އައްޑޫ ބިޔުރޯ

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފޯނުން ގުޅުއްވައި އިންޒާރު ދެއްވައި ބިރުދެއްކެވި މައްސަލައާ ގުޅިގެން، އަދަދު ނޫހުގެ ސީއީއޯ، ހުސެއިން ފިޔާޒު މޫސާ ފުލުހަށް ހާޒިރުކޮށް ބަޔާން ނަގައިފި އެވެ.

ބުރާސްފަތި ދުވަހުގެ ހަވީރު ފުލުހަށް ހާޒިރުކޮށް ބަޔާން ނަގާފައިވަނީ، ރައީސް މުއިއްޒު، ފިޔާޒު އަށް އިންޒާރުދިން މައްސަލަ ތަހްޤީޤްކޮށްދިނުމަށް އެދި އަދަދު ނޫހުން ފުލުހަށް ހުށަހަޅާފައިވާ މައްސަލައާއި، މިމައްސަލަ ބަލައިދިނުމަށް އެދި މޯލްޑިވްސް މީޑިއާ ކައުންސިލުން ހުށަހަޅާފައިވާ މައްސަލައާއި ގުޅިގެންނެއެވެ.

ފުލުހުންނަށް ބަޔާން ދިނުމަށްފަހު އަދަދު ނޫހުގެ ސީއީއޯ، ހުސެއިން ފިޔާޒު މޫސާ ވިދާޅުވީ، ދެ މައްސަލާގައި ބަޔާން ނަގާފައިވާ ކަމަށާއި، އެކަން ހިނގާދިޔަ ގޮތް ފުލުހުންނަށް ކިޔާދީފައިވާ ކަމަށެވެ.

ނޫސްވެރިކަމުގެ މިވޭދުވެދިޔަ އަހަރުތަކުގައި، ސަރުކާރުތަކުގައި ތަޖްރިބާ ކުރެވިފައިހުރި ކަންކަމުން ބިރުވެރިކަން އިންތިހާއަށް، އެދުވަހުގެ ކޯލްއަށް ފަހުން އިޙްސާސްކުރެވުނު ކަމަށް ފިޔާޒް ވިދާޅުވި އެވެ. ބިރު ނުގަންނަ ކަމަށް ދައްކައިގެން ތިބި ކަމުގައިވީ ނަމަވެސް ހިތުގައި އެބިރުވެރިކަން އިޙްސާސްކުރެވޭ ކަމަށްވެސް އޭނާ ވިދާޅުވި އެވެ.

ނަމަވެސް މިމައްސަލައާއި ގުޅިގެން ފުލުހުންގެ އިދާރާއިން އެއްވެސް އެއްޗެއް ހާމަކޮށްފައެއް ނުވެއެވެ.

14 މާރޗް 2025 ރޭ އިރާކޮޅުގެ ވަގުތެއްގައި ރައީސް މުޢިއްޒު ވަނީ ފިޔާޒަށް ފޯނުން ގުޅައި އިންޒާރުދެއްވާ ބިރު ދައްކަވާފައެވެ. ފޯނުން ގުޅުއްވާ ފިޔާޒް އާ ދެކޮޅަށް އެޅުއްވެން ހުރި ހުރިހާ ފިޔަވަޅެއް އަޅުއްވާނެ ކަމަށް މުއިއްޒު ވިދާޅުވި ކަމަށް އެނގިފައިވެއެވެ.

އެ މައްސަލަ އާއި ގުޅިގެން 'އަދަދު' ނޫހަށް ސީދާ ރައީސުލްޖުމްހޫރިއްޔާ ގުޅުއްވައި އިންޒާރު ދެއްވަންޖެހޭ ސަބަބެއް ނެތްކަމަށް އެ ނޫހުން ދެކޭކަން އަދަދު ނޫހުން ނެރުނު ބަޔާނުގައި ފާހަގަކޮށްފައިވެ އެވެ.

ގައުމުގެ ރައީސުލްޖުމްހޫރިއްޔާއަކީ، ދިވެހިރާއްޖޭގެ އެންމެހައި ފަރުދުންގެ މިނިވަންކަމާއި، ރައްކާތެރިކަމާއި، އެންމެހައި ރައްޔިތުންނަށް ލިބިގެންވާ އަސާސީ ހައްގުތައް ލިބިދެވޭކަން ކަށަވަރުކުރުމުގެ ޒިންމާ އޮތް ފަރާތްކަމަށް ވާއިރު އެފަދަ އަމަލެއް ރައީސް ހިންގެވުމުން އެކަމާއި މެދު އެ ނޫހުން ވަނީ ކަންބޮޑުވުން ފާޅުކޮށްފަ އެވެ.

އަދި ގައުމުގެ އެންމެ އިސްވެރިޔށާގެ ފަރާތުން ނޫސްވެރިންނަށް އިންޒާރު ލިބުމަކީ އެއްގޮތަކަށްވެސް ބަލައިގަންނަ ކަމެއް ނޫން ކަމަށް މޯލްޑިވްސް ޖަރނަލިސްޓް އެސޯސިއޭޝަނުންވެސް ވަނީ ކަންބޮޑުވުން ފާޅުކޮށްފަ އެވެ.

އެމްޖޭއޭއިން ނެރުނު ބަޔާނުގައި ވަނީ މީގެ އިތުރުންވެސް އަދަދު ނޫހުގެ އެކި ނޫސްވެރިންނަށް އެކި ފަހަރުމަތިން ލިބިފައިވާ އިންޒާރުތަކާއި ގުޅޭ ގިނަ މައްސަލަތަކެއް ހުރިއިރު، އެކަންކަމާއި ގުޅިގެން އެކަށީގެންވާ ފިޔަވަޅެއް އެޅިފައި ނެތުމަކީ ކަންބޮޑުވާ ކަމެއް ކަމަށެވެ.

އެހެންކަމުން އަދަދު ނޫހުގެ ފަރާތުން ހުށަހަޅާފައިވާ މައްސަލަ، އިންސާފުވެރިކަމާއި އެކު ވީހާވެސް އަވަހަށް ތަހުގީގު ކޮށްދިނުމަށް ދިވެހި ފުލުހުންގެ ޚިދުމަތަށް އެމްޖޭއޭއިން ވަނީ ގޮވާލާފަ އެވެ.

މިޝަކުވާއާއި ގުޅިގެން ރައީސް އޮފީހުގެ ބަހެއް ހޯދުމަށް މަސައްކަތްކުރި ނަމަވެސް، އެއޮފީހުގެ ކޮމިއުނިކޭޝަން އިސްވެރިން އެޖަމިއްޔާއަށް އެއްވެސް ޖަވާބެއް މިހާތަނަށް ދެއްވާފައި ނުވާ ކަމަށް އެމްޖޭއޭ އިން ވަނީ ބުނެފަ އެވެ.

އެމްޖޭއޭގެ އިތުރުން އިދިކޮޅު އެމްޑީޕީން އަދި އާންމުންގެ ގިނަ ބަޔަކު ވެސް ދަނީ މިކަން ކުށްވެރިކޮށް، މި މައްސަލަ ތަހުގީގުކުރުމަށް ފުލުހުންނަށް ގޮވާލަމުންނެވެ.