މެންބަރަކު ކުރައްވާފައިވާ ސުވާލަކާއި ގުޅިގެން މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަހުމަދު މަޚްލޫފް މަޖިލީހަށް ހާޒިރުކުރުން ފަސްކޮށްފިއެވެ.
މަހްލޫފް މަޖިލީހަށް ހާޒިރުކުރުމަށް އަންގާރަ ދުވަހުގެ ޖަލްސާ އަށް އޮތީ އެޖެންޑާކޮށްފައެވެ. އެއީ ތިމަރަފުށި ދާއިރާގެ މެންބަރު ޢަބްދުالله ރިޔާޒް ކުރައްވާފައިވާ ސުވާލަކާއި ގުޅިގެންނެވެ.
އޭނާ ސުވާލުކުރައްވާފައި ވަނީ ތ.ވޭމަންޑޫ ޒުވާނުންގެ މަރުކަޒު ތަރައްޤީ ކުރުމުގެ މަޝްރޫޢުގެ މަސައްކަތް 20 ނޮވެންބަރު 2022ގައި ފަށައި، 1 ޖަނަވަރީ 2023 އަށް ނިންމާ ލެވޭނެ ކަމަށް ސަރުކާރުން ލަފާކޮށް، އެ މަޢުލޫމާތު ހާމަކޮށްފައިވީ ނަމަވެސް އެ މަސައްކަތް ކުރިއަށް ނުދާތީ، އެ މަސައްކަތް ކުރިއަށް ގެންދިއުމަށް މިހާރު ރޭވިފައިވާ ގޮތަކީ ކޮބައިތޯ ސާފުކުރުމަށެވެ. އަދި އެ މަސައްކަތް ނިންމާލެވޭނެ ތާރީޚަކީ ކޮބައިތޯ ސުވާލުކުރައްވާފައިވެއެވެ.
އެ ސުވާލަަށް ޖަވާބު ދިނުމަށް މިނިސްޓަރަށް ނޯޓިސް ފޮނުވާ ދޭން ޖެހޭ ވަގުތު ވަނީ ދީފައެވެ. ނަމަވެސް އަންގާރަ ދުވަހު ހެނދުނު މަޖިލީހުގެ ރިޔާސަތުން ވަނީ ހެނދުނުގެ ވަގުތެއްގައި މަހްލޫފްގެ ބަލި ހާލަތު ހުރިގޮތުން މަޖިލީހަށް ހާޒިރުވެވަޑައިގެންނެވެން ނެތް ކަމަށް އަންގަވާފައިވާ ކަމަށެވެ. އެހެންކަމުން މަހްލޫފްގެ ހާލުކޮޅު ރަނގަޅުވުމުން އަނެއްކާވެސް އެ ސުވާލަށް ޖަވާބުދިނުމަށް މިނިސްޓަރު މަޖިލީހަށް ހާޒިރުކުރުމަށް ތާވަލްކުރާނެ ކަމަށް ރިޔާސަތުން ވަނީ އިޢުލާންކުރައްވާފައެވެ.
