އެމެރިކާ އިން ސައުދީ އަށް 78.5 މިލިއަން ޑޮލަރުގެ ހަތިޔާރު ވިއްކުމަށް ހުއްދަ ދީފި
އެމެރިކާ އިން އަލަށް ވިއްކުމަށް ނިންމި ހަތިޔާރުގެ ސަބަބުން ސައުދީ އަރަބިއްޔާގެ އަސްކަރިއްޔާގެ ކަނޑުއަޑީގެ ގާބިލުކަން އިތުރުވާނެ ކަމަށް އެމެރިކާ އިން ބުނޭ
ނޮވެމްބަރު 1، 2023 ގައި ވާޖީނިއާގެ އާލިންގޓަންގައި އެމެރިކާގެ ޑިފެންސް ސެކްރެޓަރީ ލޮއިޑް އޮސްޓިން (ވ) ސައުދީ އަރަބިއްޔާގެ މިނިސްޓަރު އޮފް ޑިފެންސް ޚާލިދު ބިން ސަލްމާން (ވ) އަށް މަރުހަބާ ވިދާޅުވަނީ
އެމެރިކާ އިން ސައުދީ އަރަބިއްޔާ އަށް 78.5 މިލިއަން ޑޮލަރުގެ ހަތިޔާރު ވިއްކުމަށް ސްޓޭޓް ޑިޕާޓްމަންޓުން ހުއްދަ ދީފި އެވެ.
މީގެ ތެރޭގައި ހިމެނެނީ ލައިޓް ވެއިޓް ޓޮރުޕިޓޯ ކަމަށް ވެސް ރިޕޯޓުތައް ބުނެއެވެ.
"މި މުއާމަލާތުގެ ސަބަބުން ސަޢޫދީ ޢަރަބިއްޔާގެ އަސްކަރިއްޔާގެ ކަނޑުއަޑީގެ ޤާބިލުކަން އިތުރުވެ، މިހާރާއި މުސްތަޤުބަލުގައި ކުރިމަތިވެދާނެ ނުރައްކާތަކާ ކުރިމަތިލުމުގެ ޤާބިލުކަން އިތުރުވެގެންދާނެއެވެ،" ޕެންޓަގަނުން ބުނެފައިވެއެވެ.
ސައުދީ އަރަބިއްޔާ އާއި އެމެރިކާ އަކީ އަސްކަރީ ގުޅުން ވަރުގަދަ ދެ ގައުމުގެ ގޮތުގައި ފާހަގަ ކުރެވޭ ދެ ގައުމެވެ.
ސަޢޫދީ ޢަރަބިއްޔާގެ ދިފާޢީ ވަޒީރު އަމީރު ޚާލިދު ބިން ސަލްމާނަށް ޕެންޓަގަނުގެ އިސްވެރިޔާ ލޮއިޑް އޮސްޓިން ވަނީ ވޮޝިންގްޓަނުން ސަޢޫދީ ޢަރަބިއްޔާގެ ދިފާޢަށް ދޭ އަހަމިއްޔަތު ތަކުރާރުކުރައްވާ ކަމަށް ވިދާޅުވެ، މެދުއިރުމަތީގައި ހަމަޖެހުން ގެނައުމަށް ސައުދީން ކުރާ މަސައްކަތަށް ޝުކުރު އަދާކުރައްވާފައެވެ.
އެމެރިކާ އާއި ސަޢޫދީ ޢަރަބިއްޔާގެ އެންމެ އިސް އަސްކަރީ ވެރިން ވަނީ ފާއިތުވި މަހު ފޯނުގެ ޒަރީއާ އިން މެދުއިރުމަތީގެ ސަލާމަތާއި ހަމަޖެހުމާ ބެހޭގޮތުން މަޝްވަރާކޮށްފައެވެ.
