ކުމުންދޫ ބަނދަރު ތަރައްޤީ ކުރުމާއި ކިނޮޅަހު ގޮނޑުދޮށް ހިމާޔަތްކުރުމުގެ ޕްރޮޖެކްޓް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ޙަވާލުކޮށްފިއެވެ.

ޢަންގާރަ ދުވަހު މިނިސްޓްރީ އޮފް ނެޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ ގައި ބޭއްވި ރަސްމިއްޔާތެއްގައި މި މަޝްރޫއުތަކުގެ އެއްބަސްވުމުގައި ވަނީ ސޮއިކޮށްފައެވެ.

މި އެއްބަސްވުންތަކުގައި މިނިސްޓްރީގެ ފަރާތުން ސޮއި ކުރެއްވީ ޑިރެކްޓަރ ޖެނެރަލް ފާތިމަތު ޝާނާ ފާރޫޤެވެ. އެމްޓީސީސީގެ ފަރާތުން ސޮއި ކުރެއްވީ އެ ކުންފުނީގެ ސީއީއޯ އާދަމް އާޒިމްއެވެ.

ކުމުންދޫ ބަނދަރު ތަރައްޤީ ކުރުމުގެ މަސައްކަތުގެ އަގަކީ 71،371،757.34 އެވެ. މަސައްކަތް ނިންމުމަށް ދީފައިވާ މުއްދަތަކީ 570 ދުވަހެވެ.

މި މަޝްރޫއުގެ ދަށުން ކުރުމަށް ހަމަޖެހިފައިވާ މައިގަނޑު މަސައްކަތްތަކުގެ ތެރޭގައި ރަށުގެ އިރުމަތީ ފަރާތުގައި މިހާރު ހުރި 154 މީޓަރު ވާޓަރު މަރާމާތު ކުރުމާއި، 154 މީޓަރު ޕޭމަންޓް މަރާމާތު ކުރުމާއި، ކޮޅުވެއްޓި ބޭނުން ކުރުމަށް ރޭމްޕެއް ޤާއިމު ކުރުމާއި، 100 ފޫޓު ޓީޖެޓީއެއް ޤާއިމު ކުރުމާއި، އުތުރު ފަރާތަށް 700 ފޫޓަށް ވާޓަރު އިތުރުކޮށް ބަނދަރު ބޮޑު ކުރުމާއި، 290 މީޓަރު ބޮޑުހިލަ ބޭރުތޮށިލުމާއި، 40 މީޓަރުގެ ބޮޑުހިލައިގެ ރިވެޓްމަންޓު ޖެހުމާއި، 60 މީޓަރުގެ ބޮޑު ހިލައިގެ ގްރޮއިން އަދި ބަނދަރު މަގުބައްތި ހަރު ކުރުމާއި، 120 މީޓަރު ކޮންކްރީޓް ޖެޓީ ޤާއިމު ކުރުން ހިމެނެއެވެ.

އޭގެ އިތުރުން، ރ ކިނޮޅަހު ގޮނޑުދޮށް ހިމާޔަތް ކުރުމުގެ މަޝްރޫއުގެ އަގަކީ 12،368،484 ރުފިޔާއެވެ. މަސައްކަތް ނިންމުމަށް ދީފައިވަނީ 180 ދުވަހުގެ މުއްދަތެކެވެ.

މި މަޝްރޫއުގެ ދަށުން ކުރާ މަސައްކަތްތަކުގެ ތެރޭގައި ރަށުގެ އިރުމަތީ ފަރާތު ގިރާ ސަރަޙައްދު ހިމާޔަތް ކުރުމުގެ ގޮތުން 19،780 ކޮޑިމީޓަރު ބިން ހިއްކުމާއި، އިރު އަދި ހުޅަނގު ފަރާތު ގިރާ ސަރަޙައްދު ހިމާޔަތް ކުރުމުގެ ގޮތުން 320 މީޓަރާއި 330 މީޓަރުގެ ޖިއޯބޭގް ރިވެޓްމަންޓު ޖެހުން ހިމެނެއެވެ.