ރޮހިންޖާ މުސްލިމުންގެ މައްސަލައަކީ ގަބޫލު ކުރެވޭނެ ކާރިސާއެއް ނޫން: އިނގިރޭސި ވިލާތް

ރޮހިންޖާ މުސްލިމުންގެ މައްސަލައަކީ "ގަބޫލު ކުރެވޭނެ ކާރިސާ"އެއް ނޫން ކަމަށާއި މިޔަންމާގެ ލީޑަރު އަން ސަން ސޫޗީގެ ސަރުކާރުން ހަމަނުޖެހުން ހުއްޓުވުމަށް މަސައްކަތް ކުރަން ޖެހޭނެ ކަމަށް އިނގިރޭސި ވިލާތުން ބުނެފިއެވެ.

މިޔަންމާ އަށް ކުރެއްވި ދަތުރުފުޅެއްގައި، އިނގިރޭސި ވިލާތުން އޭޝިޔާ އަށް ކަނޑައަޅުއްވާފައިވާ މިނިސްޓަރު މާކް ފީލްޑް ބުރާސްފަތި ދުވަހު ވިދާޅުވީ ހާލުގައި ޖެހިފައިވާ ރޮހިންޖާ މުސްލިމުންނަށް އެހީދިނުމަށް އޮތް ހުރަސްތައް ނައްތާލަން ޖެހޭނެ ކަމަށެވެ.

ފާއިތުވި ހަފްތާތަކުގެތެރޭގައި މިޔަންމާގެ ރަކައިން ސްޓޭޓުގައި ހިނގައި ދިޔަ ކަންކަމަކީ އެއްގޮތަކަށް ވެސް ގަބޫލުކުރެވޭނެ ކާރިސާއެއް ނޫން ކަމަށާއި، ހަމަނުޖެހުން މިހާރުން މިހާރަށް ހުއްޓެން ޖެހޭ ކަމަށް އޭނާ ވިދާޅުވިއެވެ. އަދި ހަމަނުޖެހުމުން ސަލާމަތްވުމަށް ރަކައިން ސްޓޭޓް ދޫކޮށް ދިޔަ ފަރާތްތަކަށް އަނބުރާ އެބައި މީހުންގެ ގޯތިގެދޮރަށް ރައްކާތެރިކަމާ އެކު އާދެވެން ޖެހޭނެ ކަމަށެވެ.

މާކް ފީލްޑް ވިދާޅުވީ މިޔަންމާ އިން ފާއިތުވި އަހަރުތަކުގެ ތެރޭގައި ކުރިއެރުންތަކެއް ހޯދައިފައިވާ ކަމަށާއި އެހެެންނަމަވެސް ރަކައިން ސްޓޭޓުގައި ހިނގަމުންދާ ހަަމަނުޖެހުންތަކުގެ ސަބަބުން މިޔަންމާގެ ކުރިއެރުމަށް ހުރަސްތަކެއް ކުރިމަތިވެފައިވާ ކަމަށެވެ.

އިނގިރޭސި ވިލާތުން އޭޝިޔާ އަށް ކަނޑައަޅުއްވާފައިވާ މިނިސްޓަރު މާކް ފީލްޑް މިޔަންމާއަށް ކުރެއްވި ދަތުރުފުޅުގައި ވަނީ މިޔަންމާގެ ލީޑަރު އަން ސަން ސޫޗީއާ ބައްދަލު ކުރެއްވުމުގެ އިތުރަށް ރޮހިންޖާ މުސްލިމުންނަށް ނިކަމެތިކަން ލިބެމުންދާ ރަކައިން ސްޓޭޓަށް ވެސް ޒިޔާރަތް ކުރައްވާފައެވެ.

އޯގަސްޓް މަހު ފަހުކޮޅުން ފެށިގެން މިޔަންމާގެ އަސްކަރިއްޔާ އިން ވަނީ މިޔަންމާގެ ރޮހިންޖާ މުސްލިމުންނާ ދެކޮޅަށް އާ އޮޕަރޭޝަނެއް ފަށާފައެވެ. މިޔަމަންމާގެ މުސްލިމުންނާ ދެކޮޅަށް އެގައުމުގެ ސަރުކާރުން ބާރުދީގެން، އަސްކަރިއްޔާއިން ދަނީ ބާރުގެ ބޭނުންކޮށް، މުސްލިމުން ގެދޮރުން ފައްސާލައި، ބައެއް މީހުން މަރައި، އަދި އަންހެން ކުދިންގެ އިއްފަަތް ފޭރިގަންނަމުންނެވެ. މިޔަންމާގެ އަސްކަރިއްޔާ އިން ފަށާފައިވާ އޮޕަރޭޝަނާ ބެހޭ ގޮތުން އދ. އިން ބުނެފައި ވަނީ "ނަސްލެއް ނައްތާލުމުގެ" އޮޕަރޭޝަނެއް ކަމަށެވެ.

މިޔަންމާ މީހުން ދެކޭ ގޮތުގައި ރޮހިންޖާ މުސްލިމުންނަކީ އެގައުމުގެ މީހުންނެއް ނޫނެވެ. އެއީ ބަންގްލަދޭޝް އިން ވަގަށް އެތެރެވެގެން އުޅޭ ބައެކެވެ. އެހެން ކަމުން އެމީހުންނަކީ އެކަހެރި ކުރެވި، އެންމެ އަސާސީ ހައްގުތަކުންވެ ސް މަހްރޫމް ކުރެވިފައިވާ ބައެކެވެ. އޯގަސްޓް މަހު ފަހުކޮޅުން ފެށިގެން މިޔަންމާގެ އަސްކަރިއްޔާ އިން ހިންގާ ލާއިންސާނީ އަމަލުތަކުން ސަލާމަތްވުމަށް މިހާތަނަށް 400،000 އަށް ވުރެ ގިނަ ރޮހިންޖާ މުސްލިމުން ބަންގްލަދޭޝްއަށް ހިޖުރަކޮށްފައި ވެއެވެ