ކާބުލް އެއަރޕޯޓުގައި ބޮން ގޮއްވާލި އައިއެސްގެ ލީޑަރު މަރާލައިފި
26 އެޕްރީލު 2023 | ބުދަ 02:17ލީޑަރުގެ ނަމެއް އަދި ހާމައެއް ނުކުރޭ
ކާބުލް އެއަރޕޯޓުގައި އެމެރިކާ ސިފައިން
އަފްޣާނިސްތާނުގެ ކާބުލްގެ އެއަރޕޯޓުގައި 2021 ވަނަ އަހަރު ބޮން ގޮއްވާލުމުގެ ފަހަތުގައި ހުރި އިސްލާމިކް ސްޓޭޓް (އައިއެސް) ގެ އިސް ލީޑަރު މަރާލާފައިވާ ކަމަށް އެމެރިކާއިން ބުނެފިއެވެ.
އެމެރިކާ ސަރުކާރުން އެ ޤައުމުގެ ނޫސްތަކަށް ބުނެފައިވާ ގޮތުގައި އޭނާ މަރާލީ ތާލިބާނުންނެވެ. އޭނާ މަރާލާފައިވާކަން ހާމަކުރި ނަމަވެސް މިހާތަނަށް އެ މީހާގެ ނަމެއް އެމެރިކާއިން ހާމަކޮށްފައި ނުވެއެވެ.
އެމެރިކާ ސަރުކާރުން ބުނެފައިވާ ގޮތުގައި އޭނާ މަރާލާފައިވަނީ މި މަހުގެ ކުރީކޮޅުގައެވެ. އޭނާ މަރާލިކަން އެނގިފައިވަނީ އިންޓަލިޖެންސަށް ލިބުނު މައުލޫމާތުތަކުން ކަމަށް ވެސް ވަނީ ބުނެފައެވެ.
ކާބުލް އެއަރޕޯޓުގައި ބޮން ގޮއްވާލީ ތާލިބާނުގެ ބާރުގެ ދަށަށް އަފްޣާނިސްތާން ދިއުމާ ގުޅިގެން އެ ޤައުމު ދޫކޮށް ގިނަ ބަޔަކު ފިލަން އެއަރޕޯޓުގައި ތިއްބައެވެ. އެ ހަމަލާގައި 180 މީހަކު ވަނީ މަރުވެފައެވެ. މީގެ ތެރޭގައި އެމެރިކާ އަސްކަރިއްޔާގެ 13 މީހަކު ވެސް ހިމެނެއެވެ. މި ހަމަލާ ދީފައިވަނީ 26 އޮގަސްޓް 2021 ގައެވެ.
