ފްރާންސްގެ ޗެމްޕިއަންސް ޕެރިސް ސެއިންޓް ޖާމަން (ޕީއެސްޖީ) ގެ މުސްތަޤުބަލާމެދު އަބަދު ވެސް ވިސްނަވާނެ ކަމަށާއި، ގޯހެއް ނުހައްދަވާނެ ކަމަށް އެ ކުލަބުގެ ރައީސް ނާސިރު އެލް ހެއްލާފީ ވިދާޅުވެއްޖެ އެވެ.
ނާސިރު އެލް ހެއްލާފީ މިހެން ވިދާޅުވީ ޕީއެސްޖީގެ ކުރިމަގާ ގުޅޭ ގޮތުން ވާހަކަ ދައްކަވަމުންނެވެ. އެގޮތުން މި ސީޒަންގެ ޔުއެފާ ޗެމްޕިއަންސް ލީގުން ޕީއެސްޖީ ކެޓުމާއެކު ޓީމުގައި ތިބި މުހިންމު ކުޅުންތެރިންގެ މުސްތަޤުބަލާމެދު ވަނީ ގިނަ ސުވާލުތަކެއް އުފެދިފަ އެވެ. އެގޮތުން ޕީއެސްޖީ އަށް ކުޅެމުން އަންނަ ފްރާންސްގެ ކެޕްޓަން ކީލިއަން އެމްބާޕޭ އާއި އާޖެންޓީނާގެ ކެޕްޓަން ލިއޮނަލް މެސީ އަދި ސްޕެއިންގެ ސާޖިއޯ ރާމޯސްގެ މުސްތަޤުބަލާމެދު ފްރާންސްގެ މީޑިއާ ތަކުގައި ވެސް ވަނީ ސުވާލު އުފައްދައިފަ އެވެ. އެކަމާ ގުޅިގެން ސުވާލު ކުރުމުން ނާސިރު އެލް ހެއްލާފީ ވިދާޅުވީ، ޕީއެސްޖީން މަސައްކަތް ކުރަމުން އަންނަނީ އެ ތިން ކުޅުންތެރިން ވެސް ކުލަބުގައި ބޭތިއްބުމަށް ކަމަށެވެ. އޭނާ ވިދާޅުވީ އެއްބަސްވުމާ ގުޅޭ ގޮތުން އެ ކުޅުންތެރިންނާ ދައްކަން ޖެހޭ ވާހަކަތައް ޕީއެސްޖީން ދައްކަމުން ގެންދާނެ ކަމަށެވެ.
މީގެ އިތުރުން އޭނާ ވިދާޅުވީ، ޕީއެސްޖީން މިހާރު ކުރަމުން އަންނަނީ ކޮންކަމެއްތޯ ވަރަށް ރަނގަޅަށް ބައްލަވާނެ ކަމަށެވެ. ހަމައެއާއެކު ކުރިއަށް އޮތް ތަނުގައި ކަންތައް ކުރަން ޖެހޭނީ ކޮން ގޮތަކުންތޯ ވެސް ބައްލަވާނެ ކަމަށާއި، ކުރިއަށް ދެވެން އޮތް މަގެއް ހޯއްދަވާނެ ކަމަށެވެ. ނާސިރު އެލް ހެއްލާފީ ވިދާޅުވީ އެކަންކަމަކީ ޕީއެސްޖީން ކުރިއަށް ދާން އަބަދު ވެސް ކުރާ ކަންތައްތަކެއް ކަމަށާއި، ކުރިއަށް ދިޔުމުގައި "ގޯހެއް" ނުހައްދަވާނެ ކަމަށެވެ.
ޕީއެސްޖީން އެންމެ ބޮޑަށް ތައްޔާރުވަމުން އަންނަ އެއް މުބާރާތަކީ ޔުއެފާ ޗެމްޕިއަންސް ލީގެވެ. ނަމަވެސް މިއަހަރުގެ މުބާރާތުގެ ގަދަ 16 އިން އެ ޓީމު ކެޓީ ބަޔާން މިއުނިކް އަތުން ދެ ލެގުގައި ވެސް ބަލިވެގެންނެވެ. އެ މުބާރާތުގައި ޕީއެސްޖީ އަށް އެންމެ ދުރަށް ދެވުނީ 2019-2020 ވަނަ އަހަރު އެވެ. އެ އަހަރުގެ ފައިނަލްގައި ޕީއެސްޖީ ބަލިވެފައި ވަނީ ވެސް ބަޔާން އަތުންނެވެ.
