ޓްރާންސްޕޯޓް މިނިސްޓްރީއަށް އައިޓީ ދާއިރާގެ ދަތިތައް
14 އެޕްރީލު 2023 | ހުކުރު 14:06ސިސްޓަމްގެ މައްސަލަތައް ޖެހޭ، އައިޓީއާ ގުޅުންހުރި މައްސަލަތައް ހައްލުކުރުމަށް ކޮންމެ ދުވަހަކުވެސް މަސައްކަތްކުރޭ
މަޖިލީހަށް ޓްރާންސްޕޯޓް މިނިސްޓަރ ހާޒިރުކުރުން
ޓްރާންސްޕޯޓް މިނިސްޓްރީއަށް ދިމާވެފައިވާ އެންމެ ބޮޑު ގޮންޖެހުމަކީ އައިޓީ ދާއިރާއިން ދިމާވާ މައްސަލަތައް ހައްލުކުރުމުގައި ދިމާވާ ގޮންޖެހުންތައް ކަަމަށް އެ ވުޒާރާއިން ބުނެފިއެވެ.
މަޖިލީހުގެ ކޮމިޓީގައި ޓްރާންސްޕޯޓް މިނިސްޓަރ އާއިޝަތު ނަހުލާ ވަނީ އެކަމުގެ ކަންބޮޑުވުން ފާޅުކުރައްވާފައެވެ. ސިސްޓަމްގެ މައްސަލަތައް ޖެހޭކަމަށާއި، އައިޓީއާ ގުޅުންހުރި މައްސަލަތައް ހައްލުކުރުމަށް ކޮންމެ ދުވަހަކުވެސް މަސައްކަތް ކުރާކަމަށް މިނިސްޓަރ ވަނީ ވިދާޅުވެފައެވެ. މީހުންނާއި ތަކެތީގެ ގޮތުން ބެލިޔަސް، މިނިސްޓްރީއަށް ބޭނުންވާވަރަށް ވަސީލަތްތައް ނުލިބޭކަމަށް ނަހުލާ ވިދާޅުވިއެވެ. އަދި ތަކުރާރުކޮށް އެކަން ހައްލުކުރުމަށް އެކި ކަހަލަ މަސައްކަތްތައް ކޮށްފައިވާކަމަށާއި، އަދި އެކަށީގެންވާ ކޮންސަލްޓެންޓެއް ހޯދުމުގައިވެސް ދަތިވިކަމަށް ނަހުލާ ވިދާޅުވިއެވެ. އަދި ކޮވިޑްގެ ހާލަތުގެ ސަބަބުން ކޮންސަލްޓެންޓަކު ހޯދަން ސަރުކާރަށްވެސް ގޮންޖެހުމަކަށް ވީކަމަށް ނަހުލާ ވަނީ ވިދާޅުވެފައެވެ.
އުޅަނދުގެ ފީއާ ގުޅޭގޮތުން މައުލޫމާތުދެއްވަމުން ޓްރާންސްޕޯޓް މިިނިސްޓްރީގެ ޑެޕިއުޓީ މިނިސްޓަރ ހަމަދު އަބްދުލްޣަނީ ވިދާޅުވީ، މައުލޫމާތު އެންޓަރކުރުމުގައި ދިމާވާ މައްސަލަތައް އެބަހުރި ކަމަށެވެ. ޕޯޓަލްއާއި ޓްރާންސްޕޯޓްގެ ސިސްޓަމް ކޮމިއުނިކޭޓްކުރުމުގައި މައްސަލަ ދިމާވާ ކަމަށާއި، އެފަދަ ހާލަތުގައި އެ ވެހިކަލް ދުއްވަން ލިޔުމެއް ދޭކަމަށް އޭނާ ވިދާޅުވިއެވެ. އެކަން އެގޮތަށް ކުރަނީ އާއްމުންނަށް ދަތިނުވާނެ ގޮތަށް އަމަލުކުރުމަށް ކަމަށް އޭނާ ވިދާޅުވިއެވެ.
އެ މައްސަލައަކީ އާއްމުންނާ ގުޅިފައިވާ ކަމަކަށް ވުމުން، މައްސަލަ ހައްލުކުރަން ކޮންމެ ކޮންމެ ބައެއް ބައިވެރި ނުކުރެވޭނެ ކަަމަށް އޭނާ ވިދާޅުވިއެވެ. ސަރުކާރުން އާއްމުންގެ އުޅަނދުގެ ސެކިއުރިޓީއާ ގުޅޭގޮތުން ބަލަންޖެހޭ ކަންކަން ހުންނަކަމަށް އޭނާ ވިދާޅުވިއެވެ.
