"އަހަރެންގެ ހަޔާތުގައި ދުވަހަކުވެސް ބާސެލޯނާއާ ނުގުޅޭނަން"

އޭނާގެ ޙަޔާތުގައި ދުވަހަކު ވެސް ބާސެލޯނާގެ ކޯޗުކަމާ ހަވާލު ނުވާނެ ކަމަށް ރެއާލް މެޑްރިޑުގެ ކޯޗު ކާލޯ އަންޗެލޮޓީ ބުނެފި އެވެ.

އިޓަލީ އަަށް ނިސްބަތްވާ އުމުރުން 63 އަހަރުގެ އަންޗެލޮޓީ މިހެން ބުނީ އޭނާގެ މުސްތަޤުބަލާ ގުޅޭ ގޮތުން ނޫސްވެރިޔަކު ކުރި ސުވާލަށް ޖަވާބު ދެމުންނެވެ. އެގޮތުން ހުސްވެފައިވާ ބްރެޒިލްގެ ކޯޗުކަމަށް އަންޗެލޮޓީ ގެންނަން މަސައްކަތް ކުރާ ކަމުގެ އަޑުތަކެއް ވެސް ފެތުރެމުން ދަނިކޮށް، ވާދަވެރި ބާސެލޯނާގެ ކޯޗުކަމާ ހަވާލުވުމާ ގުޅޭ ގޮތުން އޭނާ ދެކޭ ގޮތް ހިއްސާ ކުރުމަށް ނޫސްވެރިޔަކު ވަނީ އެދިފަ އެވެ. އެ ސުވާލަށް ޖަވާބު ދެމުން އަންޗެލޮޓީ ބުނީ، އޭނާގެ ހަޔާތުގައި ދުވަހަކުވެސް ބާސެލޯނާގެ ކޯޗުކަމާ ހަވާލުނުވާނެ ކަމަށެވެ. އަދި އެއީ މުސްތަޙީލު ކަމެއް ކަމަށާއި، އެކަން އެގޮތުގައި ނުވާނެ ކަމަށެވެ. މީގެ އިތުރުން އަންޗެލޮޓީ ބުނީ، އޭނާގެ ތާރީޚު އޮންނާނީ ދުނިޔޭގެ އެންމެ މޮޅު އަދި އެންމެ ކާމިޔާބު ކުލަބު ރެއާލްގައި ކަމަށެވެ. އަދި ރެއާލްގެ ސަޕޯޓަރުންނާއި، އޭނާ އަށް ސަޕޯޓުކުރާ މީހުން ވެސް ބޭނުންވަނީ އޭނާ ރެއާލްގައި ހުންނަން ކަމަށެވެ.

އަންޗެލޮޓީ އަކީ ރެއާލްގައި ގިނަ ކާމިޔާބީތަކެއް ހޯދާފައިވާ ކޯޗެކެވެ. އެންމެ ފުރަތަމަ އެ ކުލަބުގެ ކޯޗުކަމާ އޭނާ ހަވާލުވީ 2013 ވަނަ އަހަރު އެވެ. އެއަށްފަހު 2015 ވަނަ އަހަރު ކުލަބު ދޫކޮށްލިއިރު، އޭނާ ވަނީ ރެއާލާއެކު ހަތަރު ތައްޓެއް ކާމިޔާބުކޮށްފަ އެވެ. އަންޗެލޮޓީ ދެ ވަނަ ފަހަރަށް ރެއާލްގެ ކޯޗުކަމާ ހަވާލުވީ 2021 ވަނަ އަހަރު އެވެ. ދެ ވަނަ ފަހަރަށް އެ ޓީމާ ހަވާލުވި ފަހުން މިހާތަނަށް ވަނީ، ފަސް ތައްޓެއް ކާމިޔާބުކޮށްފަ އެވެ. ބްރެޒިލްގެ ކޯޗުކަމާ ހަވާލުވާން އުޅޭ ކަމުގެ އަޑުތަކެއް ފެތުރުމާއެކު އޭރު އަންޗެލޮޓީ ބުނީ އޭނާ ރިޓަޔާވާން ބޭނުންވަނީ ރެއާލްގައި ހުރެ ކަމަށެވެ. އަދި ކުލަބާއެކު ހަދާފައިވާ އެއްބަސްވުމެއް އޮތް ކަމަށާއި، ކުލަބުން އޭނާ ދޫކޮށްލަންދެން ހުންނާނެ ކަމަށެވެ. ރެއާލާއެކު އޭނާ ހަދާފައިވާ އެއްބަސްވުމުގެ މުއްދަތު ހަމަވާނީ އަންނަ އަހަރު އެވެ.

އަންޗެލޮޓީ އަކީ ޔުއެފާ ޗެމްޕިއަންސް ލީގުގައި އެންމެ ގިނަ މޮޅު ހޯދާފައިވާ ކޯޗެވެ. މީގެ އިތުރުން އޭނާ އަކީީ ޗެމްޕިއަންސް ލީގުގެ ތާރީޚުގައި ވެސް އެންމެ ކާމިޔާބު ކޯޗެވެ. އޭނާ ވަނީ މިހާތަނަށް ހަތަރު ފަހަރު ޗެމްޕިއަންސް ލީގު ކާމިޔާބުކޮށްފަ އެވެ. އެއީ މިހާރުގެ ކުލަބު ރެއާލާއެކު ދެ ފަހަރު، އަދި ކުރީގެ ކުލަބް އިޓަލީގެ އޭސީ މިލާނާއެކު ދެ ފަހަރު އެވެ. މިހާރު ކުރިއަށްދާ ސީޒަންގައި ވެސް ރެއާލާއެކު ޗެމްޕިއަންސް ލީގު ކާމިޔާބު ކުރުމުގެ ފުރުސަތު އަންޗެލޮޓީ އަށް އެބަ އޮތެވެ.