ތޫފާން ހާވީގައި އިންތިހާއަށް ފެންބޮޑުވުމުގެ ބިރު ބޮޑުކަމަށް ގަވަރނަރ ވިދާޅުވެއްޖެ

ތޫފާން ހާވީ އާއްމު ކޮޅިގަނޑަކަށް ބަދަލުވެ ބޯކޮށް ވާރޭވެހި އިންތިހާއަށް ފެންބޮޑުވުމުގެ ބިރު އެބަ އޮތް ކަމަށް ޓެކްސަސްގެ ގަވަރނަރ ގްރެގް އެބޮޓް ވިދާޅުވެއްޖެއެވެ.

އެބޮޓް ވިދާޅުވީ ހިއުސްޓަންއާއި ކޯޕަސް ކްރިސްޓީއަށް މިހާރުވެސް 20 އިންޗިއަށް ވާރޭވެހިފައިވާކަމަށެވެ. އަދި ކޮޅިގަނޑު ދާނީ ހަފްތާގެ މެދެއްހާ ހިސާބުގައި ކަމަށް ލަފާކުރެވިފައިވާއިރު އިތުރު 40 އިންޗިއަށް ވާރޭވެހޭނެ ކަމަށް ލަފާ ކުރެވިފައިވާކަމަށެވެ.

ގަދަ ވައިގެ ސަބަބުން ރެސްކިއު މަސައްކަތަށް ހުއްޓުން އަރާފައިވާއިރު އެތައްހާސް ބަޔަކު ތިބީ ކަރަންޓުގެ ޚިދުމަތުން މަހުރޫމުވެފައެވެ.

މިހާތަނަށް އެކަކު މަރުވެފައިވާކަމަށް ކަށަވަރު ކުރެވިފައިވާއިރު އޭނާ މަރުވެފައިވަނީ ރޮކްޕޯޓުންނެވެ.

އެމެރިކާގެ ހަތަރުވަނައަށް އެންމެ ބޮޑު ސިޓީކަމަށްވާ ހިއުސްޓަން ހޮނިހިރު ދުވަހުގެރޭ ގަޑިއެއްހާއިރު ތެރޭ ދޭއް ނުވަތަ ތިން އިންޗީގެ ވާރޭވެހިދާނެކަމަށް މޭޔަރ ސިލްވެސްޓަރ ޓަރނަރ ވަނީ ވިދާޅުވެފައެވެ.

ހިއުސްޓަންގެ ބްރޭޒަސް ކޯރުގެ ފެންގަނޑު ބޮޑުވަމުންދާތީ ގާތްގަނޑަކަށް 4،500 ގައިދީއަކު އެހެން ޖަލަކަށްވަނީ ބަދަލުކޮށްފައެވެ.

ތޫފާން ހާވީ ޓެކްސަސްއަށް އަރާފައިވަނީ ކެޓަގަރީ ހަތަރެއްގެ ތޫފާނެއްގެ ގޮތުގައެވެ. ނަމަވެސް ހޮނިހިރު ދުވަހުވަނީ ތޫފާންގެ ބާރުދަށްވެ މޫސުމީ ކޮޅިގަނޑަކަށް ކެޓަގަރީ ދަށްކޮށްފައެވެ.