ހުޅަނގު މޫސުމާއެކު، ދުރާލައި ރައްކާތެރިވުމުގެ ފިޔަވަޅު އެޅުމަށް އިލްތިމާސްކޮށްފި
4 މެއި 2023 | ބުރާސްފަތި 11:48ގަދަ ވައިގެ ސަބަބުން އެއްލާލައިފާނެ ތަކެތި ބަނދެ، ރައްކާތެރިކަމުގެ ފިޔަވަޅު އަޅަންޖެހޭ
މި ދުވަސްވަރު ކަނޑުތައް ވަރަށް ގަދަވާނެ
ރާއްޖޭގެ ސަރަހައްދުގައި ހުޅަނގު މޫސުމުގެ ބާރު ގަދަވެ މޫސުން ގޯސްވާތީ, ރައްޔިތުންގެ މުދަލާއި ގެދޮރަށް ލިބިދާނޭ ގެއްލުމަކުން ރައްކާތެރިވުމަށް ދުރާލައި މަސައްކަތްކުރުމަށް، ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ)އިން އިލްތިމާސްކޮށްފިއެވެ.
އެންޑީއެމްއޭއިން ބުނީ ރާއްޖޭގެ ސަރަހައްދުގައި ހުޅަނގު މޫސުމުގެ ބާރު ގަދަވެ، ކުރިއަށް އޮތް ހުކުރު އަދި ހޮނިހިރު ދުވަހު (ޚާއްސަކޮށް ދެކުނާއި މެދުރާއްޖެތެރޭގެ ސަރަހައްދުތަކަށް) ވައި ބާރުވެ، ކަނޑުތައް ގަދަވުމާއެކު ބައެއް ރަށްރަށަށް ބޯކޮށް ވާރޭވެހި, އަދި ބައެއް ރަށްރަށަށް އުދަ އެރުންވެސް އެކަށީގެންވާކަމަށް، މޫސުމާބެހޭ ގައުމީ އިދާރާއިން މައުލޫމާތުދޭކަމަށެވެ.
އާއްމު ރައްޔިތުންގެ މުދަލާއި ގެދޮރަށް ލިބިދާނޭ ގެއްލުމަކުން ރައްކާތެރިވުމަށް ދުރާލައި މަސައްކަތްކުރުމަށް އިލްތިމާސްކޮށް އެންޑީއެމްއޭއިން ބުނީ، ވާރޭވެހި ފެންބޮޑުވެދާނެ ކަމަށް ތައްޔާރުވުމާއި، ގެއަށް ފެން ނުވަންނާނެހެން ރައްކާތެރި ފިޔަވަޅު އަޅަންޖެހޭކަމަށެވެ.
އެގޮތުން ގޭގެ ދޮރުމަތީގައި ވެލިބަސްތާ ފަދަ ތަކެތި ޖެހުމާއި، ގޭތެރޭގައި ފެން ބޮޑުވެއްޖެ ހިނދެއްގައި ގެއްލުންވެދާނެ މުދާ، ފެން ނުޖެހޭފަދަ އުސްތަންތަނަށް ބަދަލުކުރުމާއި، އުސް ތަންތަނަށް ބަދަލު ނުކުރެވޭ ތަކެތި ފެނުގެ އަސަރު ނުފޯރާނެ ތަނަކަށް ބަދަލުކުރުމާއި، ގަދަ ވައިގެ ސަބަބުން ގޭގެ ފުރާޅު އެއްލައިލާފާނެ ކަމަށް ލަފާކުރެވޭނަމަ، ވައުފަދަ އެއްޗެއް ބޭނުންކޮށްގެން ފުރާޅު އެއްލައިނުލާފަދަ ގޮތަކަށް ހަރުކޮށް، އަދި ގަދަވައިގެ ސަބަބުން އެއްލައިލާފާނެ ތަކެތި ބަނދެ ރައްކާތެރިކަމުގެ ފިޔަވަޅު އަޅަންޖެހޭ ކަމަށެވެ.
މީގެ އިތުރުން އާއްމުކޮށް ބޭނުންނުކުރާ ކަރަންޓު އާލާތްތައް ނިއްވާލާފައި ބަހައްޓަންޖެހޭކަމަށާއި، ކަނޑު ދަތުރުކުރާ ފަރާތްތަކުން މޫސުމަށް ބަލައިގެން ދަތުރުކުރުމަށް ސަމާލުވުމާއި، އަދި ދަތުރަށް ނުކުންނައިރު ސަލާމަތީ ކަންކަމާއި މުވާސަލާތީ ނިޒާމް ފުރިހަމަކަން ޔަގީންކުރުމަށް އެންޑީއެމްއޭއިން އެދިފައިވެއެވެ.
އެންޑީއެމްއޭއިން ބުނީ މި ކަންކަމަށް ރަށު ފެންވަރުގައި ރައްޔިތުން ހޭލުންތެރިވެ ޚާއްސަ ސަމާލުކަމެއްދޭން ޖެހޭކަމަށެވެ.
ހުޅަނގު މޫސުމުގެ ބާރު ގަދަވެ މޫސުން ގޯސްވާތީ، ރައްޔިތުންގެ މުދަލާއި ގެދޮރަށް ލިބިދާނޭ ގެއްލުމަކުން ރައްކާތެރިވުމަށް ދުރާލައި މަސައްކަތްކުރުމަށް އެންޑީއެމްއޭއިން އިލްތިމާސްކޮށްފައިވާއިރު، ބޯކޮށް ވާރޭ ވެހުމުގެ ސަބަބުން އައްޑޫ ސިޓީގެ އެކި ސަރަހައްދުތަކުގައި ފެންބޮޑުވެ، ގެތަކަށް ގެއްލުންވާ ކަމަށް އައްޑޫ ސިޓީ ކައުންސިލުން ބުނެފައިވެއެވެ.
މޫސުމާބެހޭ ގައުމީ އިދާރާއިން ބުނީ، ބުދަ ދުވަހުގެ ރޭ 8:00ން ބުރާސްފަތި ދުވަހުގެ ހެނދުނު 8:00ށް އެންމެ ގިނައިން ވާރޭ ވެހިފައިވަނީ އައްޑޫ ސިޓީއަށް ކަމަށެވެ. އެގޮތުން ސ. ގަމަށް 70.4 މިލިމީޓަރުގެ ވާރޭ ވެހިފައި ވާރިއިރު، ސ. ހުޅުމީދޫއަށް 62.1 މިލިމީޓަރުގެ ވާރޭ ވެހިފައިވެއެވެ.
