ވެލެންސިއާގެ ތައްޔާރީތައް މަދު، އެއީ ހާލަތު އޮތް ގޮތުން: ފެސްކޯ

ޕްރެޒިޑެންސްޓް ކަޕް މުބާރާތަށް ނުކުންނައިރު ކުލަބު ވެލެންސިއާގެ ފަރިތަކުރުންތައް މަދު ކަމަށާއި، އެއީ މިއަދުގެ ހާލަތު އޮތް ގޮތުން ކަމަށް، އެ ޓީމުގެ ހެޑު ކޯޗު އަހުމަދު މުޖުތަބާ (ފެސްކޯ) ބުނެފިއެވެ.

ފެސްކޯ މިހެން ބުނީ މިހާރު ކުރިއަށްދާ ޕްރެޒިޑެންޓްސް ކަޕް މުބާރާތުގައި ވެލެންސިއާއިން ސުޕަރ ޔުނައިޓެޑު ސްޕޯޓްސް ކުލަބް (ސަސް)އާ ދެކޮޅަށް ނުކުންނަ މެޗުގެ ކުރިން އޮތް ޕްރެސް ކޮންފަރެންސްގައެވެ. އޭނާ ބުނީ މެޗަށް ކުރިމަތިލާއިރު މިހާތަނަށް ވެލެންސިއާއަށް ކުރިއަށްގެންދެވުނީ ފަސް ފަރިތަކުރުން ކަމަށެވެ. އޭނާ ބުނީ އެންމެ ފަހުގެ ޗެމްޕިއަނުންގެ ހައިސިއްޔަތުން ވެލެންސިއާގެ ކިބާގައި ތަށި ދިފާއު ކުރެވޭނެ ފެންވަރު ނެތޭވެސް ބުނެވިދާނެ ކަމަށެވެ. ނަމަވެސް އެއީ ކާމިޔާބު ހޯދުމަށް މަސައްކަތް ނުކުރަންވީ ސަބަބެއް ނޫންކަން ފާހަގަކޮށް ފެސްކޯ ބުނީ، ވެލެންސިއާއިން ނެރޭނީ ޒުވާން ކުޅުންތެރިންގެ މައްޗަށް އެކުލެވޭ ޓީމެއް ކަމަށެވެ. ވެލެންސިއާއަކީ ރާއްޖޭގެ ފުޓުބޯޅައިގެ ތާރީޚުގައިވެސް ކާމިޔާބު ޓީމެއްކަމަށާއި، ތާރީޚުގައި އެކަން ފެންނަން އޮންނާނެ ކަމަށްވެސް ފެސްކޯ ވަނީ ބުނެފައެވެ. ނަމަވެސް މިއަދުގެ ހާލަތު އޮތް ގޮތުން ވެލެންސިއާއަށް އެ ފެންވަރު ނުދެއްކިދާނެ ކަމަށާއި، އެހެންނަމަވެސް ވެލެންސިއާއިން ފުޓުބޯޅަ ކުޅޭނީ ޖޯކަކަށް ނޫންކަމަށްވެސް އޭނާ ވަނީ ބުނެފައެވެ.

ފެސްކޯ ބުނީ ވެލެންސިއާއިން ނުކުންނަނީ ހުރިހާ މެޗަކުން ބަލިވާންވެސް ނޫންކަމަށާއި، އެ ޓީމަކީ ހަމަ ތިބެފައި ކުޅެލަން ނުކުންނަ ބައެއްވެސް ނޫންކަމަށެވެ. އޭނާ ބުނީ ވެލެންސިއާގައި އޮތް ޒުވާން ސްކޮޑާމެދު ވަރަށް ހިތްހަމަޖެހޭ ކަމަށާއި، އަބަދުވެސް ދައްކަމުން އަންނަ ވާހަކައަކީ ދިވެހި ފުޓުބޯޅާގައި ޒުވާން ކުޅުންތެރިންނަށް ފުރުސަތު ނެތް ވާހަކަ ކަމަށެވެ. އެހެންނަމަވެސް ޔަގީނުންވެސް މިއަހަރު ވެލެންސިއާއިން ޒުވާން ކުޅުންތެރިންނަށް ފުރުސަތު ދޭ މަންޒަރު ފެންނާނެ ކަމަށްވެސް ފެސްކޯ ބުންޏެވެ.

