ނިއު ރޭޑިއަންޓު ސްޕޯޓްސް ކުލަބުގެ އައު ޗެއާމަނަށް، ރީޖަނަލް އެއާޕޯޓްސް ކޮމްޕެނީ ލިމިޓެޑު (އާރުއޭސީއެލް)ގެ މެނޭޖިން ޑަައިރެކްޓަރު އަޙުމަދު މުބީން އިންތިޚާބު ކޮށްފި އެވެ.

އެންމެ ފަހުން އެ މަގާމުގައި ހުރީ އަޙުމަދު ވާސިފު އެވެ. ނިއު ރޭޑިއަންޓުގެ ޗެއާމަންކަމުން ވާސިފު އިސްތިއުފާ ދެއްވާފައި ވަނީ، އަލުން ފުރަތަމަ ޑިވިޝަނަށް އައުމަށް ނިއު އިން ކުރަމުން އައި މަސައްކަތް ދެ ފަހަރެއްގެ މަތިން ކާމިޔާބު ނުވުމުންނެވެ.

އަލުން ފުރަތަމަ ޑިވިޝަނަށް އައުމަށް މަސައްކަތް ކުރަމުން އަންނަ ނިއު އިން ވަނީ އެ ކުލަބުގެ ކޮންގްރެސް ބުދަ ދުވަހުގެ ރޭ ބާއްވައިފަ އެވެ. ދަރުބާރުގޭ ރަންނަބަނޑޭރި މާލަމުގައި ބޭއްވި އެ ކޮންގްރެސްގައި ވަނީ އެ ކުލަބުގެ އައު ބޯޑަށް މެމްބަރުން އިންތިޚާބު ކޮށްފަ އެވެ. އަދި ކުލަބުގެ އަސާސީ ޤަވާއިދުގެ ބައެއް މާއްދާތަކަށް ވެސް ވަނީ ބަދަލު ގެނެސްފަ އެވެ.

ކޮންގްރެސްގައި ނިއު ރޭޑިއަންޓުގެ ބޯޑުގެ މަގާމުތަކަށް ކުރިމަތިލާން ހުޅުވާލި ފުރުސަތުގައި، ކޮންމެ މަގާމަކަށް ވެސް ކުރިމަތިލާފައި ވަނީ އެންމެ ފަރާތަކުންނެވެ. އެހެންވެ މެމްބަރުން އިންތިޚާބު ކޮށްފައި ވަނީ އަތް ހިއްލައިިގެން، ފެންނަ ނުފެންނަ ވޯޓުންނެވެ. އެގޮތުން ކޮންގްރެސް އަށް ޙާޟިރުވި މެމްބަރުންގެ އިއްތިފާގުން ވަނީ، ނިއުގެ ޗެއާމަންކަމަށް މުބީން އިންތިޚާބު ކޮށްފަ އެވެ. މީގެ ކުރިން 18 ވަނަ ރައްޔިތުންގެ މަޖިލީހުގައި ބިލެތްދޫ ދާއިރާގެ މެމްބަރުކަން ވެސް ކުރައްވާފައިވާ މުބީން އަކީ، ނިއުގެ ކަންކަމުގައި އިސްކޮށް އުޅުއްވި ބޭފުޅެކެވެ.

މީގެ އިތުރުން ނިއުގެ އެހެން މަގާމުތަކަށް ވެސް މެމްބަރުން އިންތިޚާބު ކޮށްފައިވާއިރު، އޭގެ ތެރޭގައި ސަރުކާރު ކުންފުނިތަކުގެ މެނޭޖިން ޑައިރެކްޓަރުން އަދި ރައްޔިތުންގެ މަޖިލީހުގެ މެމްބަރުން ވެސް ހިމެނެ އެވެ. އެގޮތުން ނިއުގެ ސީނިއާ ވައިސް ޗެއާމަންކަމަށް އިންތިޚާބު ކުރި ދެ މެމްބަރުންނަކީ، ވެމްކޯގެ މެނޭޖިން ޑައިރެކްޓަރު މުޖުތަބާ އަލީ (މުޖޭ) އަދި ހެންވޭރު ހުޅަނގު ދާއިރާގެ މެންބަރު އަލީ އިބްރާހިމް (ކައްޕި) އެވެ. ވައިސް ޗެއާމަންގެ މަގާމަށް އިންތިޚާބު ކޮށްފައި ވަނީ އަލްއުސްތާޛް އަލީ ރަޝީދު އަޙުމަދު އެވެ.

ނިއު ރޭޑިއަންޓުގެ އައު ބޯޑު މެމްބަރުންގެ ގޮތުގައި އިންތިޚާބު ކޮށްފައި ވަނީ އިސްމާއީލް ރަޝީދު (ހުންގާނު)، އަޙުމަދު ޔޫސުފް، އަޙުމަދު މޫސާ، މުޙައްމަދު ޔޫސުފް، ޒަހީނުއްދީން ސައީދު، މޫސާ ސާއިދު، މުޙައްމަދު އަލީ، އުމަރު ފަރުހާން، އަބްދުﷲ އަބޫބަކުރު އަދި މުޙައްމަދު ޝަކީލް އެވެ. މީގެ ތެރެއިން ޝަކީލް އަކީ ޙައްޖު ކޯޕަރޭޝަން ލިމިޓެޑުގެ މެނޭޖިން ޑައިރެކްޓަރު އެވެ.