މިއަހަރުގެ ދެވަނަ ކުއާޓަރުގައި ތެލާއި ގޭހުން ރަޝިއާއަށް ލިބޭ އާމްދަނީ އިތުރުވާނެ ކަމަށާއި އެއީ ދުނިޔޭގެ އިގްތިސާދަށްވެސް ރަނގަޅު ޚަބަރެއް ކަމަށް އެ ޤައުމުގެ ރައީސް ވްލަޑިމިއަރ ޕުޓިން ވިދާޅުވެއްޖެއެވެ.

ޕުޓިން މިފަދައިން ވިދާޅުވިއިރު ދުނިޔޭގެ ބާޒާރުގައި ތެލުގެ އަގު ދަނީ އުފުލެމުންނެވެ. އެގޮތުން، މިދިޔަ ހަފްތާގައި ރަޝިއާ ހިމެނޭހެން އޯޕެކްގެ ޤައުމުތަކުން ތެޔޮ އުފައްދާ މިިންވަރު މަދުކުރުމަށް ނިންމުމާއެކު ދުނިޔޭގެ ބާޒާރުގައި ތެލުގެ އަގު ވަނީ ފަސް އިންސައްތައަށް އުފުލިފައެވެ. މި ޤައުމުތަކުން ތެޔޮ އުފައްދާ މިންވަރު ދަށް ކުރުމަށް ނިންމާފައިވަނީ އަންނަ މެއި މަހުން ފެށިގެންނެވެ.

ރަޝިއާއިން އާއްމުކޮށްފައިވާ ތަފާސްހިސާބުތަކާ ހަވާލާދީ ރޮއިޓަރސް އިން ބުނެފައިވާ ގޮތުގައި މިއަހަރުގެ ފުރަތަމަ ކުއާޓަރުގައި ރަޝިއާގެ ބަޖެޓް ވަނީ 29 ބިލިއަން ޑޮލަރުން ޑެފިސިޓް ވެފައެވެ. މީގެ ސަބަބެއް ކަމަށް ބުނެފައިވަނީ އެ ޤައުމުގެ ތެލާއި ގޭހުގެ އެކްސްޕޯޓް ދަށްވެ އާމްދަނީ ދަށްވުމެވެ.

ރަޝިއާގެ ހަކަތައިގެ އާމްދަނީ ދަށްވެފައިވަނީ އެ ޤައުމުން ޔޫކްރެއިނަށް ދެމުން އަންނަ ހަމަލާތަކާ ގުޅިގެން އެ ޤައުމާ ދެކޮޅަށް ހުޅަނގުގެ ގައުމުތަކުގެ އަޅާފައިވާ ފިޔަވަޅުތަކުގެ ސަބަބުންނެވެ،

ރަޝިއާގައި އަންގާރަ ދުވަހު ވަގުތުން ދެއްކި އެ ޤައުމުގެ ސަރުކާރުގެ ބައްދަލުވުމެއްގައި އެ ޤައުމުގެ ރައީސް ޕުޓިން ވަނީ ހުޅަނގުގެ ޤައުމުތަކުން އަޅާފައިވާ ފިޔަވަޅުތަކަށް ވަރަށް ބޮޑަށް ފާޑުވިދާޅުވެފައެވެ. އަދި އޭގެ ސަބަބުން އެ ޤައުމުގެ ތެލާއި ގޭހުގެ އާމްދަނީ ފުރަތަމަ ކުއާޓަރުގައި 1.3 ޓްރިލިއަން ރޫބަލް ނުވަތަ 15.8 ބިލިއަން އެމެރިކާ ޑޮލަރަށް ދަށްވެފައިވާ ކަމަށް ވިދާޅުވިއެވެ. އެހެން ނަމަވެސް ދެވަނަ ކުއާޓަރުގައި ހާލަތު ބަދަލުވާނެ ކަމަށާއި ބަޖެޓަށް އާމްދަނީ އިތުރުވާނެ ކަމަށް ވަނީ ވިދާޅުވެފައެވެ.

އިންޓަނޭޝަނަލް މަނިޓަރީ ފަންޑް (އައިއެމްއެފް) އިން ލަފާ ކޮށްފައިވާ ގޮތުގައި މިއަހަރު ރަޝިއާގެ އުފެއްދުންތެރިކަން 0.3 އިންސައްތައިން 0.7 އިންސައްތައަށް އަރާނެއެވެ.