ފެސްކޯ ބުނީ ވެލެންސިއާގެ ފަރިތަކުރުންތައް މަދުވި ނަމަވެސް ކާމިޔާބު ނުހޯދޭންވީ ސަބަބެއް ނެތްކަމަށެވެ. އެގޮތުން އޭނާ ދެއްކީ އެންމެ ފަހުން ގައުމީ ފުޓުބޯޅަ ޓީމުން ޕާކިސްތާނާ ދެކޮޅަށް ކުޅުނު މެޗުގެ މިސާލެވެ. ފެސްކޯ ބުނީ ރާއްޖޭގެ ފުޓުބޯޅައިގެ ހާލަތު އޮތް ގޮތުން ގައުމީ ޓީމުން އެ މެޗު ކުޅުނީ އެންމެ ފަރިތަކުރުމެއްވެސް ކުރިއަށް ނުގެންގޮސް ކަމަށެވެ. އެހެންނަމަވެސް އެ މެޗުން ރާއްޖެ މޮޅުވިކަން ފާހަގަކޮށް ފެސްކޯ ބުނީ، ވެލެންސިއާއަށް ފަސް ފަރިތަކުރުން ކުރިއަށް ގެންދެވުމުން އޭގެ މާނައަކީ ގޯސް ނޫންކަމަށެވެ. އިތުރަށް ވާހަކަ ދައްކަމުން ފެސްކޯ ބުނީ، ކުލަބުތަކަށް ބަލާއިރު؛ މާޒިޔާ ސްޕޯޓްސް އެންޑް ރެކްރިއޭޝަނާއި ކުލަބް އީގަލްސް ފިޔަވައި، ދުރާލައި ފަރިތަކުރުންތައް ފެށި ބަޔަކުވެސް ނެތްކަމަށެވެ. އޭނާ ބުނީ ޖުމުލަ ގޮތެއްގައި ދެން ހުރި ކުލަބުތަކަށް ބަލާނަމަ، އެ ކުލަބުތަކުގެ ފަރިތަކުރުންތައްވެސް ވެލެންސިއާއަށްވުރެ މަދުވާނެ ކަމަށެވެ. އޭނާ ބުނީ އެއީ މިއަދު ރާއްޖޭގެ ހާލަތު އޮތް ގޮތް ކަމަށެވެ.

ފެސްކޯ ވަނީ ވެލެންސިއާއިން ފެންނާނެ ޒުވާން ކުޅުންތެރިންގެ ހުނަރާއި، މަސައްކަތުގެ ވާހަކަވެސް ދައްކާފައެވެ. އޭނާ ބުނީ އެއީ ވެލެންސިއާގެ ބެކަޕް ކަމަށާއި، ސަސް މެޗުގައި އެ ކުޅުންތެރިން ނުކުންނާނީ ބައެއް ސީނިއަރ ކުޅުންތެރިންނާއެކު ކަމަށެވެ. އިތުރަށް އޭނާ ބުނީ، ޕްރެޒިޑެންޓްސް ކަޕް މުބާރާތަކީ ރާއްޖޭގައި ބާއްވާ އެންމެ ޝަރަފުވެރި މުބާރާތް ކަމަށާއި، ނަމަވެސް މިއަދު ވެލެންސިއާ ހިމެނޭހެން ގިނަ ކުލަބުތަކުން މުބާރާތަށް ފުރިހަމައަށް ތައްޔާރުނުވާކަމަށެވެ. ތައްޔާރުވި ހަމައެކަނި ދެ ކުލަބަކީ މާޒިޔާއާއި އީގަލްސްކަން ފާހަގަކޮށް އޭނާ ބުނީ، ރާއްޖޭގެ ފުޓުބޯޅަ އޮތް ހާލަތަކީ އެއީ ކަމަށެވެ.

ޕްރެޒިޑެންޓްސް ކަޕްގައި ވެލެންސިއާއިން ސަަސްއާ ދެކޮޅަށް ނުކުންނާނީ ހުކުރު ދުވަހުގެ ރެއެވެ.