ރެކްސް ޓިލާސަން އެއްވެސް އިރެއްގައި އިސްތިއުފާ ދެއްވާނަމޭ ވިދާޅުވެ ބިރު ނުދައްކަވާ: ރައީސް ޓްރަމްޕް

އެމެރިކާގެ ޚާރިޖީ ވަޒީރު ރެކްސް ޓިލާސަން އެއްވެސް އިރެއްގައި "އިސްތިއުފާ ދެއްވާނަމޭ ވިދާޅުވެ ބިރު ނުދައްކަވާ ކަމަށް" އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

ރައީސް ޓްރަމްޕް ކުރެއްވި ޓްވީޓެއްގައި އިތުުރަށް ވިދާޅުވީ ޓިލާސަންއާ ދެމެދު އޮންނަ ގުޅުމާ ބެހޭ ގޮތުން "އެންބީސީ" އިން ތައްޔާރުކޮށްފައިވާ ޚަބަރު ރިޕޯޓަކީ "ފޭކް ނިއުސް" ނުވަތަ ދޮގު ޚަބަރެއް ކަމަށެވެ.

ރައީސް ޓްރަމްޕް މިހެން ވިދާޅުވިއިރު "އެެންބީސީ" އިން ތައްޔާރުކޮށް ގެނެސްދިން ޓީވީ ރިޕޯޓެއްގައި ބުނީ މިއަހަރު ކުރީކޮޅު ޓިލާސަން އިސްތިއުފާ ދެއްވާ ހާލަތަށް ވަޑައިގެންނެވި ކަމަށާއި އެކަން އެހެން ދިމާވާން މެދުވެރިވީ ރައީސް ޓްރަމްޕް އާއި ޓިލާސަންއާ ދެމެެދު މައްސަލަތަކެއް ޖެހުމުގެ ސަބަބުން ކަަމަށެވެ. އިތުރަށް އެންބީސީ ރިޕޯޓުގައި ބުނީ ޖުލައި މަހު ޕެންޓަންގަންގައި ރައީސް ޓްރަމްޕް، ޓިލާސަން އާއި އަދިވެސް އެހެނިހެން ސީނިޔާ އޮފިޝަލުންނާ އެކު ބޭއްވި ބައްދަލުވުމެއްގައި ޓިލާސަންއާ މެދު ރައީސް ޓްރަމްޕް ކޯފާފުޅު އިސްކުރައްވާ "މޮޔައެކޭ" ވިދާޅުވި ކަމަށެވެ.

ޓިލާސަންއާ މެދު ނުތަނަވަސްކަމެއް ނެތް ކަމަށް ރައީސް ޓްރަމްޕް ވިދާޅުވިއިރު ޓިލާސަން ވެސް ވަނީ މި މޭރުމުން ވާހަކަ ދައްކަވާފައެވެ. ބުދަ ދުވަހު ޓިލާސަން ވިދާޅުވީ އެމަނިކުފާނު މަގާމުން އިސްތިއުފާ ދެއްވަން އުޅުއްވާ ވާހަކަ ދޮގު ކުރައްވާފައެވެ.

"އެންބީސީ" ޓީވީ ރިޕޯޓާއި ޓިލާސަންގެ ވާހަކަފުޅު މީޑިއާ އަށް ތިލަވިއިރު ދާދިފަހުން ޓިލާސަން އާއި ރައީސް ޓްރަމްޕާ މެދު ކުޑައިމީސްކޮށް ވާހަކަ ދައްކަވާފައިވާ ކަމަށް ބައެއް ފަރާތްތަކުން ތުހުމަތު ކުރެއެވެ. އެގޮތުން އުތުރު ކޮރެޔާގެ ނިއުކްލިއާ ޕްރޮގްރާމްގެ މައްސަލައިގައި މަޝްވަރާ ކުރެއްވުމަށް އެމެރިކާގެ ސެކްރެޓަރީ އޮފް ސްޓޭޓް ކުރައްވާ މަސައްކަތްޕުޅަކީ އެ މަނިކުފާނުގެ ވަގުތު ބޭކާރުކުރެއްވުން ކަމަށް ރައީސް ޓްރަމްޕް ވަނީ ވިދާޅުވެފައެވެ.