މި ސަރުކާރުގައި އެމްއޭސީއެލް ވަނީ ފެނަކައާ އެއް ދަރަޖައަކަށް ވައްޓާލާފައި: އަމްރު
ޒަމާނުއްސުރެ ރަނގަޅަށް ހިންގަމުންދާ ސަރުކާރުގެ ކުންފުނިތައް ވަރަށް މަދު
ރާއްޖެޓީވީގެ ފަލަސުރުހީ ޕްރޮގްރާމްގައި އެސްޓީއޯގެ ކުރީގެ މެނޭޖިން ޑިރެކްޓަރ ހުސެއިން އަމްރު ވާހަކަދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުގެ ކުރިން މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) ހިންގަމުންދިޔައީ ސިޔާސީ ނުފޫޒެއް ނެތި ވަރަށް ރަނގަޅަށް ކަމަށާއި، ނަމަވެސް މިސަރުކާރުގައި އެ ކުންފުނި ފެނަކަ ކޯޕްރޭޝަންއާ އެއްދަރަޖައަކަށް ވައްޓާލާފައިވާ ކަމަށް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)ގެ ކުރީގެ މެނޭޖިން ޑިރެކްޓަރ ހުސެއިން އަމްރު ވިދާޅުވެއްޖެ އެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި އަމްރު ވިދާޅުވީ ރާއްޖޭގައި ޒަމާނުއްސުރެ ރަނގަޅަށް ހިންގަމުންދާ ސަރުކާރުގެ ކުންފުނިތައް ވަރަށް މަދު ކަމަށެވެ.
އޭގެ ތެރޭގައި އެމްއޭސީއެލް އަދި އެސްޓީއޯއަކީ ޒަމާނުއްސުރެ ސިޔާސީ ނުފޫޒެއް ނެތި ވަރަށް ރަނގަޅަށް ހިންގަމުން އައި ދެ ކުންފުނި ކަމަށާއި، ނަތީޖާ އަބަދުވެސް ނެރޭ ކަމަށެވެ. ނަމަވެސް މިސަރުކާރުގައި މި ދެ ކުންފުންޏަށް ވެސް ސިޔާސީ ނުފޫޒު ފޯރުވައި، ހަލާކު ކުރަމުންދާ ކަމަށާއި، އެމްއޭސީއެލް ވެސް ފެނަކައަށް ޖައްސާފައިވާ ހާލު ޖައްސަމުންދާ ކަމަށެވެ. އަދި ވިދާޅުވީ ސިޔާސީ ނުފޫޒު ނުފޯރާނެ ކަމަށް ބެލި، ބޭންކް އޮފް މޯލްޑިވްސްއަށް ސިޔާސީ ނުފޫޒު ފޯރުވާފައިވާ ކަމަށެވެ.
އެމްއޭސީއެލްއަށް ގެއްލުންވާ ގޮތަށް އެއަރޕޯޓުތައް ތަރައްގީ ކުރުމުގެ މަޝްރޫއުތައް ހަވާލުކުރާކަން ފާހަގަކުރައްވައި އަމްރު ވިދާޅުވީ ރާއްޖޭގެ ރަށްތަކުގައި ކައިރި ކައިރީގައި އެއަރޕޯޓުތައް ތަރައްގީ ކުރި ނަމަވެސް އޭގެ ފައިދާއެއް ނުލިބޭނެ ކަމަށާއި، އެމްއޭސީއެލްއަށް ބޮޑު ގެއްލުމެއް ލިބޭނެ ކަމަށެވެ. އަދި އެމްއޭސީއެލުން ނަގާ ލޯނު ނުދެއްކޭނެ ކަމަށާއި، އެ ލޯނުގެ ފައިސާ ވެސް ދެއްކުމަށް އެއަރޕޯޓުން ނަގާ ފީތައް ބޮޑު ކުރާނެ ކަމަށް އޭނާ ވިދާޅުވިއެވެ.
ހަމަ ސީދާ ފެނަކައަކަށް އެ ހަދާލަނީ. އެއީ ވަރަށް ނުރައްކާތެރިކަމެއް. އެއީ ބޮޑު ލޯނެއްނަގާފައި އޮތީ. އެއް ބިލިއަން ޑޮލަރުގެ ލޯނެއް ނަގައިގެން ބޮޑު ޓާމިނަލްއެއް އެ ހެދީ. އެޓާމިނަލް ހެދީމައި އެޓާމިނަލުން އެ ފައިސާ ނުނެގޭނެތީވެ ލޯނު ދައްކަން ނުނެރެވޭނެތީ އެނގިވަޑައިގަންނަވާނެ އެއަރޕޯޓުން ފުރާ ކޮންމެ މީހެއްގެ ބޮލަށް ނަގާ އަދަދު ބޮޑު ކޮށްފި މިސަރުކާރުން. އޭރު ވިދާޅުވީ ވެސް އެ ލޯނު ދައްކަން ވެގެންނޭ. އެހެންވީމަ ބޮޑު ލޯނެއް އޮވެ، އެލޯނު ދައްކާނެ ގޮތެއް ނޭނގިގެން އެއަންނަ ފަތުރުވެރިން ވެސް ދިވެހިން ފުރާ މީހުންގެ އަތުން ވެސް އިތުރަށް ފައިސާ ނަގަމުންދަނީ. ދާއިރު ކޮންފައިސާއަކުންތޯ އަނެއްކާ އެއަރޕޯޓެއް އަޅައިގެން އަނެއްކާ އެއަރޕޯޓު ހިންގަން އުޅޭނީ. މިހާރު އެކަހަލަ އެއަރޕޯޓުތަކަކީ އާމްދަނީއެއް ލިބޭނެ އެއަރޕޯޓުތަކެއް ނޫން. ހަމަ ގެއްލުން ލިބޭނީ. ކައިރި ކައިރީގައި އެހުންނަނީ އެއަރޕޯޓުތައް. ފްލައިޓެއް ޖައްސާނީ މަދުން. ހަމައެކަނި މޯލްޑިވިއަންގެ ފްލައިޓެއް މި ޖައްސަނީ. އެހެންވީމައެއަކުން ނުލިބޭނެ މާ ބޮޑު އާމްދަނީއެއް. ކުރަންޖެހޭ ހަރަދު އިންތިހާއަށް ބޮޑުވާނެ. އެނެއްކާ މުޅި އަތޮޅު އެންމެން އެތަނަށް ވަޒީފާއަށް ވަންދަން ބޭނުންވާނެ.އެސްޓީއޯގެ ކުރީގެ މެނޭޖިން ޑިރެކްޓަރ ހުސެއިން އަމްރު
އަމްރު ވިދާޅުވީ މި ސަރުކާރުން އަމަލުކުރާ ގޮތުން ދުވަހަކަށްވުރެ ދުވަހެއް އެމްއޭސީއެލް ދާނީ ދަށަށް ކަމަށާއި، ކުންފުނި ހިންގާނީ ގެއްލުމުގައި ކަަމަށެވެ. އަދި ގެއްލުންވާނީ ރައްޔިތުންނަށް ކަަމަށް އޭނާ ވިދާޅުވިއެވެ.
