ދާހިލީ ހަނގުރާމައެއް ކުރަމުންދާ ސޫދާންގައި ބަޔޮލޮޖިކަލް ކާރިސާއެއް ހިނގާފާނެކަމުގެ ބިރު ބޮޑުކަމަށް ދުނިޔޭގެ ސިއްހަތު ޖަމިއްޔާ އިން ބުނެފިއެވެ.

ދުނިޔޭގެ ސިއްހަތު ޖަމިއްޔާއިން މިއިންޒާރު ދީފައި ވަނީ އަންގާރަ ދުވަހުއެވެ.

އެޖަމިއްޔާއިން ވަނީ ހަނގުރާމައިގެ ސަބަބަުން ސޫދާންގެ ވެރިރަށް ޚާތޫމްގައި ހުންނަ ނެޝަނަލް ޕަބްލިކް ހެލްތު ލެބޯޓަރީއަށް ލެބޯޓަރީ ޓެކްނިޝަނުންނަށް މިހާރު އެކްސެސް ނުވެވޭކަމަށެވެ. މިއީ މީސިލްސް އާއި ކޮލެރާ ފަދަ ނުރައްކާތެރި ވައިރަސްތަކުގެ ޓެސްޓުތައް ކުރަމުންދާ ލެބޯޓަރީއެއްކަން އެޖަމިއްޔާއިން ފާހަގަކުރެއެވެ.

ލެބޯޓަރީގައި ހުރިތަކެތި ރައްކާތެރިކޮށް ބެހެއްޓޭނެ ގޮތް ހެދުމަށް، ޓެކްނީޝަނުން، ލެބޯޓަރީއަށް ވަންނަ ކުރާ މަސައްކަތްތައް ނާކާމިޔާބުވާ ކަމަށާއި، މިހާރު އެޓެކްނިޝަނުންނަށް ލެބޯޓަރީއަށް އެކްސެސް ނުވެވޭކަމުގެ ކަންބޮޑުވުން ދުނިޔޭގެ ސިއްހަތު ޖަމިއްޔާއިން ވަނީ ކޮށްފައެވެ.

ސޫދާންގެ އަސްކަރިއްޔާ އާއި އެގައުމުގެ ހަނގުރާމަވެރި ޖަމާއަތް، ރެޕިޑް ސަޕޯޓް ފޯރސެސް (އާރްއެސްއެފް) އާދެމެދު ހަނގުރާމަ ފަށާފައި ވަނީ އޭޕްރިލް 15 ވަނަ ދުވަހުއެވެ. މިހަމަލާ ބަދަލުކުރުންތަކުގައި 450ށް ވުރެ ގިނަ މީހުން މަރުވެ، 4،000ށް ވުރެ ގިނަ މީހުން މަރުވެފައިވާކަމަށް ދުނިޔޭގެ ސިއްހަތު ޖަމިއްޔާގެ އެންމެ ފަހުގެ ތަފާސްހިސާބުތައް ދައްކައެވެ.

މިހަމަލާ ބަދަލުކުރުންތަކުގެ ސަބަބުން އެގައުމުގައި އާންމުނަށް ހިދުމަތްދޭ ގިނަ އިދާރާތެއްގެ ހިދުމަތްތައް ވަނީ ހުއްޓިފައެވެ. މީގެތެރޭގައި ގިނަ އަދަދެއްގެ ހޮސްޕިޓަލްތައްވެސް ހިމެނއެވެ. އަސާސީ ހިދުމަތްތައް ފޯރުކޮށްދިނުމަށް ދިމާވެފައިވާ ގޮންޖެހުންތަކުގެ ސަބަބުން ގިނަ އަދަދެއްގެ ބަޔަކު ވަނީ ކާނާ އާއި ފެން އަދި ކަރަންޓާ ނުލައި ގެތަކުގައި ތާށިވެފައެވެ.

އދ އިން އެގައުމުގައި ފޯރުކޮށްދެމުން އައި އިންސާނީ އެހީތެރިކަން ފޯރުކޮށްދިނުމަށްވެސް މިހާރު ހުރަސްއެޅިފައިވާކަމަށް އެޖަމިއްޔާއިން ފާހަގަކުރެއެވެ.

