ސަރުކާރުން ނޫސްވެރިކަމުގެ މިނިވަންކަމަށް ހުރަސް އަޅާތީ އެމްޑީޕީން ކަންބޮޑުވުން ފާޅުކޮށްފިއެވެ.

އެމްޑީޕީން އާއްމު ކުރި ނޫސް ބަޔާނެއްގައި ބުނެފައި ވަނީ ނޫސްވެރިންނާއި މީޑިއާތައް ސަރުކާރުގެ ކޮންޓްރޯލްގެ ދަށުން މަސައްކަތްކުރަންޖެހޭ ގޮތައް ހަދައި، ނޫސްވެރިކަމުގެ މިނިވަންކަމާއި ހިޔާލުފާޅުކުރުމުގެ މިނިވަންކަމަށް ހުރަސްއެޅުމަށް، ރައްޔިތުންގެ މަޖިލީހަށް ހުށަހަޅައިފައިވާ، މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަންގެ ބިލާ ގުޅޭ ގޮތުން، މީޑިއާތައް ތަމްސީލުކުރާ ފަރާތްތަކާއި، ނޫސްވެރިންގެ ޖަމިއްޔާ (މޯލްޑިވްސް ޖަރނަލިސްޓް އެސޯސިއޭޝަން) ގެ ބޭފުޅުންނާ އެ ޕާޓީން ބައްދަލުކޮށްފައިވާ ކަމަށެވެ. އެ ބައްދަލުވުމުން އެ ބިލާމެދު ނޫސްވެރިންގެ ހުރި ނުހަނު ބޮޑެތި ގިނަ ކަންބޮޑުވުންތަކެއް އެނގިފައިވާ ކަމަށް ވަނީ ބުނެފައެވެ.

އެގޮތުން ނޫސްވެރިންގެ ފަރާތުން ހިއްސާކުރި ކަންކަމުގެ ތެރޭގައި، އެންމެ ބޮޑު އެއް ކަންބޮޑުވުމަކީ، މީޑިއާތަކުގެ ރެގިއުލޭޓަރީ އިދާރާއެއްގެ ގޮތުގައި، މީޑިއާގެ ވޯޓާއެކު އިންތިހާބުވެގެން އެކުލަވައިލައިފައިވާ މިނިވަން މީޑިއާ ކައުންސިލް އުވާލުން ކަމަށާއި، ސަރުކާރުގެ ކޮންޓްރޯލް އޮންނަ ގޮތަށް އެކުލަވައިލާ މީޑިއާ ކޮމިޝަނަކަށް، މީޑިއާތައް ރެގިއުލޭޓްކުރުމުގެ ބާރު ދޭ ގޮތަށް އޮތުމަކީ މީޑިއާތަކުގެ ކަންބޮޑުވުމެއް ކަމަށް ވަނީ ބުނެފައެވެ. އެ ބަޔާނުގައި ބުނެފައި ވަނީ ބިލުގައި އޮތް ގޮތުންނަމަ، މި ކޮމިޝަނުގައި ހިމެނޭ 7 މެންބަރުންގެ ތެރެއިން 4 މެމްބަރުންނަކީ ސީދާ ރައީސުލްޖުމްހޫރިއްޔާ އައްޔަނުކުރާ މެންބަރުންކަން ފާހަގަކޮށްފައެވެ. މީގެ އިތުރުން، ކޮމިޝަންގެ ހިންގުމުގެ އެންމެ އިސް ފަރާތްތައް ކަމުގައިވާ ކޮމިޝަންގެ ރައީސް އަދި ނާއިބު ރައީސަކު ކަނޑައެޅުމުގެ ބާރުވެސް ދީފައިވަނީ ރައީސުލްޖުމްހޫރިއްޔާއަށްކަން ބަޔާނުގައި ފާހަގަކޮށްފައެވެ. ނޫސްވެރިކަމުގެ މިނިވަންކަން ކުރިއެރުވުމަކީ، މި ބިލުގެ އިސް އެއް މަގްސަދު ކަމަށް ބަޔާންކޮށްފައިވާއިރު، ބިލުގެ އެންމެހައި މާއްދާތަކެއް ފަރުމާކޮށްފައިވަނީ، ނޫސްވެރިންގެ މަސައްކަތުގައި އެފަރާތްތަކަށް އޮންނަ އެންމެހައި މިނިވަންކަމެއް ހަނިވެގެންދާ ގޮތަށް ކަމަށް އެމްޑީޕީން ވަނީ ބުނެފައެވެ.

