ފަލަސްޠީނުގެ މައްސަލައިގައި އދ ގައި މިނިސްޓަރުންގެ ކޮންފަރެންސްއެއް

އިސްރާއީލާއި ފަލަސްޠީނުގެ މައްސަލައާ ގުޅޭ ގޮތުން ސައުދީ އަރަބިއްޔާ އާއި ފްރާންސް އިން އިސްނަގައިގެން ބާއްވާ ކޮންފަރެންސް އަށް އދ ގައި މިނިސްޓަރުން ބައްދަލު ކުރަން ހަމަޖެހިއްޖެ އެވެ. 

އދ ގެ 193 މެމްބަރުންގެ މައްޗަށް އެކުލެވޭ އާންމު މަޖިލީހުން މީގެ ކުރިން ނިންމާފައި ވަނީ، މިއަހަރުގެ ތެރޭގައި އެ ކޮންފަރެންސް ބޭއްވުމަށެވެ. ސައުދީ އާއި ފްރާންސް އިން އިސްނަގައިގެން ބާއްވާ މި ކޮންފަރެންސް ކުރިން ބާއްވަން ތާވަލު ކުރި ތާރީޚުގައި ނުބޭއްވުނީ އިސްރާއީލާއި އީރާނާ ދެމެދު ކުރިއަށް ދިޔަ ހަނގުރާމައިގެ ސަބަބުންނެވެ. 

މި ކޮންފަރެންސްގެ މައިގަނޑު މަޤުސަދަކީ ފަލަސްޠީނުގެ ދައުލަތަކާ ގުޅޭ ގޮތުން މަޝްވަރާކޮށް، ޕްލޭނެއް އެކުލަވަލާނެ އުސޫލެއް ކަނޑައެޅުމުގެ އިތުރުން، އިސްރާއީލްގެ ސަލާމަތާއި ރައްކާތެރިކަން ކަށަަވަރު ކުރުމެވެ. އެހެން ނަމަވެސް، އެ ބައްދަލުވުމުގައި ބައިވެރި ނުވެ، ބައްދަލުވުން ބޮއިކޮޓް ކުުރުމަށް އެމެރިކާ އާއި އިސްރާއީލް އިން ވަނީ ނިންމައިފަ އެވެ. 

ފްރާންސްގެ ފޮރިން މިނިސްޓަރު ޖީން ނޯއެލް ބަރޮޓް ވިދާޅުވެފައިވާ ގޮތުގައި، ފަލަސްޠީނުގެ ދައުލަތެއް ޤަބޫލު ކުރުމަށް އެހެން ޤައުމުތަކަށް ވެސް ގޮވާލާނެ އެވެ. ފްރާންސްގެ ރައީސް އިމަނުއެލް މެކްރޮން ވަނީ، މިއަހަރުގެ ސެޕްޓެމްބަރު މަހުގެ ތެރޭގައި އދ ގެ އަހަރީ ބައްދަލުވުމުގައި ފަލަސްޠީނުގެ މިނިވަން ދައުލަތް ބަލައި ގަތުމަށް ނިންމަވައިފަ އެވެ. 

އެ ބައްދަލުވުމާ ގުޅޭ ގޮތުން ވާހަކަ ދައްކަމުން އެމެރިކާގެ ސްޓޭޓް ޑިޕާޓްމަންޓުގެ ތަރުޖަމާނަކު ބުނެފައި ވަނީ، އެ ބައްދަލުވުމަކީ ހަމާސް އަށް ލިބިގެންދާ ހަދިޔާއެއް ކަމަށެވެ. އަދި ހަމާސް އިން މިހާރު ވެސް ގެންދަނީ ހަނގުރާމަ ހުއްޓާލުމަށް ދެކޮޅު ހަދަމުން ކަމަށް ވެސް އޭނާ ބުންޏެވެ. 

އިސްރާއީލްގެ ޔޫއެން މިޝަންގެ ޖޮނަތަން ހަރޫނޯފް ބުނެފައިވާ ގޮތުގައި، ހަމާސް ކުށްވެރުކޮށް، ހަމާސް އިން ހިފަހައްޓާފައިވާ އިސްރާއީލްގެ ރަހީނުން މިނިވަން ކުރުމުގެ މައްސަލަ އަށް އިސްކަމެއް ނުދޭ ބައްދަލުވުމެއްގައި އެ ޤައުމުން ބައިވެރި ނުވާނެ އެވެ.

އދ އިން އަބަދު ވެސް ތާއީދު ކުރަމުން އަންނަނީ ދެ ދައުލަތުގެ ހައްލަކަށެވެ. ފަލަސްޠީނުގެ ރައްޔިތުން ބޭނުން ވަނީ 1967 ވަނަ އަހަރުގެ ހަނގުރާމައިގައި އިސްރާއީލް އިން ހިފި ސަރަހައްދުތަކުގައި އެ މީހުންގެ ދައުލަތެއް ޤާއިމު ކުރުމަށެވެ.