ކަންކަން ކުރަން ނޭނގޭ ނަމަ ކުރީ ސަރުކާރުގައި ތިބި މީހުން ގެނެސްގެން ނަމަވެސް ފްލެޓާއި ގޯތި ދިނުން އަވަސްކުރުމަށް, ނިމިދިޔަ ސަރުކާރުން ދޫކުރި ފްލެޓާއި ގޯތި ދިނުން ލަސްވާތީ މުޒާހަރާ ކުރަމުންދާ އާއްމުން ގޮވާލައިފިއެވެ.
އާއްމުގޮތެއްގައި މި މުޒާހަތާތައް ކުރަމުން ދަނީ ކޮންމެ ހުކުރު ދުވަހެއްގައެވެ. ހޮނިހިރު ދުވަހުގެ ރޭ އެ މުޒާހަރާކޮށްފައި ވަނީ ލޯޔަރަކާއި އެކު މުޒާހަރާކުރަން ނިންމާފައިވާތީ ކަމަށާއި ކަންދިމާކުރި ގޮތުން ފަހު ވަގުތު އޭނާ އަށް މުޒާހަރާގައި ބައިވެރި ނުވެވުނީ ކަމަށް މުޒާހަރާގެ ބައިވެރިން ވަނީ ބުނެފައެވެ. ލޮނުޒިޔާރަތްކޮޅުގައި އޮތް އެ މުޒާހަރާގައި ބައިވެރިވި އާއްމުން ވަނީ އާއްމުންގެ ހުރި ކަންބޮޑުވުންތައް ހިއްސާކޮށްފައެވެ. މުޒާހަރާތައް މެދު ނުކެނޑި ކުރަމުންދާއިރު ސަރުކާރުން އާއްމުންނަށް އިޖާބަ ނުދިނުމަކީ އާއްމުންނަށް ކުރާ މަލާމާތެއް ކަމަށް އާއްމުން ވަނީ ބުނެފައެވެ. މުޒާހަރާގައި ބައިވެރިވި އާއްމު މީހަކު ވަނީ މާލޭގެ ރައްޔިތުންނާއި މާލޭގައި ދަތި ހާލުގައި އުޅޭ މީހުންނަށް ރައީސް ޑރ. މުހައްމަދު މުއިއްޒު ދެއްވަނީ ބީރު ކަންފަތެއް ކަމަށެވެ. އަދި މިއީ ރައްޔިތުންނަށް ދެމުންދާ އަނިޔާއެއް ކަމަށާއި ކުޑަ ކުޑަ ކޮޓަރިތަކުގައި އާއްމުން ދިރިއުޅެނީ ވަރަށް ނިކަމެތި ހާލުގައި ކަމަށް އާއްމުން ވަނީ ބުނެފައެވެ. މި ސަރުކާރުން ގުޅީފަޅުން ގޯތި ދޭނެ ކަމަށް ވައުދުވި ނަމަވެސް 9 މަސް ދުވަސްވީ އިރު ވެސް އެކަމުގެ އަޕްޑޭޓެއް ނުލިބޭ ކަމަށް އޭނާ ވަނީ ބުނެފައެވެ.
ކުރީ ސަރުކާރޭ ނުކިޔާށޭ. ވެރިކަން ދީފިން. މަޖިލިސް ދީފިން. މާލެ ސިޓީ ކައުންސިލްގެ ގޮނޑިތައް ދީފިން. ދެން ކޮން ވާހަކަ އެއްތޯ؟ ކުރީ ސަރުކާރުގަ ތިބި މީހުން ގެނެސްގެން ވިޔަސް ދެން ފްލެޓް ދެއްވާ. ކުރަން ނޭނގެންޏާ އެ ބޭފުޅުން ކޮންސަލްޓެންޓުންގެ ގޮތުގައި ގެންނަަވައިގެން ނަމަވެސް މިކަން ކޮށްދެއްވާ.އާއްމު މީހެއް
ރާއްޖެއެމްވީ އާއި ވާހަކަދެއްކި އިތުރު މީހަކު ބުނެފައި ވަނީ ސަރުކާރުން މި މަސައްކަތް ލަސްކުރަނީ ގަސްތުގައި ކަމަށް ޤަބޫލުކުރެވޭކަމަށެވެ. އަދި ދައުލަތުގެ ބަޖެޓުގައި ނެތް ކަމަށް ބުނެ މި މަޝަރޫޢުތައް ކުރިއަށް ނުގެންގޮސް ރަސްމާލެ މަޝްރޫޢު ކުރިއަށް ގެންދިއުމަކީ އާއްމުން އެދޭ ގޮތެއް ނޫން ކަމަށް އޭނާ ވަނީ ބުނެފައެވެ. މީގެ އިތުުރުން ހައުސިން މިނިސްޓްރީން އާއްމުންނަށް ފިލައިގެން އުޅޭ ކަމަށް ބައެއް އާއްމުން ވަނީ ސިފަކޮށްފައެވެ. އާއްމުން މުޒާހަރާކުރުމަކީ މާބޮޑު ކަމެއް ނޫން ކަމަށް ސަރުކާރުން ދެކެމުންދާ ކަމަށާއި އެއީ ވަރަށް ލަދުވެތި ކަމެއް ކަމަށް އޭނާ ވަނީ ބުނެފައެވެ. މުޒާހަރާގެ ބައިވެރިން ދުވަހެއް ދުވަހަކަށް ވާނީ އިތުރުކަމަށާއި އާއްމުންގެ އަޑު ކަނޑުވާ ނުލެވޭނެ ކަމަށް އޭނާ ވަނީ ބުނެފައެވެ.
ފްލެޓާއި ގޯތީގެ މައްސަލައިގައި ސަރުކާރުން ޢަމަލުކުރާ ގޮތް ސާފު ނުވާ ކަމަށާއި ސަރުކާރުން އެ މައުލޫމާތު ނުދޭކަމަށް މުޒާހަރާގެ ބައިވެރިން ވަނީ ބުނެފައެވެ. މުޒާހަރާގެ ބައިވެރިން ވަނީ ހައުސިން މިނިސްޓަރ އަލީ ހައިދަރުގެ އިސްތިއުފާއަށް ގޮވާލާފައެވެ.
