ކަނޑޫދޫ ރައްޔިތުންނަށް ފައިދާ ލިބޭގޮތަށް، އެރަށުން އެސްޓީއޯއަށް މިރުސް ގަންނާނަން: ރައީސް މުއިއްޒު
ކަނޑޫދޫއަކީ ރާއްޖޭގެ ދަނޑުވެރިކަމުގައި މިރުސް ހެއްދުމަށް މުހިއްމު ރަށެއް
ތ.ކަނޑޫދޫ ރައްޔިތުންނާއެކު ރައީސް ޑރ.މުހައްމަދު މުއިއްޒު ބޭއްވެވި ބައްދަލުކުރެއްވުމުގެ ތެރެއިން
ތ.ކަނޑޫދޫ ރައްޔިތުންނަށް ފައިދާ ލިބޭގޮތަށް، އެރަށުން އެސްޓީއޯއަށް މިރުސް ގަންނާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ބުދަ ދުވަހު އެރަށަށް ވަޑައިގަންނަވައި، ރައްޔިތުންނާއެކު ބޭއްވެވި ބައްދަލުކުރެއްވުމުގައި ރައީސް މުއިއްޒު ވިދާޅުވީ އެސްޓީއޯ މެދުވެރިކޮށް ބާޒާރުގައި ވިއްކުމަށް ނިންމި ކާބޯތަކެތީގެ ތެރޭގައި މިރުސް ހިމެނިފައިވީ ނަމަވެސް އެކަން ސަރުކާރުން ކުރަމުންގެންދާނީ ކަނޑޫދޫގެ ވިޔަފާރިވެރިންނަށް އެކަމުގެ އެއްވެސް ގެއްލުމެއް ނުވާގޮތަށް ކަމަށެވެ.
ކަނޑޫދޫއަކީ ރާއްޖޭގެ ދަނޑުވެރިކަމުގައި މިރުސް ހެއްދުމަށް މުހިއްމު ރަށެއްކަން ފާހަގަކުރައްވައި، އެމަނިކުފާނު ވަނީ ކަނޑޫދޫ ވިޔަފާރިވެރިން މިރުސްވިއްކާ އަގުގައި ގަނެގެން، އެފައިދާ ރައްޔިތުންނަށް ލިބޭގޮތަށް އެސްޓީއޯއިން އެކަން ކުރިއަށް ގެންދަވާނެކަމުގެ ޔަގީންކަންދެއްވާފައެވެ.
ރަށުގެ ދަނޑުވެރިންނަށް ލިބޭފައިދާ އިތުރުކޮށްދިނުމަށް ބޭނުންފުޅުވާކަން ފާހަގަކުރައްވައި އެމަނިކުފާނު ވިދާޅުވީ ޚަރަދުކުޑަގޮތެއްގައި ކަނޑޫދޫގައި މިރުސްހެއްދުމަށް މިހާރު ހުރި ދަތިތައް ކުޑަކޮށްދެއްވުމަށް ދަނޑުވެރިކަމާބެހޭ ވުޒާރާގެ ޓީމެއް ކަނޑޫދޫއަށް ފޮނުވުމަށް ނިންމަވާފައިވާ ކަމަށެވެ.
