އެސްޓީއޯއިން އިންޑަސްޓްރިއަލް ޒޯންގައި ހޯލްސޭލް ކައުންޓަރެއް ހުޅުވައިފި

މިއަހަރުގެ ރޯދަމަހަށް ހާއްސަކޮށްގެން ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އިން މާލޭ އިންޑަސްޓްރިއަލް ޒޯނުގައި ހޯލްސޭލް ކައުންޓަރެއް ހުޅުވައިފިއެވެ.

އެސްޓީއޯއިން ބުނި ގޮތުގައި މި ހޯލްސޭލް ކައުންޓަރު ހުޅުވާފައިވަނީ މާލޭ އިންޑަސްޓްރިއަލް ޒޯނުގައި ހުންނަ ގްރޭޓާ މާލެ ބަސް ޓާމިނަލުގެ ހުޅަނގުގައެވެ. އެ ކައުންޓަރުން މިހާރު ވަނީ ޚިދުމަތް ދޭން ފަށައިފައެވެ.

މިއީ ރޯދަމަހަށް އެސްޓީއޯގެ މުދާ އާންމުންނަށް ފަސޭހަކަމާއެކު ފޯރުކޮށްދިނުމަށް އެޅި ފިޔަވަޅެއް ކަމަށް އެސްޓީއޯއިން ބުނެއެވެ. އަދި އެ ކައުންޓަރާއެކުއެ ކުންފުނީގެ މައި ހޯލްސޭލް ސެންޓަރުގެ އިތުރުން އިންޑަސްޓްރިއަލް ޒޯނުގައި ހުންނަ އެ ކުންފުނީގެ ގުދަނުން ވެސް ފައިސާ ބަލައިގަނެ، އިންވޮއިސް ހެދުމާއި މުދާ ދޫކުރުމުގެ ޚިދުމަތް ލިބޭނެ ކަމަށް ވެސް އެ ކުންފުނިން ބުނެއެވެ.

މީގެ އިތުރުން ހުޅުމާލެ ދެވަނަ ފިޔަވަހީގައި ރޯދައަށް ހާއްސަކޮށްގެން އެ ކުންފުނިން ހުޅުވާ ރޯދަ މާޓުން ވެސް އެ ހުރިހާ ހިދުމަތެއް ލިބޭނެ ކަމަށް އެސްޓީއޯއިން ބުނެއެވެ.