އަންހެނުންގެ ޔޫރޯ މުބާރާތް ބާއްވާނެ ޤައުމަކަށް ސްވިޒަލެންޑް

އަންހެނުންގެ ޔޫރޯ ފުޓުބޯޅަ މުބާރާތް ބާއްވާނެ ޤައުމަކަށް ސްވިޒަލެންޑް ހަމަޖައްސައިފި އެވެ.

އަންހެނުންގެ ޔޫރޯ މުބާރާތް ބާއްވާނެ ޤައުމުގެ ގޮތުގައި ޔުއެފާ އިން ސްވިޒަލެންޑް އިއުލާންކޮށްފައި ވަނީ އަންގާރަ ދުވަހު އެވެ. ސްވިޒަލޭންޑުން އެންމެ ފަހުން ބޮޑު ފުޓްބޯޅަ މުބާރާތެއް ބާއްވާފައިވަނީ 2008 ވަނަ އަހަރު އެވެ. އެ އަހަރުގެ ފިރިހެން ޔޫރޯ މުބާރާތް އެ ޤައުމުގައި ކުރިއަށް ގެންދިޔައީ އަވަށްޓެރި އޮސްޓްރިއާއާ އެކުވެގެންނެވެ. މުބާރާތް ބާއްވާނެ ޤައުމުގެ ގޮތުގައި ސްވިޒަލެންޑްގެ ނަން ހާމަކުރެއްވުމަށްފަހު ވާހަކަ ދައްކަވަމުން ޔުއެފާގެ ރައީސް އަލެކްސަންޑަ ޗެފެރިން ވިދާޅުވީ، ވާދަވެރި މަރުހަލާއަކަށް ފަހު، އަދި ތިން ބުރުގެ މަތިން ވޯޓުލުމަށްފަހު ޑިމޮކްރަޓިކް އުސޫލެއްގެ މަތިން 2025 ވަނަ އަހަރުގެ އަންހެން ޔޫރޯ މުބާރާތް ބޭއްވުމަށް ސްވިޒަލެންޑް ހޮވިފައިވާ ކަމަށެވެ.

އެކަމާ ގުޅިގެން ސްވިޒަލެންޑްގެ ފުޓުބޯޅަ އިދާރާގެ ރައީސް ޑޮމިނިކް ބްލާންކް ވިދާޅުވީ، މިއީ ސްވިޒަލެންޑާއި އެ ޤައުމުގެ ފުޓުބޯޅަ އިދާރާގެ އިތުރުން އަންހެން ފުޓުބޯޅަ އަށް ތާރީޚީ ދުވަހެއް ކަމަށެވެ. އަދި މިއެޅުނު ބޮޑު ފިޔަވަޅަކީ ހުރިހާ ފެންވަރެއްގައި ވެސް އަންހެން ފުޓްބޯޅައިގެ ކުރިއެރުން ބައްޓަން ކުރާނެ ފިޔަވަޅެއް ކަމަށެވެ. މީގެ އިތުރުން އޭނާ ވިދާޅުވީ މުބާރާތް ރާވައި ހިންގައި، އިންތިޒާމު ކުރުމަށް ޚާއްސަ ބަޔަކު އުފައްދަވާނެ ކަމަށެވެ. އަދި އެކަމާ ގުޅޭ ވޯކްޝޮޕްތަކާއި، އެހެނިހެން ޕްރޮގްރާމްތައް އޭޕްރީލް މަހާއި މެއި މަހު ކުރިއަށް ގެންދިޔުމަށް މިހާރު ވެސް ޔުއެފާއާއެކު މަޝްވަރާކުރެވިފައިވާ ކަމަށެވެ.

މި މުބާރާތް ކުރިއަށް ގެންދިޔުމަށް ހަމަޖެހިފައިވާ ތާރީޚަކީ ޖޫން އަދި ޖުލައި މަހަށް ވާ ގޮތަށެވެ. މުބާރާތް ކުރިއަށް ދާނީ ހަތަރު ހަފްތާގެ މުއްދަތަކަށް ކަމަށް ވެސް އެ ޤައުމުގެ ފުޓުބޯޅަ އިދާރާ އިން ބުނެ އެވެ. މުބާރާތް ކުރިއަށް ގެންދާނީ އެ ޤައުމުގެ ސިޓީތައް ކަމަށްވާ ބާސެލް، ބާން، ޖެނީވާ، ޒޫރިކް، ސެއިންޓް ގަލެން، ސިއޮން، ލޫސާން އަދި ތޫން ގައެވެ.

އަންހެން ޔޫރޯ ބޭއްވުމަށް ބިޑު ކުރި ޤައުމުތަކުގެ ތެރޭގައި ފްރާންސް، ޕޮލޭންޑް އަދި ޑެންމާކު، ފިންލެންޑް، ނޯވޭ، ސްވިޑެން އެކުގައި ހުށަހެޅި ޖޮއިންޓު ބިޑު ވެސް ހިމެނެ އެވެ. މުބާރާތް އެންމެ ފަހުން 2022 ވަނަ އަހަރު އިނގްލެންޑުންގައި ބޭއްވިއިރު، ވެމްބްލީ ސްޓޭޑިއަމްގައި ކުޅުނު ފައިނަލް މެޗުގައި ޖަރުމަނު ބަލިކޮށް އިނގްލެންޑުން ވަނީ ޗެމްޕިއަންކަން ހޯދާފަ އެވެ.