މީހުން ގެއްލުން: ހީކުރާ ވަރަށްވުރެ ސީރިއަސް!

މިދިޔަ އަހަރުގެ ޑިސެމްބަރު 28 ވަނަ ދުވަހެވެ. ދެމީހަކު ކަނޑުމައްޗަށް ނުކުމެ އުޅެނިކޮށް ޚަބަރެއް ނުވެގެން އެ ދެމީހުން ހޯދުމުގެ މަސައްކަތް ފުލުހުން ފެށި ޚަބަރު ލިބުނެވެ. ގެއްލިގން ހޯދަމުންދިޔައީ ބަންގްލަދޭޝަށް ނިސްބަތްވާ މުހައްމަދު ލިޓަންއާއި، ގދ. ތިނަދޫ މަނާރު، މުހައްމަދު ނިޒާމްއެވެ. އެމީހުން ދަތުރުކުރަމުންދިޔައީ ތެޔޮ ބޯޓެއްގައެވެ.

އެ ދެ މީހުން ހޯދުމުގެ މަސައްކަތް ކުރިއަށްދަނިކޮށް ހުޅުލެ ނެރު ކައިރިން ދެ މީހުން ދަތުރުކުރި ތެޔޮބޯޓު ވަނީ ފެނިފައެވެ. ދެ މީހުން ގެއްލުނުތާ ތިން ދުވަސް ފަހުން ނިޒާމް ފެނިފައިވެއެވެ. އޭނާ ވަކިން ފެނުމާއެކު ގިނަ ބައެއްގެ ޝައްކުތައް އޭނާއާމެދު އުފެދިގެންދިޔައެވެ. ނިޒާމް މާލެއިން ފެނިގެން ފުލުހުން ވަނީ ޖެނުއަރީ 3ގައި އޭނާ ހައްޔަރުކޮށްފައެވެ. މިހާތަނަށް އައިއިރުވެސް ލިޓަން ފެނިފައިނުވާއިރު ނާޒިމްގެ މައްޗަށް ކުރަނީ ލިޓަން މަރާލިކަމުގެ ތުހުމަތެވެ. އޭނާގެ މައްޗަށް 3 ދައުވާއެއް އުފުލާފައިވާއިރު މި މައްސަލައިގެ ޝަރީއަތުގެ މަރުހަލާވެސް ދަނީ ކުރިއަށެވެ.

މި ހާދިސާގެ ތަންކޮޅެއް ކުރިން ހިނގާފައިވާ ހާދިސާއަކަށް ބަލާލާނަމެވެ. މިދިޔަ އަހަރުގެ ސެޕްޓެމްބަރު މަހުގެ 19 ވަނަ ދުވަހު ފުލުހުން ވަނީ ހުޅުމާލެ ދެވަނަ ފިޔަވަހިން ދިވެހި ފިރިހެނަކު ގެއްލިގެން އޭނާ ހޯދުމުގެ މަސައްކަތް ފަށާފައެވެ. ދެ ހަފްތާއަށް ވުރެ ގިނަ ދުވަހު ފުލުހުން ވަނީ އޭނާ ހޯދުމުގެ މަސައްކަތް ކޮށްފައެވެ. އޭނާ ފެނިފައިވަނީ ޖެހިގެން އައި އޮކްޓޯބަރު މަހުގެ 2 ވަނަ ދުވަހުއެވެ. އޭނާ ފެނުނީ ހުޅުމާލެ ނިރޮޅު މަގުގައި ހުންނަ ސްކޭޓް ޕާކު ސަރަހައްދާއި ވޯޓަރ ތީމް ޕާކު ހަދަން ދޫކޮށްފައިވާ ސަރަހައްދުގައި މަރުވެފައި އޮއްވައެވެ. ހިތާމަވެރި ދެ ހާދިސާއެވެ.

2021 ވަނަ އަހަރުގެ މެއި މަހު ހިނގާފައިވާ ހަމަ މިފަދަ ހާދިސާއަކަށް ބަލާލާނަމެވެ. 2021 ވަނަ އަހަރުގެ މެއި 14 ވަނަ ދުވަހު ފުލުހުން ވަނީ ހދ. ނޮޅިވަރަންފަރު، މޯނިންގްސަން، މިސްބާހު މުހައްމަދު ގެއްލިގެން ހޯދަން ފަށާފައެވެ. އޭނާ ހޯދުމުގެ މަސައްކަތް ކުރަމުންދަނިކޮށް އޭނާ ފެނުނީ ޕާކިސްތާނުގެ ޑްރަގް ނެޓްވާރކެއްގައި ރަހީނުކޮށްފައި ހުއްޓައެވެ.

މިހާރުވެސް އެކި ފަހަރުމަތިން އެކި ސަރަހައްދުތަކުން ބޮޑެތި މީހުންނާއި ކުޑަކުދިން ގެއްލިގެން ފުލުހުން ގެންދަނީ އިއުލާނުކުރަމުންނެވެ. މިފަދަ ކޮންމެ ޚަބަރަކީ މިހާރު ގިނަ ބަޔަކަށް ބިރުވެރިކަން ގެނުވާ ޚަބަރުތަކެކެވެ. މީގެ ކުރިން ހިނގާފައިހުރި ހާދިސާތަކަށް ބަލައި އަހަރުމެން ދިވެހިން ދިރިއުޅެމުންމިދާ މާހައުލަކީ ރައްކާތެރި މާހައުލެއް ކަމާއިމެދު ސުވާލު އުފެދެއެވެ. ކަނޑުމަތިންނާއި އެއްގަމުން އެކި ފަހަރުމަތިން މީހުން ގެއްލިގެން އިއުލާނުކުރާއިރު މީގެ ތެރޭގައި އަދިވެސް ގެއްލިފައިވާ މީހުން އެބަތިއްބެވެ. ކަމުގެ ބިރުވެރިކަން އިންތިހާއަށް ބޮޑެވެ.

އެހެންނަމަވެސް ބައެއް މީހުންނަށް މިކަމުގެ ސީރިއަސްކަން އަދިވެސް ނޭނގެއެވެ. އެމީހުން ހޯދަން އިއުލާނުކުރުމުން ސޯޝަލް މީޑިއާގައި ޖޯކު ޖަހާ މީހުން މަދެއް ނޫނެވެ. އެމީހުން "ގެއިން ނިކުމެގެން ދިޔައީ" ކަމާއި، "މާދަމާ ފެންނާނެ" ކަމަށް ބުނެއެވެ. ކުޑަކުއްޖެއް ގެއްލިގެން އިއުލާނުކޮށްފިނަމަ "ރައްޓެހިވެގެން އުޅޭ ކުއްޖާއާއެކު ފިލީ" ކަމަށް ބުނެއެވެ. މިއީ ޖޯކަކަށް ހަދަންޖެހޭ ކަމަކަށްވުރެ ސީރިއަސް ކަމެކެވެ.