އޮރެންޖާއި އާފަލް އަގުބޮޑު ކުރީ ސިޔާސީ ބޭނުމުގައި، އެގަޮތަށް އެކަން ކުރިޔަކަ ނުދޭނަން: ރައީސް މުއިއްޒު

ދާދި އިހަކަށް ދުވަހު ޑޮލަރު އަގުބޮޑުވެގެންކަމަށް ބުނެ އޮރެންޖާއި އާފަލުގެ އަގު ބޮޑުކުރި ކަމަށާއި އެކަން އެގޮތަށް އެ ކުރީ ސިޔާސީ ބޭނުމެއްގައި ކަމަށް ރައީސް ޑރ މުހައްމަދު މުއިއްޒު ވިދާޅުވެއްޖެ އެވެ.

ހަތަރު އަތޮޅަކަށް މިހާރު ކުރައްވަމުންގެންދަވާ ދަތުރުފުޅުގެ ތެރެއިން ވ. ފެލިދޫއަށް ވަޑައިގެން އެރަށުގެ ރައްޔިތުންނާއި ބައްދަލުކުރައްވާ ދެއްކެވި ވާހަފުޅުގެ ތެރެއިން ރައީސް މުއިއްޒު ވިދާޅުވީ މި ސަރުކާރުގެ ފަލްސަފާ އަކީ ތަރައްގީގެ ފަލްސަފާ ކަމަށާއި މި ސަރުކާރުން ރައްޔިތުންނަށް ވެވަޑައިގެންނެވި މައިގަނޑު އެއް ވައުދަކީ ރާއްޖޭގެ ހުރިހާ ރައްޔިތުންނަށް ވެސް ހަމަކަމާއި އެކު ތަރައްގީ ގެނެސްދިނުން ކަމަށެވެ.

ރައީސް މުއިއްޒު ވިދަޅުވީ މި ސަރުކާރުން ކުރަމުންގެދާ މަސައްކަތަކީ ވީރާނާވެ، ނެތެމުން ދިޔަ ގައުމުގެ އިގްތިސާދު އިތުރަށް ގޯސްވިޔަ ނުދީ، ރާއްޖެ ބަނގުރޫޓުވިޔަ ނުދީ ސަލާމަތް ކުރުމާއި އެކީގައި ފައިސާ ޗާޕުކުރުމަކާއި ނުލައި ރައްޔިތުންނަށް ކަންކަން ކޮށްދިނުން ކަމަށެވެ. އެގޮތުން އެކަމުގެ ފޮނިމީރުކަން ރައްޔިތުންނަށް ލިބިގެންދާނޭ ކަމަށް ރައީސް ވިދަޅުވި އެވެ.

ރައީސް ވިދާޅުވީ ޓޫރިޒަމް ސެކްޓަރ އިންނާއި ވަކި އަދަދަކަށް ވުރެ ބޮޑު އާމްދަނީ ލިބޭ ދާއިރާތަކުން، ބޭންކަށް ޑޮލަރު ވަކި އަދަދަކަށް މާރުކުރަން މަޖުބޫރު ކުރުވައި ގާނޫނެއް ހަދާ ތަންފީޒު ކުރީ ވެސް ރައްޔިތުންނަށްޓަކައި އެ ރައްޔިތުންގެ ހައްގުގައި ކަމަށެވެ. އަދި އޭގެ ފުރިހަމަ ކަން ވެސް މިހާރު ރައްޔިތުންނަށް ލިބެމުން ދާކަމަށާއި ނަތީޖާ އަކީ ހެޔޮ އަގުގައި ތަކެތި ލިބިގެން ދިޔުން ކަމަށް ރައީސް ވިދާޅުވި އެވެ.

ރައީސް ވިދާޅުވީ ބައެއް ފަރާތްތަކުން ރައްޔިތުންނަށް ދަތިކުރުމަށް ސިޔާސީ ގޮތުން ބައެއް ދަތިތަށް ކުރިމަތި ކުރުވާ ކަމަށާއި ސަރުކާރުން އެ ފުރުސަތު އެފަދަ ފަރާތްތަކަށް ނުދޭނޭ ކަމަށެވެ.

ރައީސް ވިދާޅުވީ ރައްޔިތުންނަށް ދަތި ކުރުމަށް މޭވާޔާ ތަރުކާރީގެ ބާވަތްތައް ވެސް އަގުބޮޑުކުރަމުން ގެންދާ ކަމަށާއި އެހެން ނަމަވެސް އެކަމަށް ހައްލު ހޯދުމަށް އެސްޓީއޯ މެދުވެރިކޮށް ރާއްޖޭގައި އެންމެ ގިނައިން ބޭނުންކުރާ ބާވަތްތަކުގެ ތެރެއިން ދިހަ ބާވަތެއް ގެނެސް އަގުހެޔޮކޮށް ރާއްޖޭގެ ރައްޔިތުންނަށް ލިބޭނެ ގޮތް މިހާރު ހަމަޖައްސާފައިވާ ކަމަށެވެ.

އިހައްދުވަހު ޑޮލަރު ނުލިބިގެން، ބޭންކުން ޑޮލަރު ނުލިބިގެން، ހަމަ އެއްވެސް ގޮތެއް ނެތިގެން އަގުބޮޑުކުރި އޮރެންޖާއި އާފަލުގެ އަގު މިހާރު ތިރިވެގެން ހިނގައްޖެ. އެހެންވީމަ ކޮބައިތޯ އޭގެ މާނައަކީ، މީގެ ދެތިން ދުވަސް ކުރިން ޑޮލަރު، ބޭންކު ރޭޓުގައި ނުލިބިގެން އުޅުނު ޑޮލަރު ބޭންކުން ރަނގަޅުކޮށްދިނީތޯ. ހަމަ އޭރުވެސް ލިބޭ ރަނގަޅަށް. އެވާހަކަ މިދަންނަވަނީ. ސިޔާސީ ބޭނުމެއްގަ. އޯގަނައިޒް ގޮތެއްގަ، ގަސްތުގަ ބަޔަކު ރައްޔިތުންނަށް ދެރަ ދިނުމަށްޓަކައި ބައެއް ކަންތައްތައް އެބަކުރޭ

ރައީސް ޑރ މުހައްމަދު މުއިއްޒު

ރައީސް ވިދަޅުވީ ސިޔާސީ ގޮތުން ރައްޔިތުންނަށް ދަތިކުރާއިރު، ސަރުކާރުން ލޯމަރާލައިގެން ނުތިބޭނޭ ކަމަށާއި ރައްޔިތުންނަށް ޓަކައި ކުރަންޖެހުނު ކޮންމެ ކަމެއް ވެސް މި ސަރުކާރުން ކުރަމުންގެންދާނެ ކަމަށެވެ.