ޕެނަލްޓީ ގައި ކުރި ހޯދައި އިންގްލެންޑު ސެމީ ފައިނަލަށް

ޖަރުމަނުގައި މިހާރު ކުރިއަށްދާ ޔޫރޯ ފުޓުބޯޅަ މުބާރާތުގެ ކުއާޓާ ފައިނަލްގައި ސްވިޒަލެންޑުގެ މައްޗަށް ކުރި ހޯދައި، އިންގްލެންޑުން މުބާރާތުގެ ސެމީ ފައިނަލް އިން ޖާގަ ހޯދައިފި އެވެ.

ހޮނިހިރު ދުވަހުގެ ރޭ ސްވިޒަލެންޑާ ދެކޮޅަށް ކުޅުނު މެޗު އިންގްލެންޑުން ކާމިޔާބު ކުރީ ޕެނަލްޓީ ގައި ކުރި ހޯދައިގެންނެވެ. މެޗުގައި ސްވިޒަލެންޑުން ލަނޑު ޖަހައި ކުރި ހޯދާފައި ވަނިކޮށް، އިންގްލެންޑުން ވަނީ ނަތީޖާ ހަމަހަމަ ވެސް ކޮށްފަ އެވެ.

މެޗުގެ ލަނޑުތައް ދެ ޓީމުން ވެސް ޖެހީ ދެ ވަނަ ހާފުގަ އެވެ. އޭގެ ކުރިން ފުރަތަމަ ހާފުގައި ދެ ޓީމުގެ ފަރާތުން ވެސް ދާދި ހަމަހަމަ ކުޅުމެއް ފެނުނުއިރު، ދެ ޓީމުން ވެސް ވަނީ ލަނޑު ޖެހުމަށް މަސައްކަތް ކޮށްފަ އެވެ.

މެޗުގެ ދެ ވަނަ ހާފުގައި އެންމެ ފުރަތަމަ ލަނޑު ޖަހައި ކުރި ހޯދީ ސްވިޒަލެންޑުންނެވެ. މެޗުގެ 75 ވަނަ މިނެޓުގައި ސްވިޒަލެންޑަށް ލީޑު ނަގައިދިނީ ބްރީލް އެމްބޯލޯ އެވެ. އޭގެ ފަހުން އިންގްލެންޑުން މެޗުގެ ނަތީޖާ ހަމަހަމަ ކުރުމަށް ކުރި މަސައްކަތް ކާމިޔާބުވީ 80 ވަނަ މިނެޓުގަ އެވެ. ޑެކްލަން ރައިސް ޖައްސާލި ބޯޅައެއް، އޭރިޔާ ކައިރިން ގޯލުގެ ކަނަށް ފޮނުވާލައިގެން އިންގްލެންޑަށް ނަތީޖާ ހަމަހަމަ ކޮށްދިނީ ބުކާޔޯ ސަކާ އެވެ.

މެޗުގެ 90 މިނެޓުގެ ކުޅުން ނިމުނުއިރު، ދެ ޓީމު އެއްވަރުވެފައި އޮތުމުން އިތުރު ވަގުތުގެ ދެ ހާފު ވަނީ ކުޅެފަ އެވެ. 15 މިނެޓުގެ ދެ ހާފު ނިމުނުއިރު ވެސް އެއްވެސް ޓީމަކަށް ލަނޑެއް ނުޖެހެ އެވެ. އިތުރު ވަގުތުގެ ފަހު ހާފުގައި ސްވިޒަލެންޑުން ވަނީ އިންގްލެންޑުގެ ޑިފެންސް އަށް ބާރުބޮޑު ކޮށްފަ އެވެ. ނަމަވެސް އިންގްލެންޑުގެ ގޯލު ކީޕަރު ޖޯޑަން ޕިކްފޯޑް ވަނީ ރަނގަޅު ބޯޅަތަކެއް ސަލާމަތް ކޮށްފަ އެވެ.

މެޗުގެ ނަތީޖާ ނެރުމަށް ޖެހި ޕެނަލްޓީ ގައި އިންގްލެންޑުން ވަނީ ފަސް ޕެނަލްޓީ ވެސް ކާމިޔާބުކޮށްފަ އެވެ. އެއީ ކޯލް ޕާމާ، ޖޫޑް ބެލިންހަމް، ސަކާ، އިވާން ޓޯނޭ އަދި ޓްރެންޓް އެލެކްސެންޑާ އާނޯލްޑްގެ ޕެނަލްޓީ އެވެ. ސްވިޒަލެންޑަށް ކާމިޔާބު ކުރެވުނީ ތިން ޕެނަލްޓީ އެވެ. އެއީ ފަބިއަން ޝެއާ، ޒެރްޑަން ޝަގީރީ އަދި ޒެކީ އަމްދޫނީ އެވެ. އެ ޓީމުގެ މެނުއަލް އަކަންޖީ ފޮނުވާލި ޕެނަލްޓީ ޕިކްފޯޑް ވަނީ މަތަކޮށްފަ އެވެ.

މީގެ ކުރިން 2021 ވަނަ އަހަރު އަމިއްލަ ޤައުމުގައި އޮތް ޔޫރޯގެ ފައިނަލްގައި ވެސް އިންގްލެންޑުން ވަނީ ކުޅެފަ އެވެ. އެ އަހަރުގެ ފައިނަލް ގައި އިޓަލީ އަތުން އިންގްލެންޑު ބަލިވީ ވެސް ޕެނަލްޓީންނެވެ. މިއަހަރުގެ ޔޫރޯގެ ސެމީ ފައިނަލްގައި އިންގްލެންޑު ނިކުންނާނީ ނެދަލެންޑްސް އާއި ތުރުކީ ކުޅޭ މެޗުން މޮޅުވާ ޓީމަކާ ދެކޮޅަށެވެ.