ވެރާޓީ އަށް 80 މިލިއަން ޔޫރޯއަށްވުރެ ގިނައިން ހަރަދުކުރަން ބާސާ ބޭނުމެއްނުވޭ

ޕެރިސް ސެއިންޓް ޖާމަން (ޕީއެސްޖީ) އަށް ކުޅެމުން އަންނަ މާކޯ ވެރާޓީ އަށް 80 މިލިއަނަށްވުރެ ގިނައިން ޚަރަދުކުރަން ބާސެލޯނާ ބޭނުންނުވާ ކަމަށް ރިޕޯޓްތައް ބުނެފިއެވެ.

މި ޓްރާންސްފާ ވިންޑޯގައި ބާސާއިން އެންމެ ބޮޑަށް ހޯދަން ބޭނުންވަނީ ވެރާޓީކަމަށް ރިޕޯޓްތައް ބުނާއިރު، އޭނާ ހޯދުމަށް އެ ކްލަބުން މަސައްކަތްކުރަމުން އަންނަތާ ދުވަސްތަކެއްވެއްޖެއެވެ. އެގޮތުން ބާސާ އިން ހުށަހެޅި ހުށަހެޅުންތައް ޕީއެސްޖީން ވަނީ މިދިޔަ ޓްރާންސްފާ ބާޒާރުގައިވެސް ރިޖެކްޓްކޮށްފައެވެ.

ވެރާޓީ ހޯދުމަށް ބާސާ އަށް 80 މިލިއަން ޔޫރޯ ހަރަދުނުކުރެވޭކަމަށް ރިޕޯޓްތައް ބުނާއިރު، ބާސާ އިން ވަނީ ކްލަބުގެ ޚަރަދުކުޑަކުރުމަށް ފައިސާ ޚަރަދުކުރާ މިންވަރު މަދުކޮށްފައެވެ. ބާސާއިން ވަނީ 2014 ވަނަ އަހަރު މީގެކުރިން ލިވަޕޫލަށް ކުޅުނު ލުއިސް ސުއަރޭޒް 81 މިލިއަން ޕައުންޑަށް އެޓީމަށް ގެންގޮސްފައެވެ.

ބާސާއިން ހޯދުމަށް މަސައްކަތްކުރަމުން އަންނަ ވެރާޓީ ހޯދުމަށް ލިޔޯން އަދި ބަޔާން އިންވެސް މަސައްކަތްކުރެއެވެ. މީގެއިތުރުން އޭނާ ހޯދުމަށް ޕްރިމިއާ ލީގުގެ ބައެއް ކްލަބްތައްވެސް އަންނަނީ މަސައްކަތްކުރަމުންނެވެ.

އެހެންނަމަވެސް ޕީއެސްޖީގެ ކޯޗު ކާލޯ އެންޗޮލޮޓީ ވެރާޓީ ވިއްކާލަން ބޭނުން ނުވާކަމަށާއި، ދިގު މުއްދަތެއްގައި ކްލަބުގައި ވެރާޓީ ބަހައްޓަން އެންޗޮލޮޓީ ބޭނުންވާކަމަށް ރިޕޯޓްތައް ބުނެއެވެ.

ޕީއެސްޖީއާ 2012 ވަނަ އަހަރު ގުޅުނު ވެރާޓީ ވަނީ އެ ކްލަބުގައި 2020 ވަނަ އަހަރުގެ ނިޔަލަށް މަޑުކުރަން ނިންމާފައެވެ. އެގޮތުން ދާދި ފަހުން ނޫސްވެރިންނާ ބައްދަލުކޮށް ވާހަކަދައްކަމުން ވެރާޓީ ބުނީ މީގެ ހަތަރު އަހަރު ކުރިން އޭނާ ޕީއެސްޖީއަށް ބަދަލުވީ ދުނިޔޭގެ އެންމެ ޝަރަފުވެރި އެއް މުބާރާތް ކާމިޔާބުކުރުމުގެ އަޒުމުގައި ކަމަށާއި، އަދިވެސް އެ ހުވަފެން ހަގީގަތަކަށް ހަދަން އޭނާ ބޭނުންވާ ކަމަށެވެ.

ވެރާޓީ ވަނީ ޕީއެސްޖީއާއެކު ހޭދަކުރި ފަސް ސީޒަނުގައި 201 މެޗު ކުޅެދީ ހަ ލަނޑު ކާމިޔާބުކޮށްފައެވެ. މީގެ އިތުރުން އޭނާ ވަނީ އިޓަލީ ގައުމީ ޓީމަށް ކުޅުނު 21 މެޗުގައި އެއް ލަނޑު ކާމިޔާބުކޮށްފައެވެ. ވެރާޓީ ވަނީ ހަތަރު ލީގު ތަށި، ދެ ލީގް ކަޕް، ހަތަރު ފްރެންޗް ސުޕާކަޕް ކާމިޔާބުކޮށްފައެވެ. މީގެއިތުރުން އޭނާ ވަނީ ސެރީއާ ބީގެ ޕެސްކާރާއާ އެކުވެސް ގިނަ ކާމިޔާބީތައް ހޯދާފައެވެ.