ޕީޕީއެމްގެ "ހިނި އަންނަނީ" ހަރާކާތުން އިދިކޮޅު ފަރާތްތަކުގެ ގާތަށް އައީ ހިނި!
ހިނި އަންނަނީ ނަމުގައި ބޭއްވި ޝޯގައި ބައިވެރިވީ މަދުބައެއް
"ހިނި އަންނަނީ" ޝޯގެ ތެރެއިން
ހިނި އަންނަނީ ނަމުގައި ޕީޕީއެމް އިން މިޔުޒިކް ޝޯއެއް ބާއްވައިފި އެވެ.
ހިނި އަންނަނީ ނަމުގައި ކެމްޕެއިނެއް ކޮށް މިރޭ ޕީޕީއެމް އިން ކުރިއަށް ގެންދިޔަ ހަރަކާތުގައި އޮތީ މިޔުޒިކް ބޭންޑެއްގެ ލަވަތަކެއް ހުށަހެޅުމެވެ. އަންހެން ފިރިހެން އަޑުން ލަވަކިޔާ ފިރިހެން ފަންނާނެއްގެ ލަވަ ހުށަހެޅިއިރު ބައެއް މީހުން ހީކިުރި ގޮތަކާއި ހިލާފަށް އާ ކަމެއް ނުހިނގަ އެވެ. އެމްޑީއޭ ޖަހަގަހައިގަ ގޮނޑިބަރި ޖަހާފައި ހުރިއިރު އެތަނަށް އެއްވި މީހުންވެސް ވަނީ ޝޯ ފެށުމާއެކު މަޑު މަޑުން ނިކުމެގެން ގޮސްފަ އެވެ. އަދި 21:30 ވާންވީއިރު އެތާ އެތެރޭގައި ތިބީ 30 ވަރަކަށް މީހުންނެވެ. އެކމަށް ގިނަ ބަޔަކު ދަނީ "ހިނި އަންނަނީ" އޭ ބުނެ ޖޯކް ޖަހަމުންނެވެ.
ރައްޔިތުންގެ މަޖިލީހުގެ ރައީސް އަބްދުﷲ މަސީހްގެ އިތުބާރު ނެތްކަމުގެ މައްސަލަ ހުށަހެޅުމަށްޓަކައި ރައްޔިތުންގެ މަޖިލީހުގެ 45 މެމްބަރުން ސޮއި ކުރެއްވިއިރު އޭގެ ތެރޭގައި ރައްޔިތުންގެ މަޖިލީހުގެ ޕީޕީއެމް މެމްބަރުން ހިމެނިވަޑައިގެންނެވި އެވެ. އަދި ޕީޕީއެމްގެ ތެރޭގައި ތިއްބެވި މެމްބަރުންތައް އިދިކޮޅި ސިޔާސީ ފަރާތްތަކާއި ގުޅެން ފެށުމާއެކު ޕީޕީއެމް އިން "ހިނި އަންނަނީ " ނަމުގައި ހަރަކާތެއް ބާއްވަން އުޅޭކަން އިއުލާން ކުރި އެވެ. އަދި ގިނަ ބަޔަކު ތިބީ ޕީޕީއެމް އިން ބާއްވަން ތައްޔާރުވި "ހިނި އަންނަނީ" ހަރާކަތް ކުރިއަށް ގެންދާ ގޮތް ބަލާލަން ބޭނުންވެފަ އެވެ.
ނަމަވެސް "ހިނި އަންނަނީ" ޝޯގައި އާންމު މެމްބަރުން އެހާ މަދުއިރު ޕީޕީއެމް އިސް މެމްބަރުންނާއި ސަރުކާރުގެ އިސް މަގާމުތަކުގެ ބޭފުޅުންވެސްނުދެ އެވެ. ރާއްޖެ ޓީވީގެ ނޫސްވެރިން އެތަނަށް ދިޔައިރު އެމްޑީޕީގެ ޓިކެޓްގައި ވެލިދޫ ދާއިރާގެ ގޮނޑި ކާމިޔާބު ކުރެއްވުމަށްފަހު ޕީޕީއެމްއާ ގުޅިވަޑައިގެންނެވި ޔާމިން ރަޝީދާއި ޖުމްހޫރީ ޕާޓީގެ ޓިކެޓްގައި ބިލެއްދޫ ދާއިރާގެ ގޮނޑި ކާމިޔާބު ކުރައްވުމަށްފަހު ޕީޕީއެމްއާ ގުޅިވަޑައިގެން އަހްމަދު މުބީން ހުންނެވި އެވެ.. އަދި މާފަންނު ދެކުނު ދާއިރާގެ މެމްބަރު އަބްދުﷲ ރިފާއު ވެސް ހުންނެވި އެވެ.
ގިނަ ބަޔަކު ހީކުރި ގޮތާ ހިލާފަށް ހާއްސަ ކަމެއް ނުހިނގާއިރު މެމްބަރު ޔާމިން ވިދާޅުވީ ތަފާތު ގޮތަކަށް މި ހަރަކާތް ކުރިއަށް ގެންދާއިރު ރައްޔިތުންނަށް އުފާވެރި ހަބަރުތައް ލިބޭނެ ކަމަށެވެ. އަދި ހަފްތާއެކު އެއް ފަހަރު މި ގޮތައް ޝޯ ބާއްވާނެ ކަމަށް އޭނާ ވިދާޅުވި އެވެ.
މި ހަރަކާތުގައި އެހާ މީހުން މަދުވެފައި، ހާއްސަ ކަމެއް އިއުލާން ނުކުރެވުމުން ސަރުކާރާ އިދިކޮޅު ފަރާތްތަކުން ބުނަނީ އެމީހުން ގާތައްވެސް ޕީޕީއެމް އިން ކުރި ކަމަކުން އަންނަނީ ހިނި ކަމަށެވެ.
އަދި ހިނި އަންނަންޖެހޭ އެހެން ސަބަބެއް އެބަ އޮތެވެ. މި އިވެންޓް ރޭވީ ޕީޕީއެމްއިން ކަމެއް، މެޑަމް ފާތުންގެ އޮފީހުން ކަމެއް، އެމްޑީއޭއިން ކަމެއް ނޭނގެ އެވެ. އެކަމުން ވެސް އަންނަނީ ހަގީގަތުގައި ހިންޏެވެ.