އދ އިން މައުލޫމާތުދޭގޮތުގައި ހަނގުރާމަ ފެށުނު ފަހުން ސޫދާންގައި އިންސާނީ އެހީތެރިކަން ފޯރުކޮށްދިނުމަށް މަސައްކަތްކުރަމުންދިޔަ ފަސް މީހަކު ވަނީ މަރުވެފައެވެ. މިއާއެކު މި ސްޓާފުން ނިސްބަތްވި ދެ ޖަމިއްޔާ ކަމަށްވާ އިންޓަނޭޝަނަލް އޯގަނައިޒޭޝަން ފޮރ މައިގްރޭޝަން އަދި ވޯލްޑް ފުޑް ޕްރޮގްރާމުން ވަނީ އެޖަމިއްޔާތަކުން ސޫދާންގައި ކުރިއަށްގެންދާ ހަރަކާތްތައް މަޑުޖައްސާލާފައެވެ.

އެޖަމިއްޔާތަކުން ވަނީ ހަމަލާ ބަދަލުކުރުންތައް ވަރުގަދަ ސަރަހައްދުތަކުގައި ކުރިއަށް ގެންދަމުންދިޔަ އިންސާނީ އެހީތެރިކަން ފޯރުކޮށްދޭ އޮޕަރޭޝަންތައް މަޑުޖައްސާލަން މަޖުބޫރުވެފައިވާކަން ފާހަގަކޮށްފައެވެ. އެހެން ނަމަވެސް ސޫދާންގެ އާންމު ރައްޔިތުންނަށް ބޭނުުންވާ އެހީތެރިކަން ފޯރުކޮށްދިނުމަށް މަސައްކަތްކުރާނެ ކަމަށް ޖަމިއްޔާތަކުން ބުނެއެވެ.

މީގެ އިތުރުން ޖަމިއްޔާތަކުން ދަނީ ހަނގުރާމަ ހުއްޓާލައި، މިކަމަށް ދާއިމީ ހައްލެއް ގެނައުމަށް ސޫދާނަށް ޕްރެޝަރުކުރުމަށް ގައުމުތަކަށް ގޮވާލަމުންނެވެ.

ސުދާންގައި ދިރިއުޅެމުންދިޔަ އެތައް ހާސް ބަޔަކު، ރެފިއުޖީންގެ ގޮތުގައި ހިޖުރަކުރަން ފަށާފައިވާއިތީ އެމީހުންނަށް އެހީ ފޯރުކޮށްދިނުމަށް ވާންޖެހޭ ތައްޔާރީތައް އދގެ ރެފިއުޖީންނާ ބެހޭ އެޖެންސީން ވަމުންދާކަމަށް އެޖަމިއްޔާއިން ފާހަގަކުރެއެވެ.

އެގޮތުން، ދެކުނު ސޫދާނުން ސޫދާނަށް ދިރިއުޅުން ބަދަލު ކުރި، ރެފިއުޖީންވެސް ވަނީ އަނބުރާ ދެކުނު ސޫދާނަށް ދާން ފަށާފައެވެ.

އަދ އިން ބުނާ ގޮތުގައި އެޖަމިއްޔާއިން ދަނީ ދެކުނު ސޫދާނުން ސޫދާނަށް ދިރިއުޅުން ބަދަލުކުރި މީހުންގެ ތެރެއިން 125،000 އެއްހާ މީހުން އަލުން އަނބުރާ ދެކުނު ސޫދާނަށް ދެވޭނެ ގޮތް މަގުފަހިކޮށްދިނުމުގެ މަސައްކަތާއި، ސޫދާންގެ 45،000 ރެފިއުޖީންނަށް ބޯޑަރު ހުރަސްކުރުމުގެ މަގުފަހިކޮށްދިނުމުގެ މަސައްކަތްކުރަމުންނެވެ.

މިކަމުގައި އެންމެ ބޮޑަށް އިސްކަންދެވޭނީ ދެކުނު ސޫދާނުން ސޫދާނަށް ދިރިއުޅުން ބަދަލުކުރި ރެފިއުޖީންނަށް ކަމަށާއި މިހާތަނަށް އައި އިރު، 10،000 ރެފިއުޖީން އަނބުރާ ދެކުނު ސޫދާނަށް ގޮސްފައިވާކަމަށް އދ އިން ފާހަގަކުރެއެވެ.