ޕޯޗުގަލްގެ ޖަންގަލީގައި ރޯވުން: ގަދަވަޔާ ހޫނުގެ ސަބަބުން އަލިފާން އިތުރަށް ފެތުރިދާނެކަމުގެ ބިރުހީވެއްޖެ

ގަދަ ވަޔާއެކު ހޫނުމިން އިތުރަށް މައްޗަށް ދަމުންދާތީ ޕޯޗްގަލްގެ ޖަންގަލިތަކުގައި ރޯވެފައިވާ އަލިފާންގަނޑު ކޮންޓްރޯލް ކުރުމަށް ކުރަމުންދާ މަސައްކަތުގައި ބިރު ހީވެފައިވާކަމަށް އެ ގައުމުގެ އޮފިޝަލުން ބުނެފިއެވެ.

މިހަފްތާގައި ހޫނުމިން އެންމެ މަތިވާނެ ކަމަށް ބެލެވެނީ އަންގާރަ ދުވަހު ކަމަށްވާއިރު އެ ދުވަހު ހޫނުމިން ހުންނާނެކަމަށް ބެލެވެނީ 38 ޑިގްރީ ސެލްސިއަސްގައެވެ.

ގަދަ ހޫނުގައި ބާރަށް ވައިޖެހެމުން ދިއުމުން މިހާރުވެސް ފެތުރިފައިވާ އަލިފާން އިތުރު ސަރަހައްދުތަކުގައި ރޯވުމުގެ ފުރުސަތުވަނީ ބޮޑުވެފަައެވެ.

އަލިފާނުގެ ހާދިސާގައި ހޮނިހިރު ދުވަހުން ފެށިގެން މިހާތަނަށް 64 މީހުން ވަނީ މަރުވެފައެވެ.

ސިވިލް ޕްރޮޓެކްޝަން އޮފިޝަލުން ވިދާޅުވީ އަލިފާން ގަނޑުގެ 70 ޕަސެންޓް ކޮންޓްރޯލް ކުރެވިފައިވާ ކަމަށާއި ނަމަވެސް ކޮންޓްރޯލް ނުވާ ބައި އިތުރަށް ފެތުރިދާނެކަމުގެ ބިރު އެބަ އޮތްކަމަށެވެ.

މި ހާދިސާތަކުގައި އެންމެ ފަހުން މަރުވެފައިވަނީ ފަޔަރފައިޓަރ އެއްކަމަށްވާއިރު އޭނާ މަރުވެފައިވަނީ ހޮސްޕިޓަލުގައެވެ.

އެތައް ބަޔަކު މަރުވެފައިވަނީ ކާރުތެރޭގައި ތާށިވެގެންނެވެ. އަލިފާނުގެ ހާދިސާގައި ޒަޚަމްވި މީހުންގެ އަދަދު މިހާރުވަނީ 130 އަށްވުރެ އިތުރުވެފަައެވެ.

ޖަންގަލިތައް ހިމެނޭ ސަރަހައްދުގައި ސަރުކާރުން މިހާރުވަނީ ކުއްލިހާލަތު އިއުލާނުކޮށްފައެވެ.