ދަނޑުވެރިކަމުގެ ވަރަށް މުހިންމު ރަށެއް، މިރުސް ހެއްދުމުގައި. އަޅުގަނޑަކީ ވަރަށް ކުޅިކޮށް ކާ މީހެއް. އަޅުގަނޑަށް ވަރަށް މީރު ތިޔަބޭފުޅުންގެ މިރުސް. ދެން، ދަންނަވާލަން ބޭނުންވާ ވާހަކައަކީ، ވަކި އަޅުގަނޑު ކުޅިކޮށް ކާތީކީ ނޫން. މި ރަށުގެ މިރުސް މިއީ، މާލޭގެ މާކެޓުގައި ޑޮމިނޭޓްކުރާ ފަރާތްތަކަކީ. އަޅުގަނޑުމެން މިދޭތެރެއިން، އެސް.ޓީ.އޯ. މެދުވެރިކޮށް 23 ބާވަތެއްގެ ތަކެތި، ރެގިއުލަރ ބޭސިސްގައި އިމްޕޯޓްކޮށް، ވިއްކަން ނިންމި ނިންމުމުގެ ތެރޭގައި މިރުސް ހިމެނޭނެ. އެހެންނަމަވެސް، އަޅުގަނޑު ހަމަ ވަރަށް ވަރަށް ޔަގީންކަމެއް ދެން، ތިޔަބޭފުޅުންގެ ވިޔަފާރިއަށް ގެއްލުމެއް ނުވާގޮތަށް އެކަން ކުރާނީ. އެސް.ޓީ.އޯ.އިން ތިޔަބޭފުޅުންގެ އަގުގައި، ތިޔަބޭފުޅުންނަށް އޭގައި ފައިދާވާ، ހަމަ ރަނގަޅު އަގުގައި އެ މިރުސް ގަނެގެން، ތިޔަބޭފުޅުންނަށް ބޭނުންވާ ފައިދާ ލިބޭގޮތަށް، އެކަން ހަމަޖައްސައިގެން ކަމުގައިވިޔަސް، ތިޔަބޭފުޅުންނަށް އޭގެ އެއްވެސް ގެއްލުމެއްނުވާ ގޮތަށް، އެކަން ކުރިއަށް ގެންދާނެ ކަމުގެ ޔަޤީންކަން، އަޅުގަނޑު ތިޔަބޭފުޅުންނަށް ދެން. އެހެންވީމާ، އެއްގޮތަކަށްވެސް ކަންބޮޑުނުވާތި ގެއްލުންވާނެ ކަމަށް، ނޫނީވިއްޔާ މިހާރަށްވުރެ ފައިދާ ކުޑަވެގެންދާނެ ކަމަށް. އިތުރަށް ރަނގަޅުކޮށްދޭން އަޅުގަނޑު މަސައްކަތް ކޮށްދޭނަން.ރައީސް ޑރ. މުހައްމަދު މުއިއްޒު
ރަށުގެ ތަރައްގީގެ މަޝްރޫއުތަކަށް އިޝާރާތްކުރައްވައި ރައީސް ވަނީ މިހާރު ހުއްޓިފައިވާ ފެނާއި ނަރުދަމާގެ މަޝްރޫއު، ކުރުމުއްދަތެއްގެ ތެރޭގައި ނިންމުމަށް ސަރުކާރުން މަސައްކަތް ރާވާފައިވާގޮތާއި، އެމަސައްކަތް ލަސްވަމުންދާ ސަބަބު ސާފުކޮށްދެއްވާފައެވެ. އެމަޝްރޫއުގެ މަސައްކަތް ހަވާލުކޮށްފައިވާ ފަރާތާއެކު ހަދާފައިވާ ކޮންޓްރެކްޓް އުވާލައްވައިގެން ނުވަތަ އެމް.ޑަބްލިޔު.އެސް.ސީ އާއި ހަވާލުކުރައްވައިގެން ކުރިއަށްގެންދެވުމާމެދު ސަރުކާރުން ވަރަށް އަވަހަށް ގޮތެއް ނިންމަވާނެކަމަށް އެމަނުކުފާނު ވިދާޅުވިއެވެ.
މީގެ އިތުރުން ރަށު ސްކޫލްގެ އުމުރާނީ މަސައްކަތާއި، ހެލްތު ސެންޓަރުގެ މަސައްކަތް އަދި ކުޅިވަރު ކުޅޭދަނޑުތަކާއި ވަސީލަތްތައް ނިންމައި، އިތުރަށް ފުރިހަމަކުރައްވާނެ ކަމުގެ ޔަގީންކަން އެމަނިކުފާނު ރައްޔިތުންނަށް ދެއްވިއެވެ.
މި ރަސްމިއްޔާތުގައި، ކަނޑޫދޫ ބަނދަރުގައި ވަކި ޖެޓީއެއް ގާއިމުކުރުމުގެ މަޝްރޫއާއި، ބިންހިއްކުމުގެ މަޝްރޫއުގެ އިތުރުން ރަށުގެ މަގުހެދުމުގެ މަޝްރޫއުގެ އެއްބަސްވުމުގައި ވަނީ ސޮއިކޮށްފައެވެ.
