މޯލްޑިވްސް މީޑިއާ ކައުންސިލް (އެމްއެމްސީ)ގެ އިންތިޚާބު 29 އޭޕްރީލްގައި ބޭއްވުމަށް ހޯމް މިނިސްޓްރީން ނިންމައިފި އެވެ.

ހޯމް މިނިސްޓްރީން ބުނީ މީޑިއާ ކައުންސިލުގެ ގާނޫނުގެ ދަށުން އެކުލަވާލާފައިވާ ކައުންސިލަށް 3 މެންބަރަކު އިންތިޚާބު ކުރަންޖެހޭކަމަށެވެ. އެއީ މީޑިއާ ތަމްސީލުކުރާ މެންބަރަކާއި އާންމު 2 މެމްބަރުންނެވެ.

މެންބަރުން ހޮވުމަށް ބާއްވާ އިންތިޚާބު އޮންނާނީ 29 އޭޕްރީލްވާ ހޮނިހިރު ދުވަހުގެ ހެނދުނު 10:00ން 11:00ށް ވެލާނާގޭގެ ތިރީގައިކަމަށްވެސް މިނިސްޓްރީން މައުލޫމާތުދެއެވެ.

މިނިސްޓްރީން ވަނީ މި އިންތިޚާބުގައި ވާދަކުރާ ކެންޑިޑޭޓުންގެ ލިސްޓު އާންމުކޮށްފައެވެ. އެގޮތުން މޯލްޑިވްސް މީޑިއާ ކައުންސިލް އިންތިޚާބުގައި ވާދަކުރުމަށް 6 ކެނޑިޑޭޓުން ޝަރުތުހަމަވާ ކަމަށް މިނިސްޓްރީ އޮފް ހޯމް އެފެއާޒުން ވަނީ ހާމަކޮށްފައެވެ. އެގޮތުން މިގޮތުން މީޑިއާ ކައުންސިލްގެ މީޑިއާގެ މެމްބަރުގެ މަގާމަށް ދެ ކެނޑިޑޭޓުން ވާދަ ކުރެއެވެ.

މީގެ އިތުރުން ކޮމިޝަންގެ އާންމުންގެ މެމްބަރުކަމުގެ މާގަމަށް 4 ކެނޑިޑޭޓުން ވާދަ ކުރާ ކަމަށް ހޯމް މިނިސްޓްރީން ވަނީ ބުނެފައެވެ. 

ކައުންސިލުގެ މެންބަރުންގެ މުއްދަތަކީ މީލާދީ 2 އަހަރެވެ. އަދި އެއްވެސް ފަރާތަކަށް ކައުންސިލުގެ މެންބަރުކަމުގައި ވިދިވިދިގެން 2 ދައުރު އަދާ ނުކުރެވޭނެއެވެ.