ކެޔޮދޫ މިސްކިތަށް ގެއްލުން ދިން މީހާ ޝަރީއަތް ނިމެންދެން ބަންދު ކުރުމަށް އަމުރުކޮށްފި
26 އެޕްރީލު 2023 | ބުދަ 13:02ހައްޔަރުކުރީ 27 އަހަރުގެ ފިރިހެނެއް
ކެޔޮދޫ މިސްކިތުގެ ބިއްލޫރިގަނޑު ތަޅާލާފައި
ވ. އަތޮޅު ކެޔޮދޫ މިސްކިތަށް ގެއްލުން ދިން މައްސަލައެއްގައި ހައްޔަރުކުރި 27 އަހަރުގެ ދިވެހި ފިރިހެން މީހާ ޝަރީއަތް ނިމެންދެން ބަންދު ކުރުމަށް ކޯޓުން އަމުރުކޮށްފިއެވެ.
ކެޔޮދޫ މެޖިސްޓްރޭޓް ކޯޓުން އޭނާ ބަންދު ކުރުމަށް ނެރުނު އަމުރުގައި ވަނީ އދ.މަހިބަދޫ ފުލުހުންގެ މަރުކަޒަށް ގެންގޮސް އެތަނުގައި ބަންދު ކުރުމަށެވެ. އޭނާ މަހިބަދުއަށް ފޮނުވާލާފައިވަނީ ދިގު މުއްދަތަކަށް ބަންދުގައި ބަހައްޓާނެ އެކަށީގެންވާ ތަނެއް ވ.އަތޮޅުގައި ނެތުމުންނެވެ.
މިމަހުގެ 24 ވީ ހޯމަ ދުވަހު ކެޔޮދޫ މިސްކިތުގެ ބިއްލޫރިގަނޑު ތަޅާލާފައިވާ ކަމުގެ މައުލޫމާތު ފުލުހުންނަށް ލިބިފައިވެއެވެ. މިމައްސަލައާ ގުޅިގެން އެކަކު ހައްޔަރުކޮށްފައިވާއިރު، ހަތިމްތައް ވީދާލި މައްސަލައިގައި އެއްވެސް މީހަކު ހައްޔަރުކޮށްފައިނުވާ ކަމަށް އެރަށުގެ ކައުންސިލުން ބުނެއެވެ. ނަމަވެސް ކައުންސިލްގެ ފަރާތުން މިހާރު އެމައްސަލަ ވަނީ ފުލުހުންނަށް ހުށަހަޅާފައެވެ. ކައުންސިލުން ބުނީ ހަތިމްތައް ދެ ފަހަރެއްގެ މަތިން ވިދާލި ކަމަށާއި، އެ ދެފަހަރު ވެސް މިސްކިތަަށް ގެއްލުން ދީފައިނުވާ ކަމަށެވެ. އެހެންކަމުން ހައްޔަރުކުރި މީހާގެ މައްޗަށް އެ ތުހުމަތު ނުކުރެވޭ ކަމަށް ކައުންސިލުން ބުނެއެވެ.
ކެޔޮދޫގެ މިސްކިތްތަކުގައި ބަހައްޓާފައި ހުންނަ ހަތިމްތައް ވީދާ މައްސަލަ ބޮޑުވެފައިވާއިރު، މިމަހުގެ 22 ވަނަ ދުވަހުގެ ރޭގެ ވަގުތެއްގައި 22 ހަތިމެއް ވީދާލާފައިވެއެވެ. އަދި މިދިޔަ އަހަރުގެ ފަހުކޮޅު ވެސް އެރަށުގެ މިސްކިތެއްގައި ބަހައްޓާފައިހުރި 10 ހަތިމް ވީދާލާފައިވެއެވެ.
