ކީޕަރު ޓޮޕްލަކް ނިއުރޭޑިއަންޓަށް
ނިއުރޭޑިއަންޓުން އެފްއޭކަޕްގައިވެސް ވާދަކުރާނެ
ޓޮޕްލަކް ނިއުރޭޑިއަންޓަށް ސޮއިކުރުމަށްފަހު: ފޮޓޯ-ނިއުރޭޑިއަންޓް
ފުރަތަމަ ޑިވިޝަންގެ ގިނަ ކްލަބްތަކަކަށް ކުޅުނު ކީޕަރު ތޮލާލް ހަސަން (ޓޮޕްލަކް) ދެވަނަ ޑިވިޝަންގައި ނިއުރޭޑިއަންޓަށް ކުޅެން އެއްބަސްވެއްޖެއެވެ.
ކުރިން ޤައުމީ ޓީމްގައިވެސް ހިމެނުނު ކީޕަރު ޓޮޕްލަކް އަކީ ވިކްޓްރީއާއި ވެލެންސިޔާއާއި ވީބީއާއި ޔުނައިޓެޑް ވިކްޓްރީއަށްވެސް ކުޅުނު ކީޕަރެކެވެ. ދެވަނަ ކީޕަރެއްގެ ގޮތުގައި ފާހަގަކުރެވުނު ކީޕަރު ބޮޑަތި ކްލަބްތަކުގައި މުހިއްމު ވަގުތު ގޯލް ބަލަހައްޓާފައި ވެއެވެ. މިދިޔަ ސީޒަންގައި ޤައުމީ ކީޕަރު ފައިސަލްގެ އެހީ ވެލެންސިޔާއަށް ނުލިބި ދިޔަ ވަގުތު ގޯލް ބެލެހެއްޓީވެސް ޓޮޕްލަކްއެވެ. އޭގެތެރޭގައި އޭއެފްސީ ކަޕްގެ ކޮލިފައިން ޕްރިލިމިނަރީ ފުރަތަމަ ބުރުގެ މެޗުވެސް ހިމެނެއެވެ. ޓޮޕްލަކަކީ 2018 ވަނަ އަހަރު ސާފް ޗެމްޕިއަންޝިޕް ޤައުމީ ޓީމުން ހޯދިއިރުވެސް ސްކޮޑްގައި ހިމެނުނު ކީޕަރެކެވެ.
ނިއުރޭޑިއަންޓުން ތައްޔާރުވަނީ ދެވަނަ ޑިވިޝަންގައި ވާދަކޮށް އަލުން ފުރަތަމަ ޑިވިޝަންގެ ޖާގަ ހޯދާށެވެ. މިދިޔަ އަހަރު އެމަސައްކަތް ކާމިޔާބެއް ނުވިއެވެ. މިއަހަރު އެފްއޭކަޕްގައިވެސް ވާދަކުރާނެކަން ކްލަބުން ވަނީ ހާމަކޮށްފައެވެ. މިހާތަނަށް ސޮއިކުރި ކުޅުންތެރިންގެ ތެރޭގައި ފުރަތަމަ ޑިވިޝަންގައި ކުޅުނު ޔަސްފާދު ހަބީބުއާއި އަހުމަދު އަޔާޒު ހިމެނެއެވެ.