ނޫސްވެރިން އަމަލުކުރަންޖެހޭ ސުލޫކީ މިންގަނޑާ ގުޅޭ ގޮތުން ބިލުގައި ހިމަނައިފައި ހުރި ކަންކަމުގެ ގޮތުގައި، މީހެއްގެ ހުރުމަތާއި، އިއްޒަތާއި ގަދަރަށް އުނިކަން އަންނަ ބަސްތައް ޝާއިޢުނުކުރުމާއި، ވަކި ފަރާތަކަށް ބުރަވުމެއްނެތި ހަބަރު ގެނެސްދޭން ޖެހޭނެ ކަމަށް ބަޔާންކޮށްފައި ހުރި މާއްދާތައް ސިފަކުރެވެނީ، ސަރުކާރުން ކުރާ ނޭދެވޭ ކަންކަމާއި ސަރުކާރަށް ފާޑުކިޔުން އަމާޒުވާ ގޮތަށް ގެނެސްދޭ އެއްވެސް ހަބަރެއް ފެތުރުނަނުދިނުމުގެ މަގްސަދުގައި ހިމަނައިފައިވާ މާއްދާތަކެއްގެ ގޮތުގަ ކަމަށް އެމްޑީޕީގެ ބަޔާނުގައި ވަނީ ބުނެފައެވެ. އަދި މީޑިއާ ކޮމިޝަނުން ނުރުހޭ ކޮންމެ ހިނދެއްގައި، މީޑިއާތަކާއި ނޫސްވެރިން ޖޫރިމަނާ ކުރެވޭ ގޮތަށް ބިލުގައި ހިމަނައިފައިވާ މާއްދާތަކަކީ ވެސް، ހިޔާލުފާޅުކުރުމުގެ މިނިވަންކަމަށް ކަނޑައެޅިގެން ހުރަސް އެޅުން ކަމަށް ސިފަކޮށްފައިވެއެވެ. މީގެ އިތުރުން ނޫސްތަކާއި މީިޑިއާތައް ބަންދުކޮށް، ޑިމޮކްރަސީގެ ހަތަރުވަނަ ބާރުގެ ގޮތުގައި ނޫސްވެރިންނާއި މީޑިއާތަކުން އަދާކުރަމުންދާ ދައުރު މުޅިން ނައްތައިލުމަށް ޓަކައި ހިމަނައިފައިވާ މާއްދާތަކެއްކަމަށް ފާހަގަކޮށްފައިވެއެވެ.

ރައްޔިތުންނާ ގުޅިފައިވާ ކަންކަމުގެ ހަބަރު، ހާމަކަމާއި ދެފުށްފެންނަ އުސޫލަކުން ރައްޔިތުންނާ ހިސާބަށް ފޯރުކޮށްދިނުމުގައްޔާއި ސަރުކާރާއި ރައްޔިތުންގެ މަންދޫބުން ޖަވާބުދާރީކުރުވުމުގައި ވެސް ނޫސްވެރިންނަކީ މުހިންމު ދައުރެއް އަދާކުރާ ބައެކެވެ. ޑިމޮކްރަސީގެ އުސޫލުތައް ނަގަހައްޓައި، ސަރުކާރަކުން މަސައްކަތްކުރަންވާނީ، ވީހާވެސް ފުޅާދާއިރާއެއްގައި ނޫސްވެރިކަމުގެ މަސައްކަތްކުރެވޭނެ ޖާގަ ތަނަވަސްކޮށްދިނުމަށް ކަމަށް ވާއިރު، މި ކަމުގެ، ނޫސްވެރިކަމުގެ ދާއިރާގައި ރާއްޖެ ހާސިލްކޮށްފައިވާ ކުރިއެރުމާއި ކާމިޔާބީތައް އެތަށް ގުނައަކުން ފަހަތަށް ސޮއްސައިިލާނެކަމުގެ ކަންބޮޑުވުންވެސް ނޫސްވެރިންގެ މެދުގައި އޮތްކަން ފާހަގަކުރެވެއެވެ.

މިއީ، ނޫސްވެރިކަމުގެ މިނިވަންކަން އިންތިހާ ދަރަޖައަށް ހަނިވެ، ނޫސްވެރިންގެ މަސައްކަތްތަކުގައި ގިނަ ގުނަ ގޮންޖެހުންތަކާ ކުރިމަލާންޖެހޭނެ ކަމެެއްކަން ނޫސްވެރިންގެ ވާހަކަތަކުން ފާހަގަވެފައިވާ ކަމަށް އެ ޕާޓީގެ ބަޔާނުގައިވެއެވެ. އެހެންކަމާއެކު، މި ބިލު އަނބުރައި ގެންދިއުމަށް އެމްޑޕީން ވަނީ ގޮވާލާފައެވެ.

ނޫސްވެރިންގެ ހުރި ކަންބޮޑުވުންތަކަށް ހައްލު ހޯދުމަށް ޓަކައި ޒިންމާދާރު އިދިކޮޅު ޕާޓީގެ ހައިސިއްޔަތުން، ކުރަންޖެހޭ އެންމެހައި މަސައްކަތެއް ކުރާނެ ކަމަށް ވެސް އެ ޕާޓީން ވަނީ ބުނެފައެވެ. އަދި މި ފުރުސަތުގައި، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީން ރައްޔިތުންނަށް ކަށަވަރުކޮށްދީފައިވާ އަސާސީ ހައްގުތައް ނެގެހެއްޓުމުގައްޔާއި، އަދި ވަކިން ހާއްސަކޮށް، ހިޔާލުފާޅުކުރުމާއި، ދުލާއި ގަލަމުގެ މިނިވަންކަމުގެ ދިފާއުގައި ކުރަންޖެހުނު ކޮންމެ ކަމެއްް ކުރުމުގައި އެ ޕާޓީ ދެމިއޮންނާނެ ކަމުގެ ފުރިހަމަ ޔަގީންކަން ދިވެހި ރައްޔިތުންނަށް ވަނީ ދީފައެވެ.