ފަރެސްމާތޮޑާ އެއާޕޯޓް ރަސްމީކޮށް ހުޅުވައި ދެއްވާ ރައްޔިތުން ހެއްވައިލައިފި

ގދ. ފަރެސްމާތޮޑާ އެއާޕޯޓް ރަސްމީކޮށް ހުޅުއްވައިދެއްވައިފިއެވެ.

ބުދަ ދުވަހުގެ ރޭ ފަރެސްމާތޮޑާ އެއާޕޯޓުގައި އެ އެއާޕޯޓް ހުޅުވުމަށް ބޭއްވި ރަސްމިއްޔާތުގައި އެއާޕޯޓް ހުޅުއްވައިދެއްވީ ރައީސް އިބްރާހިމް މުހައްމަދު ޞާލިހެވެ.

ފަރެސްމާތޮޑާ އެއާޕޯޓް ބުދަ ދުވަހުގެ ރޭ ހުޅުވައިފައިވާއިރު ބުރާސްފަތި ދުވަހުން ފެށިގެން އެ ރަށަށް ޝެޑިއުލް ދަތުރުތައް ފަށާނެއެވެ. މައުލޫމާތު ލިބޭ ގޮތުގައި ހަފްތާއަކު ދެ ފްލައިޓް ފަރެސްމާތޮޑާ އެއާޕޯޓަށް ޖައްސާނެއެވެ. ވެލާނާ އިންޓަރނޭޝަނަލް އެއަރޕޯޓުން ފަރެސްމާތޮޑާ އެއަރޕޯޓަށް ޓިކެޓެއްގެ އަގަކީ 1624 ރުފިޔާއެވެ.

ފަރެސްމާތޮޑާ އެއަރޕޯޓް ތަރައްގީކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އާ ހަވާލުކޮށްގެންނެވެ. މި މަޝްރޫޢުގެ ދަށުން، ރަންވޭގެ ސަބްގްރޭޑް އަދި ސަބްބޭސް މަސައްކަތާއި، ޓެކްސީވޭއަކާއި، އޭޕްރަންއަކާއި، ފަޔަރ ޕެޑް އަދި ފަޔަރ ރޯޑެއް ގާއިމްކޮށް، ފަޔަރ ބިލްޑިންގ އެއް އިމާރާތް ކޮށްފައިވެއެވެ. އަދި އައު ޓާރމިނަލް ބިލްޑިންގ އެއް އިމާރާތް ކުރުމުގެ މަސައްކަތް ހިމެނެއެވެ.

ފަރެސްމާތޮޑާ އެއަރޕޯޓު ތަރައްގީ ކުރުމުގެ މަޝްރޫއުގެ ދަށުން އެ އެއަރޕޯޓުގެ ރަންވޭގައި ލައިޓު ހަރުކޮށް، ޑިސެމްބަރު މަހުގެ ތެރޭގައި ވަނީ ޓެސްޓްކޮށްފައެވެ. މިއީ އެ އެއަރޕޯޓަށް ރޭގަނޑު ވަގުތު ވެސް ފްލައިޓުތައް ދަތުރު ކުރެވޭ ގޮތް ހެދުމަށް ހަރުކޮށްފައިވާ ލައިޓުތަކެކެވެ.

އެ ކުންފުންޏާ މި މަޝްރޫއު ހަވާލު ކޮށްފައިވަނީ 144.8 މިލިއަން ރުފިޔާއަށް 2020 ވަނަ އަހަރުގެ ނޮވެމްބަރު މަހުގައެވެ. އެއަރޕޯޓްގައި ޤާއިމުކޮށްފައިވަނީ 1200 މީޓަރު ދިގު ރަންވޭއެކެވެ. އެއަރޕޯޓްގެ ޢަމަލީ މަސައްކަތްތައް ފެށީ 2021 ވަނަ އަހަރުގެ ކުރީކޮޅުއެވެ.

ފަރެސްމާތޮޑާ އެއާޕޯޓަކީ ރާއްޖޭގެ އެހެން އެއާޕޯޓުތަކާ އަޅާބަލާއިރު ތަފާތު އެއާޕޯޓެކެވެ. މި އެއާޕޯޓް ތަފާތުވަނީ މި އެއާޕޯޓުގެ ޑިޒައިންގެ ސަބަބުންނެވެ. ރާއްޖޭގެ އިހުގެ "އޮޑިހަރުގެ" އެއްގެ ފަރުމާ ދައްކުވައިދޭ މި އެއާޕޯޓްގެ ރީތިކަމަށް ގިނަ ބަޔަކު އަންނަނީ ތައުރީފް ކުރަމުންނެވެ. މި އެއާޕޯޓްގެ ރަންވޭ ސައިޑު އަދި ލޭންޑް ސައިޑްގައި ވެސް ޖަހައިފައިވަނި ބިއްލޫރިއެވެ. މި އެއާޕޯޓްގެ ޓާމިނަލްގެ 50 އިންސައްތައަކީ ބިއްލޫރިއެވެ.

ފަރެސްމާތޮޑާ އެއަރޕޯޓަކީ ގދ. އަތޮޅުގައި ހުޅުވާ ތިންވަނަ އެއަރޕޯޓެވެ. މިހާރު އެ އަތޮޅުގައި އޮންނަނީ ކާޑެއްދޫ އެއަރޕޯޓާއި މާވަރުލު އެއަރޕޯޓެވެ.