އިސްލާމިކް މިނިސްޓަރ ޑރ މުހައްމަދު ޝަހީމް އަލީ ސައީދު ތައުބާވުމަށް ދީނީ އިލްމްވެރިޔާ ޑރ. މުހައްމަދު އިޔާޒް ގޮވާލައްވައިފިއެވެ.
ޑރ. އިޔާޒް މިނިސްޓަރ ޝަހީމް ތައުބާވުމަށް ގޮވާލެއްވީ، ޑރ އިޔާޒް އާ ބެހޭ ގޮތުން ދޮގު ޚަބަރު ފަތުރަމުން ގެންދަވާތީ ކަމަށް ވިދާޅުވެފައިވެއެވެ.
މިނިސްޓަރ ޝަހީމް ތައުބާވުމަށް ގޮވާލެއްވީ އިސްލާމީ މަރުކަޒުގައި ޑރ އިޔާޒް ކުރިއަށް ގެންދެވި ތަފްސީރު ކްލާސްތައް ހުއްޓާލެއްވީ މީގެ މަހެއްހާ ދުވަސް ކުރިން ޑރ. އިޔާޒް އަމިއްލައަށް ކަމަށް ޑރ ޝަހީމް ވިދާޅުވެ އެކްސް ގައި ކުރައްވާފައިވާ ޕޯސްޓަކަށް ރައްދު ދެއްވަމުންނެވެ.
މިނިސްޓަރ ގެ މި ވާހަކަ އަކީ ދޮގެއް ކަމަށް ވިދާޅުވެ ޑރ އިޔާޒް އެކްސް ގައި އާދިއްތަ ދުވަހު ކުރެއްވި ޕޯސްޓެއްގައި ކަންހިނގައި ދިޔަ ގޮތް ސާފުކޮށްދެއްވަމުން ވިދާޅުވެފައިވަނީ، އޭނާ 2018 އިން ފެށިގެން ކޮންމެ އާދީއްތަ ދުވަހެއްގެ ރޭ މަޣްރިބް ނަމާދުގެ ފަހުން އިސްލާމީ މަރްކަޒުގައި ނަންގަވަމުން ގެންދެވި ޤުރްއާން ތަފްސީރު ކުލާސް މަސްދުވަހަށް މެދުކަނޑާލީ އެނާގެ ދަރިކަލަކު ބަލިވެގެން ރާއްޖެއިން ބޭރަށް ވަޑައިގަންނަވަން ޖެހިގެން ކަމުގައެވެ.
ޑރ އިޔާޒް ވިދާޅުވީ، އޭނާ ބޭރަށް ފުރާ ވަޑައިގަތުމުގެ ކުރިން މިނިސްޓްރީގެ ކަމާއި ބެހޭ މުވައްޒަފަށް އެކަން އަންގަވާފައިވާނެ ކަމަށެވެ. އަދި އެނބުރި މާލެ ވަޑައިގެން އެމުވައްޒަފަށް އެކަން އެންގެވި ކަމަށްވެސް ވިދާޅުވެފައިވެއެވެ.
"އިސްލާމީ މަރްކަޒާއި ސަލްމާން މިސްކިތް ފިޔަވާ އެހެން މިސްކިތެއްގައި ކުލާސްތައް ކުރިޔަށް ގެންދިޔުމަށް" ޑރ. އިޔާޒް އަށް މިނިސްޓްރީގެ މުވައްޒަފު ދެންނެވި ކަމަށް ޑރ. އިޔާޒް ވިދާޅުވެފައިވެއެވެ.
އަދި އެކަން އެގޮތައް ހަމަޖެއްސެވީ ކޮން ފަރާތަކުންތޯ ޑރ އިޔާޒް އެއްސެވެމުން އެއީ ޑެޕިޔުޓީ މިނިސްޓަރ މުޠީޢު ކަމަށް މިނިސްޓްރީގެ މުވައްޒަފު ދެންނެވި ކަމަށް ޑރ އިޔާޒް ވިދާޅުވިއެވެ.
ފަހުން އެއީ މިނިސްޓަރ ނުވަތަ މިނިސްޓްރީގެ ނިންމުމެއްތޯ ސާފުކޮށްދެއްވުމަށް އެދި މިނިސްޓްރީ އަށް ފޮނުއްވި ސިޓީ އަށް އެއްވެސް ޖަވާބެއް ނުލިބޭ ކަމަށް ޑރ. އިޔާޒް ވިދާޅުވެފައިވެއެވެ.
"އިސްލާމްދީނަށް ޙުރުމަތްކޮށް ހިއްތެވުމަށް މާތް ﷲ ގަންދީ ހުވާކުރައްވައިގެން ހުންނަވާ މިފަދަ ދަށުދަރަޖައިގެ އަމަލެއް މިނިސްޓަރ ހިންގަވާތީ އެކަމާ ނުހަނު ހިތާމަ ކުރަމެވެ." ކްލާސް ހުއްޓާލެއްވީ ޑރ. އިޔާޒް އަމިއްލަ އަށް ކަމަށް ދޭހަވާ ގޮތައް މިނިސްޓަރ ޝަހީމް ދޮގު ޚަބަރު ފަތުރާފައިވާ މައްސަލައިގައި ޑރ. އިޔާޒް ވިދާޅުވިއެވެ.
ޑރ. އިޔާޒް ވަނީ ޑރ. ޝަހީމް އަށް ތައުބާވުމަށް ގޮވާލައްވާފައެވެ.
ޑރ އިޔާޒް ވިދާޅުވީ، މީގެ ކުރިންވެސް ކަމެއް ދިމާވެއްޖެނަމަ، ނުވަތަ ރަށުން ބޭރަށް ދާންޖެހިއްޖެނަމަ ދަރުސް މެދުކަނޑާލާފައި، އެނބުރި ވަޑައިގެން އަލުން ފަށައިގެން ކުރިޔަށް ގެންދަވާ ކަމަށެވެ.
"މިފަހަރު ޙުކުމް ބަދަލުވެގެން މިއުޅެނީ ޙަމާސް ޖަމާޢަތުގެ ވެރިޔާ އިސްމާޢީލް ހަނިއްޔާ ޝަހީދުކޮށްލުމާއި ގުޅިގެން އެމަނިކްފާނުގެ މައްޗަށް ޣައިބަށް ކަށުނަމާދު ކޮށްދިނުމަށް އެދުމުން، ބަޔަކު މީހުންގެ ފިއްތުމާއި ހުރެ އެކަން ކުރައްވަން ކެރިވަޑައިނުގެން، އެކަމުގެ މަތިޖެއްސެވުމަށް ކުރައްވާ ސިލްސިލާ ކަންތައްތަކެއް،" ކަމަށް ޑރ. އިޔާޒް ވިދާޅުވިއެވެ.
