެ" ސަބަބުން އެ ޤައުމުން "މިނިވަންކަމާއެކު" މި ފިޔަވަޅު އަޅަމުންދާ ކަމަށެވެ.
ޣައްޒާ ގައި ހިނގަމުންދާ ނުރައްކާތެރި ހަނގުރާމައިގައި "އިންސާނީ އެހީ ފޯރުކޮށް ދިނުން އިންތިޒާމެއްގެ ތެރެއިން މަނާ ކުރެވިފައި ވުމުގެ ސަބަބުން މީހުން ... މަރުވަމުންދާ" ހިނދު، "އެހެން ބަޔަކަށްވުރެ ކުރިއަށް ފިޔަވަޅު އެޅުމަކީ ޒިންމާދާރު ކޮންމެ ދައުލަތެއްގެ ޒިންމާ އެއް" ކަމަށް ދެކޭ ކަމުގައި އެ ބަޔާނުގައި ބުނެފައިވެއެވެ.
މި ހަނގުރާމައާ ގުޅިގެން 2023 ވަނަ އަހަރުގެ އޮކްޓޯބަރު މަހުން ފެށިގެން އިސްރާއީލަށް ހަނގުރާމައިގެ ހަތިޔާރާއި އާލާތްތައް އެކްސްޕޯޓް ކުރުމުގެ އެއްވެސް ހުއްދައެއް ދޫކޮށްފައި ނުވާ ކަމަށްވެސް އެ ބަޔާނުގައި އިތުރުކޮށްފައިވެއެވެ.
ޖުލައި މަހުގެ ކުރީކޮޅު، ސްލޮވީނިއާ އިން އިސްރާއީލުގެ ހައްދުފަހަނަ އެޅި ކަނާތުފިޔައިގެ ދެ ވަޒީރުން އެ ޤައުމަށް ވަނުން މަނާކުރިއެވެ. މިއީ ވެސް ޔޫރަޕްގެ ގައުމަކުން މިފަދަ ފިޔަވަޅެއް އެޅި ފުރަތަމަ ފަހަރެވެ.
އެ ދެ ވަޒީރުންނަކީ "ޕަރސޯނާ ނޮން ގްރާޓާ" (ޤައުމަށް ވަނުން މަނާ ފަރާތްތައް) ކަމަށް އިޢުލާންކޮށް، އެ ދެ ފަރާތަކީ ނަސްލު ނައްތާލުމުގައި ބައިވެރިވާ އަދި "ފަލަސްތީނުގެ އިންސާނީ ޙައްޤުތައް އެކި ގޮތްގޮތުން ނިގުޅައިގަތުމާއި އިންތިހާ އަނިޔާވެރިކަން އުފެއްދުމަށް" ހިތްވަރުދޭ ދެ މީހުން ކަމަށް ތުހުމަތު ކޮށްފައި ވެއެވެ.
2024 ވަނަ އަހަރުގެ ޖޫން މަހުގައި، ސްލޮވީނިއާގެ ޕާލަމެންޓުން ފަލަސްތީނު ދައުލަތް ގަބޫލުކުރުމުގެ ޤަރާރެއް ފާސްކުރިއެވެ. މިއީ އަޔަލޭންޑް، ނޯވޭ އަދި ސްޕެއިންގެ ނިންމުންތަކާ އެއްގޮތަށް އެޅި ފިޔަވަޅެކެވެ.
