ސައުދީ އަރަބިއްޔާގެ ޕްރޮފެޝަނަލް ލީގުގައި ބުރާސްފަތި ދުވަހުގެރޭ އަލް އަހްލީއާ ދެކޮޅަށް ކުޅުނު މެޗު ކާމިޔާބުކޮށް ލީގު ތާވަލްގެ ތިންވަނަ މަޤާމަށް އަލް ނަޞްރުން ޖެހިފައިފިއެވެ.

ސައުދީ އަރަބިއްޔާގެ ޖިއްދާގައި ކުޅުނު މި މެޗު އަލް ނަޞްރުން ކާމިޔާބުކޮށްފައި ވަނީ ޖޯން ދުރާން ކާމިޔާބުކޮށްދިން ދެ ލަނޑާއެކު 3-2 ގެ ނަތީޖާއަކުން ނެވެ.

މި މެޗުން އަލް ނަސްރު މޮޅުވުމާއެކު އެ ޓީމަށް ލީގުގެ ތިންވަނަ މަޤާމު ލިބުނީ ލީގުގައި މިހާތަނަށް ކުޅުނު 20 މެޗުން 44 ޕޮއިންޓު ލިބިގެންނެވެ.

އެއްވަނައިގައި އޮތް އަލް އިއްތިހާދަށް 19 މެޗުން 49 ޕޮއިންޓް ލިބިފައިވާއިރު، ދެވަނައިގައި އޮތް އަލް ހިލާލަށް 19 މެޗުން ލިބިފައިވަނީ 47 ޕޮއިންޓެވެ.

ސައުދީ އަރަބިއްޔާގެ ޖިއްދާގައި ކުޅުނު މި މެޗުގެ 32 ވަނަ މިނިޓުގައި ޖޯން ދުރާން ވަނީ ލަނޑެއް ޖަހާ އެ ޓީމަށް ކުރި ހޯދަދީފަ އެވެ.

އިނގިރޭސި ޕްރިމިއާ ލީގުގެ އެސްޓަން ވިލާއިން މިދިޔަ ޖެނުއަރީ މަހު އަލް ނަސްރަށް ބަދަލުވި އުމުރުން 21 އަހަރުގެ ޖޯން ދުރާން ވަނީ މި މެޗުގައިވެސް މޮޅު ކުޅުމެއް ދައްކާފަ އެވެ.

މެޗުގެ ފުރަތަމަ ހާފު 1-0 ގެ ނަތީޖާއަކުން ކުރީގައި އޮވެ އަލް ނަސްރުން ނިންމާލާފައިވާއިރު، ދެވަނަ ހާފުގެ ކުޅުން ފެށުނުތާ ދެވަނަ މިނިޓުގައި އެ ޓީމުގެ މުހައްމަދު ސިމަކަންއަށް ރެފްރީ ވަނީ ރަތް ކާޑެއް ދައްކާ ދަނޑުން ފޮނުވާލާފަ އެވެ. އެއާއި އެކު އެއް ކުޅުންތެރިއަކު މަދުކޮށް އަލް ނަސްރުން ކުޅެން ފެށިތާ ގިނައިރުތަކެއް ނުވަނީސް މެޗުގެ 78 ވަނަ މިނިޓުގައި އަލް އަހްލީގެ އިވާން ޓޯނީ ވަނީ ލަނޑެއް ޖަހާ މެޗުގެ ނަތީޖާ އެއްވަރުކޮށްފަ އެވެ.

އެހެން ނަމަވެސް އޭގެ ދެ މިނިޓު ފަހުން އަލް ނަސްރުގެ އައިމަން ޔަހުޔާ ވަނީ އިތުރު ލަނޑެއް ޖަހައި، ދެވަނަ ފަހަރަށް އެ ޓީމަށް ކުރި ހޯދަދީފައެވެ. އަދި އޭގެ އަށް މިނިޓު ފަހުން، މެޗުގެ 88 ވަނަ މިނެޓުގައި ދުރާން ވަނީ އިތުރު ލަނޑެއް ޖަހާ ދެ ޓީމުގެ ދެމެދުގައިވާ ފަރަގު ބޮޑުކޮށްފައެވެ.

މި މެޗުގައި އަލް އަހްލީން ޖެހި ދެވަނަ ލަނޑު މެޗުގެ ފުރިހަމަ ވަގުތު ހަމަވެ އިތުރު ވަގުތުގެ އަށްވަނަ މިނިޓުގައި އެ ޓީމަށް ކާމިޔާބު ކޮށްދީފައިވަނީ ސުމެއިހަން އަލް ނަބީތުއެވެ.

އަލް ނަޞްރަށް ދެން އެންމެ އަވަހަށް އޮތީ އޭއެފްސީ ޗެމްޕިއަންސް ލީހުގައި އިރާންގެ ޕާސެޕޮލިސް އާއި ދެކޮޅަށް ކުޅޭ މެޗެވެ. މި މެޗު އޮންނާނީ މިމަހުގެ 17 ވަނަ ދުވަހުގައެވެ.