ސައްޓުވެސް ނިއުރޭޑިއަންޓަށް!

ދެވަނަ ޑިވިޝަނަށް ވަރުގަދަ ކުރަމުން އަންނަ ރާއްޖޭގެ އެންމެ ބޮޑު ކްލަބް ނިއުރޭޑިއަންޓުން އޭދަފުށި އިޝާން އިބްރާހީމް (ސައްޓު)ގެ ސޮއިވެސް ހޯދައިފިއެވެ.

ފުރަތަމަ ޑިވިޝަންގައި ކުޅުމަށްފަހު މިހާރު އުފަން ރަށަށް ބަދަލުވެފައިވާ ސައްޓު ފާހަގަވީ ޓީސީންނެވެ. ޓީސީއާއި ލީގު ހޯދިއެވެ. އަދި ބަނގްލަދޭޝްގައި އޮތް މުބާރާތް ކާމިޔާބުކުރި ޓީމްގައިވެސް މުހިއްމު ދައުރެއް އަދާކުރިއެވެ. ޤައުމީ ޓީމަށް ކުޅުމުގެ ހުވަފެންވެސް ސީދާ ކުރުމަށްފަހު އެނބުރި ރަށަށް ބަދަލުވި ނަމަވެސް އެކި މުބާރާތްތަކުގައި ސައްޓު ފެނެއެވެ. އަތޮޅު މުބާރާތާއި, ފުޓްސަލް މުބާރާތްތަކުގައިވެސް އަންނަނީ ތަފާތު ދައްކަމުންނެވެ. ރަށުގައި ވަޒީފާ އަދާކުރަމުން ދިޔަނަމަވެސް މާލެ ބަދަލުވީވެސް ފުރަތަމަ ޑިވިޝަނާއި, ޤައުމީ ޓީމަށް ކުޅުމުގެ ހުވަފެން ހަޤީގަތަށް ހެދުމަށެވެ. އެކަން ކާމިޔާބުކަމާއެކު ފުރިހަމަކޮށް އަލުން ރަށަށް ބަދަލުވި ނަމަވެސް އޭނާއަކީ އަދިވެސް ފުރަތަމަ ޑިވިޝަންގައި މޮޅަށް ކުޅެވޭނެ ފެންވަރުގެ ކުޅުންތެރިއެކެވެ. ޓީސީއަށް ކުޅުމުގެ ކުރިން ދިވެހި ލީގުގައި މިލަންދޫ ޓީމަށްވެސް އޭނާ ކުޅުނެވެ.

ނިއުރޭޑިއަންޓަށް ކުޅުމަކީވެސް ސައްޓުގެ އުއްމީދެކެވެ. ނިއުރޭޑިއަންޓަށް ސޮއިކޮށް, އޭނާއަށް ނުލާއި ހުދުގެ ޖަރޒީ ހަވާލުކުރީ ސައްޓުގެ މަންމައެވެ. ސައްޓުގެ ކުރިން ނިއުރޭޑިއަންޓުން ވަނީ ޔަސްފާދު ހަބީބު (މުލަކޭ)އާއި, ކީޕަރު ތޮލާލްއާއި, ފުޓްސަލްގައި ރާއްޖޭގެ އެންމެ މޮޅު އެއްކުޅުންތެރިޔާ އަހުމަދު އަޔާޒުގެ ސޮއި ހޯދާފައެވެ. ފުރަތަމަ ޑިވިޝަނަށް ޕްރޮމޯޓްވުމަށް ދެވަނަ ޑިވިޝަންގައި ވާދަކުރުމުގެ އިތުރުން ނިއުރޭޑިއަންޓް މިސީޒަންގައި އެފްއޭކަޕްގައިވެސް ވާދަކުރާނެއެވެ.