ސައުދީގައި އަންހެން ޑްރައިވަރުންނަށް ބިރު ދައްކާނެ ކަމަށް ބުނި ފިރިހެނަކު ހައްޔަރު ކޮށްފިއެެވެ.
ސައުދީ ރަސްގެފާނުގެ ޚާއްސަ ގަރާރަކުން މިހާރު ވަނީ އަންނަ އަހަރުގެ ޖޫން މަހުން ފެށިގެން އެ ގައުމުގެ އަންހެނުންނަށް ކާރު ދުއްވުމުގެ ހުއްދަ ދީފަ އެވެ. މި ނިންމެވުމަށް ގިނަ ބަޔަކު ތައުރީފް ކުރި ނަމަވެސް ބައެއް މީހުން ދަނީ އެކަމަށް ފާޑު ކިޔަމުންނެވެ.
ސައުދީގެ ދާހިލީ ވުޒާރާއިން ކޮށްފައިވާ ޓްވީޓެއްގައި ބުނެފައި ވަނީ، އެމީހާ ހައްޔަރުކޮށް ދައުވާ ކުރުމަށް ފޮނުވާފައިވާ ކަމަށެވެ. އެހެން ނަމަވެސް އެމީހާގެ ވަނަވަރެއް އަދި ހާމައެއް ނުކުރެއެވެ. ކާރު ދުއްވާ އަންހެނުންނަށް ބިރު ދައްކާނެ ކަމަށް ބުނި މީހާ ހައްޔަރު ކުރީ އީސްޓަން ޕްރޮވިންސުންނެވެ.
ހައްޔަރުކުރި ފިރިހެންމީހާ މި އިންޒާރު ދީފައިވަނީ ވީޑިއޯ މެސެޖެއް މެދުވެރިކޮށްގެންނެވެ.
"ހުވާކޮށްފައި މި ބުނަނީ ކާރު ދުއްވާ އަންހެނުން އެ މީހުންގެ ކާރާ އެކު އަންދާލާނަން،" ކުރު ވީޑިއޯއެއްގައި އެ މީހާ ބުނެފައިވެ އެވެ. އެ ވީޑިއޯގައި އޭނާ ބުނެފައިވެއެވެ.
ސައުދީގެ މީޑީއާތަކުން ބުނެފައި ވަނީ ހައްޔަރުކޮށްފައި ވަނީ އުމުރުން20 އަހަރުގެ މީހެއް ކަމަށެވެ. އަދި އެ މީހާ ހައްޔަރު ކުރަން އަންގާފައި ވަނީ އީސްޓަން ޕްރޮވިންސްގެ ގަވަރުނަރު ކަމަށް ވެސް މީޑިއާތަކުން ބުނެފައިވެއެވެ.
