ޖަރުމަނާ ދެކޮޅަށް ނިކުންނައިރު، ޔަކިން އަށް ޕްރެޝަރެއް ނެތް

ޔޫރޯ ފުޓުބޯޅަ މުބާރާތުގެ ގްރޫޕް ސްޓޭޖުގެ ފަހު މެޗުގައި ޖަަރުމަނާ ދެކޮޅަށް ނިކުންނައިރު، ސްވިޒަލެންޑަށް އެއްވެސް ޕްރެޝަރެއް ނޯންނާނެ ކަމަށް އެ ޓީމުގެ ކޯޗު މުރާތު ޔަކިން ބުނެފި އެވެ.

ޖަރުމަނާ ދެކޮޅަށް ނިކުންނައިރު، މުބާރާތުގެ ގަދަ 16 ވަނަ ބުރުން ޖާގަ ހޯދުމުގެ ފުރުސަތު ސްވިޒަލެންޑަށް އޮންނާނެ އެވެ. އެއީ ގްރޫޕްގެ ގަދަ ދެ ޓީމުގެ ތެރެއިން ހިމެނިގެން، ނުވަތަ އެންމެ ރަނގަޅު ނަތީޖާ ހޯދާ ތިން ވަނަ ޓީމުގެ ތެރޭގައި ހިމެނިގެންނެވެ.

ޖަރުމަނު މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން ޔަކިން ބުނީ، އެ މެޗަށް އޭނާގެ ހުރިހާ ކުޅުންތެރިން ވެސް ފިޓު ކަމަށެވެ. ޓީމުގައި އަނިޔާގެ އެއްވެސް މައްސަލައެއް ނެތް ކަމަށާއި، ކުޅުންތެރިން ތިބީ މެޗަށް ވަރަށް ފުރިހަމަ އަށް ތައްޔާރަށް ކަމަށް ވެސް އޭނާ ބުންޏެވެ.

މީގެ އިތުރުން އޭނާ ބުނީ ސްވިޒަލެންޑަށް މެޗުގައި ޕްރެޝަރެއް ނެތް ކަމަށާއި، ކޮންމެހެން މެޗުން މޮޅުވުން ވެސް އެ ޓީމަށް މަޖުބޫރު ނޫން ކަމަށެވެ. އެހެން ނަމަވެސް ސްވިޒަލެންޑުން ކުޅޭނީ އިދިކޮޅު ޓީމަށް އުނދަގޫ ވާނެހެން ކަމަށާއި، އެ ޓީމާ ދެކޮޅަށް ކުޅެން ފަސޭހަ ނުވާނެކަން ވެސް ދައްކައިދޭން ބޭނުންވާ ކަމަށް ވެސް ޔަކިން ވަނީ ބުނެފަ އެވެ.

ޔަކިން ވެސް ބުނީ ޖަރުމަނާ ދެކޮޅަށް ކުޅޭ މެޗަކީ ޝައުޤުވެރި މެޗަކަށް ވާނެ ކަމަށެވެ. ޔަކިން ސިފަ ކުރި ގޮތުގައި އެ މެޗަކީ އޭނާ އާއި ޖަރުމަނުގެ ކޯޗު ހޫލިއަން ނާގަލްސްމަންގެ އުކުޅުތަކުގެ ވާދަވެރިކަން ފެންނާނެ މެޗެކެވެ. އެހެންކަމުން ސްވިޒަލެންޑުން ބޭނުން ވަނީ އެ ޓީމުގެ އެންމެ ފުރިހަމަ ކުޅުން ދައްކަން ކަމަށް ވެސް ޔަކިން ބުންޏެވެ.

މީގެ އިތުރުން އޭނާ ބުނެފައި ވަނީ ޖަރުމަނަކީ މުބާރާތް ބާއްވާ ޤައުމު ކަމަށްވީ ނަމަވެސް، އެ ޤައުމާ ދެކޮޅަށް ސްވިޒަލެންޑުން ޖެހިލުންވެ ބިރުން ނުތިބޭނެކަން ސާބިތު ކޮށްދޭން ބޭނުންވާ ކަމަށެވެ. ސްވިޒަލެންޑުގެ ކުޅުންތެރިންނާ މެދު އޭނާގެ ފުރިހަމަ އިތުބާރު އޮންނަ ކަމަށް ވެސް ޔަކިން ބުންޏެވެ.

ގްރޫޕް ސްޓޭޖުގެ ފަހު މެޗުގައި ސްވިޒަލެންޑުން ޖަރުމަނާ ދެކޮޅަށް ނިކުންނާނީ އާދިއްތަ ދުވަހުގެ ރޭ ދަންވަރު 12 ޖަހާއިރު އެވެ.