ދެމައިންގެވެސް އޭޑީއެޗްޑީ ހުރޭ، ހަމަޖެހުމުގެ އަސްލަކަށް ވީ އުއްބައްތި

ދިރިއުޅުމުގެ މައިދާނުގައި ކުރިމަތިލާން ޖެހޭ ކޮންމެ ކަމަކާވެސް ހިތްވަރާއި ސާބިތުކަމާއެކު ކުރިމަތިލައިފިނަމަ، ހިތްހަމަޖެހުމާ އުފާވެރިކަން ހާސިލު ކުރެވިދާނެކަން ދައްކައިދެމުން ދާ އެކަކީ މިޞްރަށް އުފަން އާޔާ އަލް ޝިރްބިނީއެވެ. ޢުމުރުން 34 އަހަރުގެ އާޔާގެ ދިރިއުޅުމަށް ބޮޑު ބަދަލެއް އައީ، އޭނާއަކީ އެޓޭންޝަން ޑެފިސިޓް ހައިޕަރއެކްޓިވިޓީ ޑިސްއޯޑަރ (އެޑީއެޗްޑީ) ހުންނަ މީހެއްކަމަށް ޑޮކްޓަރުން ކަނޑައެޅި ހިސާބުންނެވެ.

އާޔާއަކީ ޢަރަބި ސެންޓާއި ވަސްތަކަށް އިންތިހާއަށް ލޯބި ކުރި މީހެއްކަން އޭނާގެ ހަނދާނަށް އައީ، އޭނާގެ އަތް ބޭނުންކޮށްގެން މަސައްކަތްތަކެއް ކުރުމަށް، އާޔާގެ ތެރަޕިސްޓުން އިރުޝާދު ދިން ހިސާބުންނެވެ. އެ ހަނދާން އޭނާ ގެންގޮސްދިނީ ޢުއްބަތިއާ ދިމާއަށެވެ. އުއްބަތި ހަދަން ބޭނުން ކުރާ ކުޑަ ކިޓަކަށް އޮންލައިންކޮށް އޯޑަރު ދިން އާޔާއަކީ މިއަދު، މީރުވަސް ދުވާ އުއްބަތި އުފެއްދުމުގެ ދާއިރާގައި އަމިއްލަ ވިޔަފާރި ކޮޅަށް ޖަހާފައިވާ، ހިތްވަރުގަދަ މަންމައެކެވެ. އާޔާގެ އުފެއްދުންތައް ވިއްކަނީ، "ފްލޭމްސް: ގެ ނަމުގައި އޭނާ ހިންގާ އޮންލައިން ޕޭޖެއް މެދުވެރިކޮށެވެ.

ކޯޕަރޭޓް ދުނިޔޭގައި 14 އަހަރު ވަންދެން އަދާ ކުރި ވަޒީފާ ދޫކޮށް، އާޔާގެ އަމިއްލަ ވިޔަފާރީގެ މަސައްކަތް ފެށިތާ އަދި މާ ގިނަ މަހެއް ނުވެއެވެ. އާޔާ ބުނާ ގޮތުގައި، އޭނާ ކުރިން ވަޒީފާ އަދާކުރި މާޙައުލްތަކަކީ، އޭނާގެ ނަފްސާނީ ހާލަތަށް އެންމެ އެކަށޭނަ ވެއްޓެއް ނޫނެވެ. އާޔާ، އާޔާގެ ގޮތުގައި ބަލައިގަތް ވެއްޓެއް ނޫނެވެ.

މީރު ވަސްދުވާ އުއްބަތި ހެދުމުގެ މަސައްކަތް ފެށިފަހުން އޭނާގެ ބޮލު ތެރޭގައި އެނބުރޭ ޚިޔާލުތައް ތަރުތީބު ކުރަން ފަސޭހަވެ، އޭޑީއެޗްޑީއާއެކު ކުރިމަތިވާ އެކި ކަހަލަ ގޮންޖެހުންތަކާވެސް ކުރިމަތިލާން ދަސްވެއްޖެ ކަމަށް އާޔާ ބުނެއެވެ.

ޢާއިލާއާއެކީވެސް ހަމަޖެހޭ ދިރިއުޅުމެއް އުޅެވެން ފަށައިފިއެވެ. ފިރިމީހާއާއި ދަރިންނާއެކު ހިތްގައިމު ވަޤުތުތަކެއް ހޭދަ ކުރެވެއެވެ. އާޔާގެ ދަރިންގެ ތެރެއިން، ޢުމުރުން 6 އަހަރުގެ ޔޫސްފްއަކީވެސް އޭޑީއެޗްޑީ ހުންނަ ކުއްޖެކެވެ.

އާޔާއަކީވެސް އޭޑީއެޗްޑީ ހުންނަ މީހެއްކަން ދެނެގަނެވުނީ މީގެ ދޮޅު އަހަރެއްހާ ދުވަސް ކުރިންނެވެ. އެއީ ދަރިފުޅުގެ ކިބައިގައި، އެ އުމުރުގެ އެހެން ކުދިންނާ ތަފާތުތަކެއް ހުރިކަން ފާހަގަވެ، ސްޕެޝަލިސްޓެއްގެ ލަފާ ހޯދާލުމަށް، ދަރިފުޅުގެ ޓީޗަރުން، އާޔާއަށް އިރުޝާދު ދިން ހިސާބުންނެވެ.

އާޔާގެ ފިރިމީހާގެ އެއްބާރުލުމާއި އެހީތެރިކަމާއެކު، އުއްބަތި ހެދުމުގެ މަސައްކަތަކީ، އާޔާ، އޭނާގެ ދަރިންނާވެސް ހިއްސާ ކުރާ މަސައްކަތަކަށް މިއަދު ވަނީ ވެފައެވެ. އާޔާގެ ދަރިފުޅަށް އިރުޝާދު ދީފައި ވާ ގޮތަށް ފަތަން ދިއުމާއި ކިކް-ބޮކްސިންގްގެ ހަރަކާތްތައް ކުރިއަށް ގެންދަނީ ދޮށީ ބޭބެއާ އެކުގައެވެ. ދެން އޮންނަ ވަޤުތުތައް ހޭދަ ކުރަނީ އާޔާއާއެކީ އުއްބަތި ހެދުމުގެ މަސައްކަތުގައެވެ.