މާލެސިޓީ ގެއެއްގެ މަތިން ވެއްޓުނު މީހާ މަރުވެއްޖެއެވެ.

މިހާދިސާ ހިނގާފައިވަނީ ބުދަ ދުވަހުގެ އިރުއޮއްސުނު ވަގުތު މޯލްޑިވްސް ޕޯޓްސް ލިމިޓެޑް (އެމްޕީއެލް) ކައިރީގައެވެ.

ފުލުހުން ބުނީ މާލޭގައި ގެއެއްގެ މަތިން މީހަކު ވެއްޓި މަރުވި ހާދިސާ އިތުރަށް ތަހުގީގު ކުރަމުންދާ ކަމަށެވެ.

ފުލުހުން ބުނީ އެ މީހާ މަރުވުމުން އާއިލާއަށް ލިބިފައިވާ ހިތާމައިގެ މި ދަނޑިވަޅުގައި، އާއިލާގެ އިހުސާސްތަކަށް އިހުތިރާމުކޮށް، މަރުވި މީހާގެ ފޮޓޯ އާއި ހާދިސާގެ މަންޒަރުތައް މީސްމީޑިއާގެ ވަސީލަތްތަކަގައި ދައުރު ނުކުރުމަށް އެދޭ ކަމަށެވެ.

މައުލޫމާތު ލިބިފައިވާ ގޮތުގައި އެމްޕީއެލް ސަރަހައްދުގައި ހުންނަ މ. ހަސޯވާގެ އިމާރާތުން ވެއްޓިފައިވަނީ އަންހެނެކެވެ. އޭނާ ވެއްޓިފައިވަނީ 8 ވަނަ ފަންގިފިލާއިން ކަމަށާއި، ވެއްޓި ޖެހިފައިވަނީ އެސަރަހައްދުގައި ޕާކު ކޮށްފައި އޮތް ވެހިކަލެއްގެ ތެރެއަށެވެ.